Bible chuan Pathian Jehova’n hma lam hun a hrilh lâwk thei tih chiang takin a sawi a. (Is. 45:21) Mahse, hma lam hun a hriat lâwk theih dân te, a hriat lâwk hun te leh, a hriat lâwk theih chinte chu chipchiar takin a sawi lo va. Chuvângin, chumi chungchâng chu chiang taka hriat theih a ni lo. Chutih rualin, kan hriat theih thil ṭhenkhat a awm a ni.

Jehova chuan thil engkim tithei mahse, bituk chin a insiam. Tâwp chin nei lo a finna hmangin a duh zâwng apiang a hre lâwk thei a. (Rom 11:33) Mahse, ṭha famkima a inthunun avângin thil lo thleng tûrte hriat lâwk loh chu a thlang thei bawk a ni.—Isaia 42:14 nên khaikhin rawh.

Jehova chuan a duh zâwng a thlentîr. Engtin nge chu chu a hrilh lâwk theihna nên a inkûngkaih? Isaia 46:10 chuan: “Keiin a tâwp tûr chu a tîr aṭang rêngin ka sawi ṭhîn a, thil la tih lohte chu hmasâng aṭang rêngin ka sawi ṭhîn; ‘Ka remruat chu a ding chhuak ang a, ka duh zâwng zawng zawng chu ka ti vek ang,’ ka ti a,” tiin a hrilhfiah a ni.

Chuvângin, Jehova’n hma lam hun a hrilh lâwk theih chhan pakhat chu thil thlentîr tûra thiltihtheihna a neih vâng a ni. Hma lam huna thil lo thleng tûrte a hriat theih nân chûngte chu kawng eng emaw taka thleng vek tawh ang hrimin, ani chuan a hmu lâwk thei mai chauh a ni lo. Chu aiin, thil eng emaw chu a hun ruatah tak a thlentîr thei zâwk a ni.—Ex. 9:5, 6; Mt. 24:36; Tirh. 17:31.

Chuvângin, hma lam hun chungchânga Jehova thiltihte nêna inkûngkaihin Bible chuan “siam,” tih leh “tum,” tih thu malte a hmang a. (2 Lal. 19:25; Is. 46:11) Chûng thu malte chu a tîra ziak ṭawnga “bêlvawtu,” tih awmze nei thu mal aṭanga lehlin a ni a. (Jer. 18:4) Bêlvawtu thiam takin hlum chu bêl mawi taka a siam thei angin, Jehova chuan a duh zâwng thlentîr tûrin dinhmunte chu a siam, a nih loh leh a her danglam thei a ni.—Eph. 1:11.

Jehova chuan mite chu zalên taka duh thlan theihna a pe. Ani chuan mite nuna thilthleng tûrte chu a ruat lâwk lo va; thinlung ṭha pu mite chu an chhiatna tûr thilte a tihtîr hek lo. Mi zawng zawng chu an kawng zawh tûrah duh thlan theihna a pe a; mahse, kawng dik thlang tûrin anni chu a fuih a ni.

Entîrna pahnih lo ngaituah ta ila. Pakhatna chu Ninevi khaw mite chungchâng a ni a. Jehova chuan an sualna avângin chu khawpui chu tihchhiat a nih tûr thu a hrilh lâwk a. Mahse, mite an inlamlêt tâkah chuan “an hnêna a sawi tawh, tih a tum thil ṭha lo chu Pathian chuan a lamlêt a; a ti ta lo a ni.” (Jon. 3:1-10) Ninevi khaw mite chuan zalên taka an duh thlan theihna hmanga inchhîrna an lantîr avângin, an chungchânga a hrilh lâwkna chu a thlentîr leh ta lo a ni.

Entîrna pahnihna chu, Judate chhuah zalêna Jehova biak in sa ṭha tûra thu pêk chhuahtu tûr, hnehtu Kura chungchâng hrilh lâwkna a ni a. (Is. 44:26–45:4) Persia lal Kura chuan hrilh lâwkna chu a thlen famkimtîr a ni. (Ezr. 1:1-4) Ani chu Pathian dik Jehova betu a ni lo va. Mahse, Jehova chuan Kura’n a pathian biak tûr chungchânga zalên taka duhthlan theihna a neih chu tibuai si lovin, hrilh lâwkna thlen famkimtîr nân ani chu a hmang a ni.—Thuf. 21:1.

Chûngte chu Jehova’n hma lam hun hriat lâwk theihna a hmanna kawnga a thil ngaihtuah awmchhun a ni lo. Dik tak chuan, mihring tu mahin a kawngte chu kan hre vek thei ngai lo vang. (Is. 55:8, 9) Chutih rualin, Jehova thil min hriattîrte chuan—hma lam hun hrilh lâwkna pawh tiamin—thil dik a ti reng ang tih kan rinna chu a tinghet a ni.