Библий раш ончыкта: Иегова каласен кертеш, могай ончыкылык лиеш (Ис. 45:21). Но Библий кажне детальым ок поч, кунам да кузе Юмо тиде моштымашым кучылтеш. Тыгак тушто ок ойлалт, мом Юмо ончыкылык нерген пален налнеже. Сандене ме ончыкыжым мо лийшашым каласаш Иегован моштымашыже нерген чылажымат она пале. Но теве мом ме палена.

Мом ыштымыже шуэш, Иегова чылажымат ыштен кертеш, но южгунам тудо иктаж-мом ышташ огыл шона. Нимучашдыме уш-акыллан кӧра Юмо мо лийшаш нерген чылажымат каласен кертеш (Рим. 11:33). Иегова шкем тыге кучен мошта, кузе иктат огеш мошто, сандене тудо ончыкылык нерген иктаж-мом палаш огыл шонен пыштен кертеш. (Исайя 42:14 дене таҥастарыза.)

Иегова эрыкшым шукташлан чылажымат ышта. Мо лийшашым палдараш моштымашыж дене кузе тиде кылдалтын? Исайя 46:10 умылтара: «Мый мучашыште мо лийшашым эн тӱҥалтыш гычак каласкалем, да акрет годсек тудым — мо эше ышталтын огыл. Мый ойлем: „Шонымашем шукталтеш, да мом мый ыштынем, чылажымат ыштем“».

Иегова мо лийшашым палдарен кертеш манын, молан ме каласен кертына? Амал-влак гыч иктыже — шонен пыштымыжым шукташлан Иегован вийже ситышын уло. Мутлан, фильм мо дене пыта пален налашлан мучашыжым ончалаш лиеш. Но Иегова тыге ок ыште. Вет тудо решатла, могай жапыште мо лийшаш, да, вара шонен пыштымыже палемдыме жапыште шукталтше манын, событий-влакым виктара (Исх. 9:5, 6; Матф. 24:36; Ап. паш. 17:31).

Сандене кунам Библийыште ончыкылык шотышто Иегован шонен пыштымыже нерген ойлалтеш, мемнан жапысе кусарымаш-влакыште тыгай мут-влак кучылталтыт, мутлан, «решитлен», «шонен пыштен» да «ямдылен» (2 Цар. 19:25; Ис. 46:11; Иер. 18:11). Оригинал йылмыште нине глагол-влак «шун атым ыштыше еҥ» манме шомак дене кылдалтыт (Иер. 18:3, 4). Кузе шун атым ыштен моштышо айдеме шун гыч мотор вазым ыштен кертеш, тыге Юмо эрыкшым шукташлан событий-влакым виктарен кертеш (Еф. 1:11).

Иегова еҥ-влаклан решенийым лукташ правам пуа. Юмо огеш пӱрӧ, могай илышышт еҥ-влакын лиеш. Тыгак тудо нуным тыгайым ышташ огеш ӧкымлӧ, мо верч нуно пытарыме лийын кертыт. Иегова кажныжлан шке илыш корным ойырен налаш йӧным пуа, но тунамак чын ышташ кумылаҥда.

Ончалына кок примерым. Эн ончыч Ниневийыште илыше-влак нерген мутланен налына. Нуно шуко осалым ыштеныт, сандене Иегова нунын олаштым пытара манын ончылгоч каласен. Но кунам нуно ӧкыненыт, Иегова решенийжым вашталтен да ончылгоч ойлымо ойгым колтен огыл (Иона 3:1—10). Иегова приговоржым шуктен огыл, вет ниневитян-влак тудын шекландарымыжым колмеке вашталташ шонен пыштеныт.

Кокымшо пример — Кир лӱман айдеме нерген ончылгоч каласымаш. Священный Возымаш почеш тудо еврей-влакым плен гыч утарышаш ыле да Иегован храмжым ачалымаш нерген кӱштымашым лукшаш ыле (Ис. 44:26—45:4). Тиде ончылгоч каласымашым Персийын Кир кугыжаже шуктен (Езд. 1:1—4). Тудо чын Юмылан служитлен огыл гынат, Иегова ончылгоч каласымашыжым шукташлан тудым кучылтын (Прит. 21:1). Но Юмо Кирым служитлышыже лияш ӧкымлен огыл.

Мутат уке, ме чылажымат она пале, мом Иегова шотыш налеш, кунам мо лийшашым палдара. Вет ик айдемат тудын шонымыжым тӱрыснек умылен налын огеш керт (Ис. 55:8, 9). Туге гынат Юмын пуымо шинчымашлан кӧра ӱшанымашна пеҥгыдемеш. Ме пеҥгыдын ӱшанена: тудо эре, мо лийшаш нерген ойлымо годымат, чын ышта.