▪ Bhaibheri rinonasa kujekesa kuti Jehovha anokwanisa kunanga zvokumbeji. (Isaia 45:21) Asi irona arisananguri zvese zvinobatanijwa ngo pamusoro pokuti kuitisa kudini kana ndirini paanozozviita kana paanozokheta kuzviita. Ngo kudaro atina manera o kuziva zvese ngo pamusoro pokuti ngenyi Jehovha anonanga zvokumbeji. Asi ngo pamusoro po zviro zvimweni itusu tingakwanisa kuva no cokwadi.

Jehovha anokwanisa kuita zvese zvaanoda asi mukuvo umweni iyena angakheta kutama kuita zvimweni. Ngokuva kwake no uzivi ucina paunogumira iyena angananga zviri zvese zvaangada. (Varoma 11:33) Asi Jehovha angasana kutama kuda kuziva zvinozoitika, ngokuti iyena anokwanisa kuita zviro ngo njira yakakwana.—Ezanisani na Isaia 42:14.

Jehovha anogondesa kuti kuda kwake mukuvo wese kunozokwanirisika. Izvi zvinozwirana papi no cikwaniriso cake cokunanga zvicazoitika kumbeji? Isaia 46:10 inoti: “Kuvhira pakutanga ndinozivisa zviro zvinozoitika pakupejisira, Kuvhira kare no kare ndinozivisa zviro zvicito zvaithwa. Ndinoti: ‘Zvandakasunga, zvinozogara zvakaima, Ndinozoita zvese zvandinoda.”

Thangwe rinoitisa kuti Jehovha akwanise kunanga zvicazoitika kumbeji ngo rokuti iyena ano simba rokuita kuti zviro zviitike. Iyena aatodikani kuneseka ngokuda kuziva zvokumbeji inga zviro zvakamboitika kana zvakaezana no pheji yokupejisira yo bhuku riri rese rokuti mundhu anoverenga kuitira kuziva mugumo wazvo. Kusiyapo zvondhozvo, Jehovha angatema civaringo kuti ciro caanoda ciitike pa nguva yaanoda. Iyena anosotesesazve kuti zviro zviitikedi pa nguva yaakagaja.—Exodo 9:​5, 6; Mateu 24:36; Mabasa o Vapostori 17:31.

Ndiyo ndava Bhaibheri rinoshandisa magama akadari inga “ndanasirira,” “ndakazivisa,” “ndakagaja” kuitira kusanangura zvinoithwa ndi Jehovha mukuzwirana no zvinozoitika kumbeji. (2 Majimambo 19:25; Isaia 46:11) Magama aya akasandujwa ku ndumi imwe basi akabatana no gama rokuti ‘mafuta.’ (Jeremia 18:4) Kudari inga mafuta angacinja dongo kuita mbende yakaseja, Jehovha angacinja kana kuita zviri zvese kuti aite kuda kwake.—Vaefeso 1:11.

Jehovha wakapa umwe nga umwe wedu rusujunuko, iyena anoreremeja zvondhozvo. Iyena aatemeri mundhu civaringo, nee iyena aaiti kuti vandhu vakanaka vaite zviro zvinovakhuvaza nee kuvaitisa zviro zvinozovaita kuti vazoparajwe. Iyena anotendera kuti mundhu umwe nga umwe akhete gwanja rake zvokuti iyena anovhunja vandhu kuti vatevere gwanja rakarungama.

Vonanyi muezaniso jo vandhu vaigara ku Ninivhi. Jehovha wakananga kuti dhorobha iri raizoparajwa ngo ndava yo ushati hwaro. Asi vandhu vakondhoyo pavakakhauya “iyena wakacinja murangariro, wotama kuvaviisira ndambujiko raainga akananga kuti waizovaviisira. Iyena aazivi kuzoriviisa.” (Jona 3:​1-10) Jehovha wakacinja zvaainga akananga kuti waizozviita ku Vaninivhi, ivona vakashandisa rusujunuko hwavo ngo kudavira ushoni masoko a Jona. Ivona vakakhauya ngo kudaro avazivi kuparajwa.

Muezaniso umweni ngo wo ciporofita ngo pamusoro po mutungamiriri Siro, uwo waizosujunura Vajudha ku uranda no kuvavhunja kuti vaende kovakisa themberi ya Jehovha. (Isaia 44:26–45:4) Mambo Siro wo ku Persiya, wakakwanirisa ciporofita ici. (Esdra 1:​1-4) Jehovha wakashandisa Siro kuti akwanirise ciporofita acizivi kuvangirija Siro kuti amunamate kana kuti Siro wainga no rusujunuko wo kutema zvivaringo zvake no kukheta kuti ngowapi waaida kunamata.—Mazwi Akangwara 21:1.

Zvakajeka kuti kuno mathangwe akawanda pa cikwaniriso ca Jehovha cokuziva zvinozoitika kumbejiyo. Kunasa kunanga, zvokadi apana no mundhu na umwe angakwanisa kuzwisisa mukuperera makwanja a Jehovha kana kuti kuziva manera aanorangarira no zvaanoita. (Isaia 55:​8, 9) Asi zvese zvaapera kutivhunja Jehovha zvingavangisa rutendo hwedu pakuti iyena mukuvo wese anoita zvakarungama kubatanija paanonanga ngo pamusoro po kumbeji.