Bibiliya anowoga wihina Yehova podi owoga dhithu dhinapadduwe osogolo. (Isa. 45:21) Mbwenye kanawoga dhithu dhatedhene wodhela makaleloya obe mudhidhiya Yehova aneriyena eyo, newene dhithu ngasi Oliye anasakuliye onona. Bumwahaya, kannanda oonona dhithu dhatedhene wodhela ekalelo enna Yehova yowoga dhithu dhinapadduwe osogolo. Mbwenye dhihikalawo dhithu vang’ono nnandihu wonelamo.

Yehova podi werana dhaatedhene anafuniye, mbwenye malabo mamodha Oliye anosakula oherana dhithu dhimodha. Mwaha othabwa okanna thotho, Yehova podi owoga ethu-sithu anafuniye. (Rom. 11:33) Mbwenye Yehova podi osakula ohinona ethu enaapadduwe, mwaha Oliye ohunona wiisugwera pamadhene. — Osugwe yolebela ya Isaías 42:14.

Yehova anonroromeliha wihina efunelo yaye enere wakwanela mohihiyedhedha. Eyo enavolowela aavi ekalelo aana Yehova yonona ele enaapadduwe osogolo? Isaías 46:10 anowoga egi: ‘Obajhana omambelelowene ginosoriha dhosogolo, Obajhana masaka akale, ginna osoriha dhego dhihinambele opadduwa. Ginawoga gegihina: Githomilimi werena kaginalepela, Ginafuna gerena dhatedhene ginafunimi.’

Ethu emodha enamuthukulela Yehova owoga dhithu dhinapadduwe osogola, sowihina Oliye ohukanna kopolo yoweriha wi dhithudha dhipadduwe. Oliye kanahowela woona dhithu dhinapadduwe osogolo, ekalaga ninga dhithudha dhihipadduwa, ndala ninga muthu anileriye epaddi yogomihedha na livuru. Ohiya eyo, Yehova podi othoma wi epadduwe ethu-sithu mudhidhi anafuniye. Teto Oliye anokanna ebaribari wihina ethuya enere opadduwa mudhidhi wofwanelela. — Êxo. 9:5, 6; Mat. 24:36; Dho. 17:31.

Bumwahaya Bibiliya agalabihedha madhu ninga ‘gihegeredha,’ ni ‘Gihithoma’ wihina yonihe ethu Yehova aneriye ni dhithu dhinafuna opadduwa osogolo. (2 Reis 19:25; nota; Isa. 46:11) Madhu ala enadha wa ewogelo ya Ebrayiko eniwanana ni ndhu nnatapulela ‘namuuba biya.’ (Jer. 18:4) Ndala ninga namuuba biya aaxagenle pamadhene mabasa aye podi wuba ologo ofiyedha osasanya muhadha woriya, Yehova podi wuba obe osaddula dhithu wihina efunelo yaye yereye. — Efe. 1:11.

Yehova ohunvaha kadda muthu ofuru wosakula, teto Oliye anoriha ofuru ola. Oliye kanamulebela kadda muthu ethu enafuna ompadduwela. Newene Yehova kanaweriha wi athu apama yerena dhithu dhabure dhaatatamulele makathamiho ni dhaathukulele ogujhuliwa. Oliye anohiya wi kadda muthu asakule dila anafuniye ohara, teto onowakongomedha athu ohara dila yapama.

Kasugwa yopadduwa ya akudda Ninive. Yehova owoga wihina luwani ele yere ogujhuliwa mwaha wa obure yeriwana. Mbwenye athu aluwani yeele nuthwaruwa, Yehova ‘waweddela thagaraga ni kagujhunle.’ (Jonas 3:1-10) Yehova osaddula mubuwelo waye wodhela ele awogiliye ni akudda Ninive, mwaha akudda Ninivi yahilabihedha pama ofuru wewa wosakula ni orumedha muthenga awogile Jonasi. Aliwa othwaruwa mwaha wa yeyo kiyagujhuliwe.

Yopadduwa emodhaya sa mwene Siru, awobonle ajudewu yaali muudhaarini ni aathome wihina emagiwe tempulu ya Yehova. (Isa. 44:26–45:4) Mwene Siru ooPersiya, wakwanihedha yovuhulela ela. (Esd. 1:1-4) Yehova omulabihedha Siru wihina akwanihedhe yovuhulela yaye, ahimuwaddihedhe wihina amwebedhe, obe nere, Siru ahikanna ofuru womusakula muthu afuniye omwebedha. — Pro. 21:1.

Ebaribari wi dhihikalawo dhithu dhimodha Yehova anubuweliye afunaga onona dhithu dhinapadduwe osogolo. Teto owoga ebaribari, kavo muthu ananda wonelamo pamadhene dila dha Yehova, obe nere makalelo Oliye anubuweliye ni aneriye dhithudha. (Isa. 55:8, 9) Mbwenye dhatedhene Yehova anaaddeliye dhinafwanyeya mBibiliyani, dhinolibiha nroromelo nehu wihina Oliye malabo aamatene anowerana ele eli yapama ni awogaga wodhela dhithu dhinapadduwe osogolo.