Biiblã wilga vẽeneg t’a Zeova tõe n togsa sẽn wat beoogo. (Eza. 45:21) La a pa wilgd a Zeova sẽn maand rẽ to-to wã ball-balle, la wakat ning a sẽn maand dẽ wã, la bũmb nins sõor a sẽn yãkd yam n na n deng n bãngã ye. Dẽnd d pa tõe n yeel tɩ d wʋmda a Zeova sẽn tar tõog n tõe n togs sẽn wat beoogã võor zãng ye. Baasgo, d na n goma bũmb a wãn yelle.

A Zeova tõe n maana bũmb fãa, la wakat ninga a yãkda yam n pa na n maan bũmb kẽer ye. A Zeova yamã sẽn ka koakã yĩnga, a tõe n deng n bãnga bũmb ning fãa a sẽn date. (Rom. 11:33) La a yõk-m-mengã sẽn zems zãngã, a tõe n yãka yam n pa bao n bãng sẽn wat beoog ye.—Ges-y Ezayi 42:14.

A Zeova kɩtdame t’a raabã pidsdẽ. Bõe la rẽ sõngd tõnd tɩ d bãng a sẽn tar tõog n tõe n togs sẽn wat beoogã wɛɛngẽ? Ezayi 46:10 yetame: “Hal bũmb sɩngre, mam togsda a baasgo, la mam togsda bũmb nins sẽn nan pa maanã tɩ ket n zãra. Mam yetame yaa: ‘Mam yam-yãkrã na n pidsame, la mam na n maana bũmb nins fãa sẽn noom maamã.’”

Rẽnd bũmb a ye sẽn kɩt t’a Zeova tõe n togs sẽn wat beoogã yaa t’a tara tõog n tõe n kɩt tɩ bũmb maane. A Zeova pa rengd n bao n bãng sẽn wat beoogo, wa d sẽn mi n yɩ tao-tao n ges filim baasg n na n bãng sẽn na n baas to-to wã ye. La a Zeova tõe n yãka yam tɩ bũmb na n maana wakat takɩ, n kɩt tɩ bõn-kãng sɩd maane, wakat kãng sã n ta.—Yik. 9:​5, 6; Mat. 24:36; Tʋʋ. 17:31.

Yaa rẽ yĩng la Biiblã sẽn mi n pʋt gom-biis wa “segle,” la “raabo,” sẽn na yɩl n wilg a Zeova sẽn maand bũmb kẽer sẽn wat wɛɛngẽ wã. (2 Rĩm. 19:25; Eza. 46:11) Gom-bi-kãens yita Ebre wã gom-bil ning sẽn yaa “yagdã” pʋgẽ. (Zer. 18:4) Yagd sẽn tar minim tõe n dɩka tãnd n maan laok sẽn yaa neer wʋsgo. Woto me, a Zeova tõe n kɩtame tɩ bũmb toor-toor maane, n pids a raabã.—Efɛɛ. 1:11.

A Zeova basame tɩ ned fãa tõe n yãk a toorẽ yam. A pa pʋlem ned kam fãa vɩɩm sẽn na n yɩ to-to, a leb n pa kɩtd tɩ pʋ-peelem dãmb maan bũmb sẽn na n kɩt tɩ b wa sãam-b ye. A basdame tɩ ned kam fãa yãk a sẽn na n vɩɩmd to-to. La a wilgda nebã b sẽn tõe n vɩɩmd to-to tɩ yɩ sõma.

D gom kibay a yiib sẽn wilgd rẽ yelle. Pipi kibarã gomda Niniiv nebã yelle. A Zeova reng n togsame tɩ b na n sãama tẽngã, a nebã wẽnemã yĩnga. La Niniiv nebã sẽn tek yamã, a Zeova “toeema yam yel-beed ning a sẽn da yeel t’a na n kɩtame tɩ wa b zutã wɛɛngẽ, n pa kɩt tɩ wa ye.” (Zon. 3:​1-10) A Zeova toeema a sẽn da yãk yam n na n maan Niniiv nebã bũmb ningã, bala b sẽn wʋm a Zeova keoogrã, b yãka yam b toor n toeeme.

Kibar a yiib-n-soabã yaa bãngr-gomd ning sẽn gomd a Sirus yellã. Bãngr-gomdã yeelame t’a na n yiisa Zʋɩf-rãmbã yembdo, la a kõ sor tɩ b lebs n me a Zeova roogã. (Eza. 44:26–45:4) Pɛrs rĩm a Sirus pidsa bãngr-gom-kãnga. (Ɛsd. 1:​1-4) La a Sirus ra pa tũud Wẽnnaam sɩd-sɩdã ye. A Zeova tũnuga ne a Sirus n pids bãngr-gomdã, la a bas-a lame t’a yãk a sẽn na n tũ Wẽnnaam ninga.—Yel. 21:1.

Woto yaa bũmb a wãn bal d sẽn tõe n bãnge, a Zeova sẽn tar tõog n tõe n bãng sẽn wat beoogã wɛɛngẽ. La sɩd-sɩda, ninsaal kae n tõe n wʋm a Zeova manesmã fãa võor ye. (Eza. 55:​8, 9) La bũmb nins d sẽn mi a Zeova zugã kɩtame tɩ d bas d yam t’a sẽn maand fãa yaa tɩrga. Yaa woto ne a sẽn yet bũmb nins beoog-daarã wɛɛngẽ wã.