Baibo ikalenga cimanyikwe ukuti Yeova wakwata amaka akulanda ivilacitika ukunkoleelo. (Eza. 45:21) Nomba italanda vyonsi pali vino akacita lino akacita vivyo nanti vino aakasoololapo ukumanya. Fwandi tutamanya yonsi pali vino Yeova akacita pa kumanya ivya kunkoleelo. Nomba kwaya ivintu vinono vino twamanya.

Yeova wakwata amaka aakumanya vyonsi vino akulonda ukumanya. Amano yano Yeova wakwata yakalenga atunene ivilacitika ukunkoleelo vino wasoololapo ukumanya. (Loma 11:33) Pa mulandu wakuti wakwata amaka insita zimwi akasoololapo ukukana manya ivilacitika ukunkoleelo.—Loliniko na Ezaya 42:14.

Yeova akalenga ukulonda kwakwe ukucitika. Uzye ci calemana uli na maka yano Yeova wakwata aakumanya ivilacitika ukunkoleelo? Pali Ezaya 46:10 pakati: “Ukutandikila sile na pa mpiti nemo nkavwanga calimwi ivili nu kucitika. Nkalanda ukuti vino nkapanga ukucita ala vilacitika. ‘Nkacita na vyonsi vino nkulonda ukucita.’”

U mulandu onga uno Yeova aakamanyila ivilacitika ukunkoleelo uwakuti wakwata amaka ukulenga ivintu uku citika. Asikolezya ivintu pakuti amanye ivilacitika ukunkoleelo, nanti ukucita ivintu kwati vyacitika mpiti. Lelo Yeova akasoolola ukuti ivintu vimwi vikacitike pa nsita ilinge nu kulenga ukuti vicitike lino insita iyo yafika.—Kufu. 9:​5, 6; Mate. 24:36; Mili. 17:31.

Ali mulandu uno Baibo ikaomvezya amazwi akuti “nateyanya,” na “napanga ukucita” apakulondolola vino Yeova akacita pa vilacitika ukunkoleelo. (2 Yamw. 19:25; Eza. 46:11) Aamazwi yaa aomviwa yasenulwa ukufuma ukwi izwi ilyakolana ni lyakuti ‘nakamata.’ (Yele. 18:4) Wakwe vivi kwene vino nakamata angaomvya ivu uku kupangila inyungu isuma ali vino na Yeova na we angacita vimwi pa kufikilizya ukulonda kwakwe. — Efes. 1:11.

Yeova wapeela antu untungwa wa kuisoolwela ivyakucita. Yeova asitantikila limwi ivilacitikila antu, nanti ukulenga antu asuma ukucita vimwi ivingayaletela intazi. Wazumilizya yonsi ukuisoolwela vino yakulonda ukucita nupya akayakomelezya ukusoolola ivintu ivisuma.

Lekini tulande pa vintu vili. Icakutandikilako antu ali umu musumba wa Ninive. Yeova wasoowile ukuti umusumba wali nu kononwa pa mulandu ni viipe ivyacitikangamo. Nomba lino aikazi amu musumba yalapiile, Yeova “aya na mizu kunoyali nga atayaponyezizye uwononesi uno walanzile ukuti alayaponyezya.” (Yona 3:​1-10) Yeova wasenwile vino walanzile ukuti wali nu konoona Aina Ninive pa mulandu wakuti yaitemilwe ukuvwila yano Yeova watumile ukuyaneena pa upinguzi.

Cakwe ciili usesemo uwalandanga pali vino Kilusi wali nu kucimvya na vino wali nu kufumya Ayuda umuuzya nu kukuula cipya cipya itempele lyakwe. (Eza. 44:26–45:4) Umwene Kilusi wa Ina Pesya u wafikilizye usesemo uu. (Ezila 1:​1-4) Nanti ciye vivyo Kilusi atapepanga Leza wa cumi. Yeova waomvizye Kilusi ukufikilizya usesemo wakwe ukwaula ukuti amupatikizye ukuti atandike ukumuombela.—Mapi. 21:1.

Kwene, vii asi ali vyeo sile ivikalangilila vino Yeova akacita. Ukuya kwene kutaaya umuntunze angamanya inzila zyonsi zino Yeova akacitilamo ivintu. (Eza. 55:​8, 9) Lelo, vino Yeova watusokolwela vikalenga tusininkizye ukuti lyonsi Yeova akacita ivilungame kumwi na vino walanda ukuti ivilacitika uku nkoleelo