Biblia kiijtoua Jehová kimati tlake panos teipa (Is. 45:21). Maske kiampa kiijtoua, amo techiljuia kema kimati uan kenijkatsa kichiua, yon keski tlamantli kineki kimatis. Yeka, pampa amo tijkuamachiliaj nochi nopa tlamantli, amo uelis tikijtosej tijmatij nochi. Pero onka se keski tlamantli tlen kena tijmatij.

Maske Jehová nochi ueli kichiua kemantika mosentlalia amo kichiuas se keski tlamantli. Ya tlauel tlalnamiki, yeka ya uelis kiijtos tlen ueli tlamantli tlen panos teipa (Rom. 11:33). Pero nojkia kuali monauatia, yeka kemantika mosentlalia amo kimatis se keski tlamantli (nojkia xikita Isaías 42:14).

Jehová kichiua ma moaxiti ipakilis. ¿Kenijkatsa nopa tlamantli kipaleuia kema kiijtoua tlake panos teipa? Isaías 46:10 kiijtoua: “Na nitlayolmelajtok tlen ipejya tlake panos teipa. San na niinmechyolmelaua para uala se tlamantli kema noja aya pano, uan teipa melauak panos. Uan nochi tlamantli tlen na nikijtoua mochiuasej, melauak mochiuaj pampa na nijchiua ma pano nochi tlen nijneki”.

Uajka, Jehová ueli kiijtoua tlake panos teipa pampa ya ueli kichiua ma pano tlen kiijtoua. Ya amo kiitstiuetsi tlen panos teipa kejuak ya panotoskia. Jehová ueli kiijtoua kema panos se tlamantli ipan nopa tonali kema ya kiixtlalijtos; uan kema asi nopa tonali, kichiua ma moaxiti (Éx. 9:5, 6; Mat. 24:36; Hech. 17:31).

Yeka Jehová kiijtok se keski tlamantli tlen panoskia teipa, kitekiuik tlajtoli kej “nijtlalik” “nijchijki” uan “nijsenkajtok” (2 Rey. 19:25; Is. 46:11). Ika hebreo ni textos kitekiuiaj se tlajtoli tlen mouika ika nopa tlajtoli “sokichijketl” (Jer. 18:4). Sanse kej se chachapalchijketl ueli kichijchiua se yejyektsi komitl ika sokitl, Jehová ueli kichiua se keski tlamantli para ma moaxiti tlen mosentlalijtok (Efes. 1:11).

Jehová techkaua ma tijtlapejpenikaj tlen tijchiuasej ipan tonemilis. Ya amo kiijkuilok tlen kipanos sejse maseuali yon kichiualtia se akajya ma kichiua se tlamantli tlen kichiuas ma kitsontlamiltikaj. Ya techmachtia kenijkatsa kinamiki timonejnemiltisej uan techkaua ma tijtlapejpenikaj tlen tijchiuasej ipan tonemilis.

Ma tikitakaj ome neskayotl. Se, tlen kinpanok niniveeuanij. Ipan nopa altepetl kichiuayayaj tlen tlauel amo kuali, yeka Jehová kiijtok kintsontlamiltiskia. Pero, kema moyolkuepkej, Jehová “moyolpatlak para ayok kinasis nopa tlatsakuiltili tlen kiniljuijtoya” (Jon. 3:1-10). Jehová kipatlak tlen kiijtojtoya kichiuas. ¿Kenke? Pampa níniveeuanij kitlakakilijkej tlen kiniljuik uan moyolkuepkej.

Ome, nopa tlajtolpanextili tlen kiijtoua tlen kichiuaskia Ciro, katli kinmakixtiskia judíos uan tlanauatiskia ma kikualchijchiuakaj teokali (Is. 44:26–45:4). Nopa tlajtolpanextili moaxitik ipan tlanauatijketl Ciro, tlen altepetl Persia (Esd. 1:1-4). Ciro amo kiueyichiuayaya Jehová. Maske Jehová kitekiuik uan kiampa moaxitik nopa tlajtolpanextili. amo kichiualtik ma kitekipano (Prov. 21:1).

Tikitstokej san se keski tlamantli tlen Jehová kichiua kema kiijtoua tlen panos teipa. Tijmatij amo uelis tijkuamachilisej nochi tlen Jehová moiljuia uan kichiua, yon amo tijkuamachiliaj tlen kichiua kema kiijtoua tlen panos teipa (Is. 55:8, 9). Maske amo nochi tijkuamachiliaj, timotemachiaj Jehová nochipa kichiua tlen xitlauak kema kiijtoua tlen panos teipa.