Ombiimbeli oya yelitha kutya Jehova ota vulu okuhunganeka kombinga yonakuyiwa. (Jes. 45:21) Ihe inayi gandja uuyelele awuhe kutya ohe shi ningi ngiini, nenge uunake he shi ningi, nenge nokuli kutya uuyelele wu thike peni a hogolola okutseya. Onkee ano itatu vulu okuuva ko kehe shimwe kombinga yokuvula kwaJehova okutseya onakuyiwa. Ihe opu na iinima yontumba mbyoka tatu vulu okuuva ko.

Jehova oha vulu okuninga kehe shimwe, ihe omathimbo gamwe oha tokola kaa ninge iinima yontumba. Ota vulu okulongitha uunongo we inaawu ngambekwa, a ninge shoka a tokola okuninga. (Rom. 11:33) Ihe molwaashoka oha ipangele momukalo gwa gwanenena, ota vulu wo a tokole okukala kee shi shoka tashi ka ningwa po. — Yelekanitha Jesaja 42:14.

Jehova ota vulu okuningitha ehalo lye li longwe. Shoka otashi vulu ngiini oku tu kwathela tu uve ko okuvula kwe okutseya onakuyiwa? Jesaja 46:10 okwa ti: “Okuza kontsapo onda hunganeke mbyoka tayi ya; onalenale nda popi mbyoka tayi ka ningwa. Onda tile, omadhiladhilo gandje itaga ka gwila pevi, notii ka gwanitha ashihe nda hala oku shi ninga.”

Ano etompelo limwe kutya omolwashike Jehova ha vulu okutseya onakuyiwa, olyo kutya oku na oonkondo dhokuninga iinima. Ina pumbwa okumona kutya oshike tashi ka ningwa monakuyiwa ngaashi aantu mboka omathimbo gamwe haya tala okamuvi kehulilo, opo ya tseye kutya ota ka popi kombinga yashike, ano iha kala a fa e wete iiningwanima yomonakuyiwa ya fa ya ningwa nale noku yi talulula manga kuyele. Ihe pehala lyaashono, Jehova ota vulu okutokola kutya oshinima shontumba otashi ka ningwa pethimbo lini noku shi ningitha shi ningwe ethimbo ndyono ngele lya thiki. — Eks. 9:5, 6; Mat. 24:36; Iil. 17:31.

Omolwetompelo ndyoka, Ombiimbeli oya longitha iitya ngaashi “gwanitha” nosho wo “dhiladhila,” yi hokolole shoka Jehova ha ningi shi na ko nasha niiningwanima yimwe yomonakuyiwa. (2 Aak. 19:25; Jes. 46:11) Iitya mbyoka oya tolokwa okuza koshitya shOshihebeli shoka sha pambathana noshitya tashi ti “omuhongi gwiiyuma.” (Jer. 18:2-4) Ngaashi owala omuhongi gwiiyuma onkulungu ha vulu okuma eloya, a honge oshiyuma oshiwanawa, Jehova oha vulu okuma, nenge okuukitha iinima, opo a gwanithe po ehalo lye. — Ef. 1:11.

Jehova okwa simaneka omagano getu gokuninga omatokolo. Ina sheya shoka tashi ka ningwa mokukalamwenyo yakehe gumwe, noiha ningitha aantu aawanawa ya ninge sha oshiwinayi, opo ya ka hanagulwe. Oha etha aantu ayehe ya ninge omatokolo gawo yene, nohe ya ladhipike ya ninge omatokolo gomondjila.

Tala kiiholelwa iyali. Shotango oshi na ko nasha nAaninive. Jehova okwa li a hunganeke kutya Ninive otashi ka hanagulwa po omolwuukolokoshi washo. Ihe sho Aaninive ya itedhulula, “okwi igaluluka noine ya geela, ngaashi a tile.” (Jona 3:1-10) Jehova okwa lundulula edhiladhilo lye li na ko nasha naashoka a li a hunganeka, oshoka Aaninive oya longitha emanguluko lyawo lyokuninga omatokolo, sho e ya tumine etumwalaka lyelondodho.

Oshiholelwa oshitiyali oshi na ko nasha nomulumentu gwedhina Kores, ngoka a li ta ka mangulula Aajuda muupongekwa, noku ya lombwela ya ka tungulule otempeli yaJehova. (Jes. 44:26–45:4) Omukwaniilwa gwaPersia, Kores, oye a li a gwanitha ehunganeko ndyoka. (Esra 1:1-4) Ihe Kores ka li ha longele Kalunga kashili. Jehova okwa li a longitha Kores okugwanitha ehunganeko ndyoka, nokaapu na oku mu thininika e mu longele. — Omayel. 21:1.

Odhoshili kutya mbika iinima owala yimwe mbyoka Jehova ha tala kuyo, uuna ta hunganeke onakuyiwa. Uushili owo kutya kapu na omuntu ta vulu okuuva ko lela omukalo moka Jehova ha ningi iinima. (Jes. 55:8, 9) Ihe shoka tu shi kombinga yaJehova, otashi koleke eitaalo lyetu kutya oha ningi aluhe shoka sha uka, nuuna ta hunganeke kombinga yonakuyiwa.