Biblia kiteititia Jehová uelis kijtos tlen panos satepan (Is. 45:21). Pero amo kiyekijtoua ken kichiua, keman kichiua nion kijtoua kox nochi kineki kimatis. Tejuan amo nochi tikmatij tlen kichiua Jehová para kijtos tlen panos satepan. Pero tikmatij seki tlamantli.

Jehová uelis kijtos tlen panos satepan pero ualeua amo kijtoua seki tlamantli. Jehová sapanoua ixtlamatki uan uelis kijtos nochi tlen panos satepan (Rom. 11:33). Ye kimati kuali monauatis ikinon uelis kipejpenas kox kimatis tlen panos satepan (noijki xikita Isaías 42:14).

Jehová kichiua mamochiua tlen ye kineki. ¿Ken mouika nin tlamantli iuan tlen ye kimati panos satepan? Isaías 46:10 kiyekijtoua: “Nikijtoua ken tlamis se tlamantli tlen peua uan yiuejkika nikmati tlen ayamo panoua. Ne nikijtoua: ‘Amo mopatlas tlen yonikpejpenki uan nikchiuas tlen nikneki’”.

Jehová kimati tlen panos satepan porque kipia chikaualistli para kichiuas ijkon mapano. Pero Jehová amo san kitok tlen panos satepan. Ye amo kichiua ijkon ken tejuan ijkuak tiknekij tikmatiskej ken tlami se libro. Porque tejuan moneki tiktlajtoltiskej kanin tlami para tikmatiskej ken tlami tlen tiktlajtoltijtokej. Jehová ueli kijtoua mapano seki tlamantli ijkon ken ye kijtoua uan kichiua ijkuak ajsi tonal tlen ye yokitlali (Éx. 9:​5, 6; Mat. 24:36; Hech. 17:31).

Ikinon Jehová okijto tlajtolmej “onikyektlali”, “onikchijchi” uan “yonikijto” para kijtos seki tlamantli tlen panos satepan (2 Rey. 19:25; nota; Is. 46:11). Ninmej versículos ika hebreo mouikaj iuan tlajtoli “akin kinchiua konmej” (Jer. 18:4). Akin kinchiua konmej uelis kiyektlalis sokitl para kichiuas se kualtsin komitl. Jehová noijki uelis itlaj kichiuas para mamochiua tlen ye kineki (Efes. 1:11).

Jehová techkauilia matikpejpenakan tlen tikchiuaskej. Ye amo kijtoua tlen techpanos satepan nion kinmiluia akinmej yolkualmej itlaj makichiuakan tlen uelis kichiuas maixpoliuikan. Jehová techmachtia ken uelis okachi kuali tiyetoskej uan satepan tejuan tikpejpenaj tlen tikchiuaskej.

Matikitakan ome tlamantli tlen yiuejkika opanok. Achto matikitakan tlen okinpanok akinmej ochantiayaj altepetl Nínive. Yejuan okichiuayaj tlen amo kuali ikinon Jehová okijto kinmixpoloskia. Pero yejuan omoyolkopkej uan toTajtsin Dios “oksepa omokuayejyeko itech tlajyouilistli tlen okijto kinchiuiliskia uan ayakmo itlaj okinchiuili” (Jon. 3:​1-10). Jehová ayakmo okichi tlen yokijtojka. ¿Tleka? Porque akinmej ochantiayaj Nínive omoyolkopkej ijkuak okimatkej tlen kichiuaskia Jehová.

Axkan matikitakan tlen omoijto kichiuaskia Ciro. Ye kinmakixtiskia judíos uan tlanauatiskia makiyektlalikan itemplo Jehová (Is. 44:​26–45:4). Tlen omoijto okichi tekiua Ciro tlen otlanauatiaya Persia (Esd. 1:​1-4). Pero Ciro amo okiueyichiuaya toTajtsin Dios. Jehová okikauili makichiua tlen kijtoua profecía pero amo okinauati makitekichiuili (Prov. 21:1).

Onka miak tlamantli tlen amo tikmatij. Tejuan amo nochi tikajsikamatij tlen mokuayejyekoua Jehová, tlen kichiua nion tikmatij ken kimati tlen panos satepan (Is. 55:​8, 9). Pero tejuan tikixmatij Jehová uan tikneltokaj nochipa kichiua tlen kuali uan noijki ijkuak kijtoua tlen panos satepan.