Mbimbiliya ya muesa ngecize Yehova a tantekeya via ku lutue. (Isaya 45:21) Vunoni ka ya muesele ha ntsimbu ika ue ku lingamo, ni vika ue ku hangula ku tantekeya, houe. Ngeci mukemuo, ka tu tantekeya via vingi ku tuala ha cimpande caco. Vunoni tu hilulenu vimo vi tu tantekeyako.

Yehova ka kele na vinginga ku tundisako vize vie ku lihakela ivene. Mu ku linga ua pua mukua mana ose, a hasa ku hangula vika a livanga ku muena vua lumo. (Loma 11:33) Vunoni naua omo lia ku lipokuesa ceni ca ku tantuluka, ke ku tonda ku konka viose vi ka soloka ku lutue.—Setekesenu na Isaya 42:14.

Yehova ue ku lingisa cizango ceni ku lipuisamo. Vati evi via likuata na vuhasi vueni vua ku tantekeya via ku lutue? Isaya 46:10 ya lombolola nguayo: “[Yehova ue] ku ambulula via ku sulumuina fume ha vusangumukilo, na ku ntsenkuluila vize kanda vi soloka; nguange, zinguli ziange zi ka mana, Kaha nji ka linga cizango cange cose.”

Ngeci mukemuo, vumo vusunga vue ku lingisa Yehova ku handeka vi ka soloka ku lutue, vua pua muomu ua kala na ngolo ya ku linga viose-ovio via tonda. Ka ce ku tondeka a koke via ku lutue linga a muene vua lumo vi ka solokako amba a vi handeke, ngue muze mu tue ku koka video linga tu mone vati ya huile, houe. Vunoni ikeye a hasa ku handeka ngueni litangua lia cingandi vimo vi ka soloka, kaha a vandamena lika litangua liaco na ku vi lingisa vi soloke mpundu.—Ezu. 9:5, 6; Mat. 24:36; Vili. 17:31.

Ngeci Mbimbiliya ya pangesa mezi ngeci mua “ku ci panga,” ‘ku kana’ mu ku muesa vie ku linga Yehova ku tuala hali vimo viuma via ku lutue. (2 Vam. 19:25; Isaya 46:11) Aa mezi va a tundisa ku lizi lia ciHevelu halumo lia lomboloka “ntsongi.” (Yele. 18:4) Ntsongi a hasa ku nona vuma na ku vu panga ndeho ya cili. Na vuno vene, Yehova a hasa ku munga ni nguetu ku sungamesa viuma mu cifua ci puisamo cizango ceni.—Efe. 1:11.

Yehova ua singimika vuana vuetu vua ku lihanguila viuma. Ka sonekelele nkala muntu viuma vi ka mu solokela, houe. Kaha naua ke ku lingisa vantu va cili va linge viuma vi va kokela luvinda. Vunoni ue ku ecelela nkala muntu a linge vihangula vieni ivene, vutuhu ue ku lungula va linge vihangula via cili.

Talenu vimueso via cili. Cimueso ca ku livanga, ca vakua Ninivayi. Yehova ua polofetele ngecize mbonge yavo va ka i nongesa muomu va puile vakua vupi. Vunoni vakua Ninivayi va alulukile, ngeci Yehova “ua lialuluisile ku vupi vua tumbuile [ku] va linga; kaha ka vu lingile.” (Yona 3:1-10) Yehova ua aluluile viuma via polofetele ku tuala hali vakua Ninivayi, muomu va pangesele vuana vuavo vua ku lihanguila viuma mu ku aluluka na ku tava muzimbu ua vilungula ua va tumine Yehova.

Cimueso ca mu civali, vupolofeto vua Muangana Silu ue ku patuile vaYundeya ku vundungo linga va ka tungulule tembele ya Yehova. (Isaya 44:26–45:4) Muangana Silu ua ku Pelesia ua puisilemo vupolofeto vuaco. (Ezela 1:1-4) Silu ka puile mukua ku lemesa Yehova. Ngeci Yehova ua mu pangesele lika, vunoni ka mu kakateyele ku mu lemesa.—Visi. 21:1.

Tu na tumbula lika viuma via vindende vie ku hilula Yehova ku tuala ha ku tantekeya via ku lutue. Muomu na umo uahi, a hasa ku tantekeya mu vutuntu visinganieka na vilinga via Yehova. (Isaya 55:8, 9) Vunoni viuma via tu soluela mu Lizi lieni, vie ku kaniamesa lutsilielo luetu ngecize ke ku linga vuhenge, ambe vene ku tuala ha viuma vie ku hangula ngueni vi ka soloka ku lutue.