Tjínkʼa xi kjonangi
Jótso je Biblia tʼatsʼe nga tongini kʼoatso je Jeobá jmeni xi koa̱n
Je Biblia kʼoatso nga tongini kʼoatso Jeobá jmeni xi koa̱n (Is. 45:21). Tonga tsínkjoan kʼoatsokixi jósʼin kuitjoson, kʼiáni kuitjoson kʼoa jókji tjen mele skoe̱ jmeni xi koa̱n. Alikuikjoan majinná jokjoantjínni nga be Jeobá jmeni xi koa̱n. Tonga tjín jmeni xi ʼyaa.
Alikui jme xi ñʼai koa̱nle nga kʼoasʼin Jeobá. Nga nʼio chjine koaanle tongini kʼoakuitso tojmeni xi mele (Rom. 11:33). Nga male kʼoasʼín tojmeni kʼoati je xi tsoni kʼiáni nga tsín mele skoe̱ jmeni xi koa̱n (tingósonkoai Isaías 42:14).
Jé Jeobá xosʼín nga bitjoson josʼin mele. Jósʼin basenkaoná nga ʼyaa nga male Jeobá tongini kʼoatso jmeni xi koa̱n. Ya Isaías 46:10 itso: “Anña xi kʼoaxian saʼnda nga fitsʼiani josʼin kuichotsjoá jmeni xi koa̱n, anña xi nʼio tongini kʼoakixian jmeni xi kjesa kʼoamajin. Kʼoa i xian: Kuitjoson jmeni xi xian, kʼoa kʼoasʼian tojmeni xi mena”.
Je Jeobá tongini kʼoatso jmeni xi koa̱n nga̱ koaanle sitjoson tojmeni xi kuitso. Alikui kui xi tsonile jebi nga jetíbe Jeobá jmeni xi sʼa kʼoakoa̱n nichxin xi sʼa nroa. Je xi sʼín kuinga kʼoatso jmeni xi koa̱n kʼoa tijé xosʼínni nga kʼoakjoánsʼin katabitjoson (Éx. 9:5, 6; Mat. 24:36; Hech. 17:31).
Kuinga i̱ tsoni én xi síchjén Jeobá kʼianga tongini kʼoatso jmeni xi skan kʼoakoa̱n: “Tsakʼendajian, kisinda, kʼoatjín tokoan nga kʼoasʼian” (2 Rey. 19:25; nota; Is. 46:11). Kʼianga én hebreo, je én xi machjén i̱ texto jebi kui nchja̱ni josʼín jngo chjota xi tii sínda (Jer. 18:4). Tojo sʼín jngo chjota nga naskánasíka jngo tii, tikʼoasʼinni je Jeobá, jé fajin jmeni xi ma ánni nga ñaki kʼoakjoánsʼin kuitjosonni jmeni xi tjínndajinle (Efes. 1:11).
Alikui je Jeobá kʼoatso jmeni xi sʼiaan. Tsjoáʼndená nga ñá chjoéjiaan jmeni xi mená sʼiaan. Alikui to jetjínndajinle Jeobá jmeni xi sʼin je chjota, kʼoa alikui je xosʼín kʼianga chʼao katasʼín jngo xi nda chjota. Tosaa bakóyaná jméni xi sʼiaan nga nda kuiyoaa, tonga ñá chjoejiaan jmeni xi mená sʼiaan.
Jaola choa̱ kataʼyaa. Xi títjon, je Jeobá kʼoakitso nga sikjeson je naxinandá Nínive nga̱ nʼio tsʼen koan je chjota xi ya tsʼe. Tonga nga kʼoakoannile jéele alikuini kisikjeson (Jon. 3:1-10). Je Jeobá alikuini kʼoakisʼin jmeni xi kitso tsakai, nga̱ je chjota xi Nínive tsʼe kisikʼantjaiyaa yaole kʼoa kinrʼoé jmeni xi kitsole Jeobá.
Xi majaoni choa̱ kui jmeni xi tongini kitso Jeobá tʼatsʼe Ciro. Kʼoakitso nga je sikatíondái chjota judío kʼoa nga je kʼoakuitso nga sʼe̱ndaya yo̱ngo̱ (Is. 44:26–45:4). Jé Ciro xi tsakatéxoma ya Persia kisitjoson én jebi (Esd. 1:1-4). Ningalani je kisichjén Jeobá nga kisitjoson jmeni xi tongini kitso, alikui tsakʼénele nga je katabʼétsʼoale (Prov. 21:1).
Nijngojin chjota xi koa̱njinle jmeni xi sʼín je Jeobá kʼoa josʼin síkjaʼaitsjen. Kʼoa tsín majinná jókjoán sʼínnile nga tongini kʼoatso jmeni xi sʼa kʼoakoa̱n (Is. 55:8, 9). Tonga xi tsín jao tjínná kuinga kui kʼoasʼín ngantsjai Jeobá jmeni xi ndatjín, jolani kʼianga kʼoatso jmeni xi sʼa kʼoakoa̱n.
