Biblia tamachtia ke Jehová ueli kijtoua tein panos satepan (Is. 45:21). Sayoj ke amo senkis kijtoua keniuj kichiua, kemanian kichiua, nion ox kineki kimatis nochi tein mochiuas. Yejua ika amo senkis tikajsikamatij keniuj Jehová kichiua para kijtos tein panos satepan. Sayoj ke seki taman kemaj tikajsikamatij.

Jehová ueli kichiua tein yejuatsin kineki, sayoj ke kemansa kiixtalia amo kichiuas seki taman. Yejuatsin tel tamatkej uan ueli kijtoua tein yeski taman tein mochiuas satepan (Rom. 11:33). Sayoj ke kemej ueli motsakuilia, kemansa kiixtalia amo kimatis tein mochiuas (no xikonita Isaías 42:14).

Jehová kichiua maj pano tein kineki. ¿Keniuj nejin techpaleuia maj tikajsikamatikan ke ueli kijtoua tein panos? Isaías 46:10 kijtoua: “Keman peua teisa, nikijtoua keniuj tamis, uan semi achtook nikijtoua tein ayamo mochiua. Nejua nikijtoua: ‘Mochiuas tein nikijtoua, uan nikchiuas nochi tein nechyolpaktia’”.

Jehová ueli kijtoua tein panos satepan porin ueli kichiua maj mochiua teisa. Yejuatsin amo kitemoua kimatis desde achtook toni mochiuas satepan para uelis kijtos toni panoti, ijkon kemej tejuan tikchiuaj keman tiknekij tikmatiskej keniuj tami se película. Ta Jehová ueli kiixtalia maj mochiua tein kineki, uan keman ajsi tonal kichiua maj mochiua (Éx. 9:​5, 6; Mat. 24:36; Hech. 17:31).

Yejua ika, Jehová kikui tajtol “nikixtalijya” para kinextis keniuj kichiuak maj pano tein desde achtook kijtojka ke mochiuaskia (2 Rey. 19:25; Is. 46:11). Itech nejin versículos kikui se tajtol tein itech hebreo kiteajsikamatiltia keman aksa sokikonchiua (Jer. 18:4). Ijkon kemej se akin kuali sokikonchiua ueli kichijchiua ika sokit se kualtsin komit, Jehová ueli kichiua maj pano tein kineki (Efes. 1:11).

Jehová techkaua maj toselti titaixpejpenakan. Yejuatsin amo kiixtalia desde achto toni maj kipano aksa, uan amo no kinchikaujkauia akin yolkualmej maj kichiuakan teisa tein kintajyouiltis. Ta techmachtia keniuj uelis kuali tinemiskej uan satepan techkaua maj tikixpejpenakan keniuj tinemiskej.

Maj tikitakan ome taman tein kinextia nejin. Yekinika ininka titajtotij akin nemiaj Nínive. Jehová kijtojka ke kiixpoloskia nejon xolal porin kichiuayaj tein tel amo kuali. Sayoj ke kemej moyolpatakej, Dios “kipatak tein kiixtalijka kichiuas uan amo kintatsakuiltijok” (Jon. 3:​1-10). Jehová kipatak tein kijtojka ke mochiuaskia. ¿Keyej? Porin akin nemiaj Nínive kichiujkej tein Jehová kinnejmachtijka uan moyolpatakej.

Ojpatika taman yejua tein moijtojka ke kichiuaskia Ciro. Yejua kinmakixtiskia judíos uan tanauatiskia maj kiyekchijchiuakan itemplo Jehová (Is. 44:​26–45:4). Tein moijtojka kichiuak tekiuaj Ciro de Persia (Esd. 1:​1-4). Nejin tekiuaj amo kiueyichiuaya Dios. Sayoj ke Jehová kichiuak maj Ciro kichiuani tein yejuatsin achtook kijtojka, maski ijkon Jehová amo kichikaujkauij maj kiueyichiua (Prov. 21:1).

Nejin sayoj seki taman tein Jehová kichiua keman kijtoua tein panos satepan. Tein melauj, nion akin ueli kiyekajsikamati tein Jehová kinemilia uan kichiua (Is. 55:​8, 9). Maski ijkon, kemej tikixmatij Jehová tikmatij ke tein kichiua kuali yetok, hasta keman kijtoua toni panos satepan.