Piipiliya onnaloca mookwakwaleya wi Yehova onanwerya oloherya sa omwaahiyu. (Yes. 45:21) Nyenya owo hanathariha mikhalelo soothene vooloca sa ti mwawiihai Yehova oneereiyeno yeeyo naari ti liini owo onachuneiye osuwela. Mwawiihiiha, hinaanono mukhalelo woothene wa osuwela vooloca sa mavyakelo a Yehova a oloherya sa omwaahiyu. Nyenya sookhalavo ichu ikina seiyo nnasuwelaahu.

Yehova onanwerya opaka soothene seiyo onachuneiye, nyenya ikwaha ikina owo onnathanla ohipaka ichu ikina. Wa nthowa na okhalano osuwela woohikota, owo onanwerya oloherya echu vyakala yeeyo owo onachuneiye. (Aro. 11:33) Woona wi Yehova onniivareryela moophaameya, owo onanwerya othanla ohisuwela yeeyo enahaala weereya.—Mulikanyihe ni Yesaya 42:14.

Yehova onneeriha wi yookhwelaawe yeereye. Ti mwawiihai eyo eniiwananaaya ni mavyakelo a oloherya sa omwaahiyu? Yesaya 46:10, PMM onnathariha: “Opacerya khalayi, kinalokoha makuchuwelo; kinathoriherya ichu seiyo ihaakunve weereya. Kinii: ‘Sawuupuwelela saka, chiri kinamukhwaaniherya. Soothene kinachunaaka kinamweerano.’”

Nthowa nimoha nnamweeriha Yehova oloherya sa omwaahiyu ti yawi owo ookhalano owerya wa weeriha ichu wi seereye. Wa Yene tahi woochuneya woona yeeyo enahaala weereya omwaahiyu—ntoko wi ichu soheereya, eri ntoko epaaxina yookuchula ya liivuru yeeyo muchu onaalakhanyeiye achunaka osuwela makuchuwelo aya. Moohiyana ni yeeyo, Yehova onanwerya olakelela wi echu ekina enahaala weereya mu elukuluku yeeyo owo onachuneiye nave owo onnaroromela wi eyo enamweereya chiri mu elukuluku yoophwanelela.—Muk. 9:5, 6; Mat. 24:36; Saw. 17:31.

Ti nthowa nene Piipiliya onaphariheleiye masu ntoko ala: ‘Koorehererya,’ ‘koopaka,’ ni ‘kootikitherya’ wi atharihe yeeyo Yehova onapakeiye wa yeeyo enahaala weereya omwaahiyu. (2 Mam. 19:25; Yes. 46:11) Masu yaala ataphuleliwe orweela wa masu oopacerya yaawo aniiwanana ni masu mamoha awi “mulipa awuupa.” (Yer. 18:4, PMM) Hiiha ntoko mulipa awuupa amavyakelo onarehereryeiye oloko wi apakeno mwaapu wooreera, Yehova tho onanwerya orehererya, naari weeriha ichu wi aakhwaniherye yookhwela awe.—Aef. 1:11.

Yehova oomvaha mmoha ti mmoha othanla wootaphuwa nave owo onnacicimiha yeeyo. Owo hanatikitherya makuchuwelo a muchu ti muchu; naari mano haneeriha wi achu oororomeleya epake echu yeeyo yaahaala waakumiherya makacamiho. Owo onneemererya wi mmoha ti mmoha athanleke ephiro yeeyo onachuneiye ochara, nave ophiyerya wi owo onnaacenyerya achu wi echare ephiro yeeparipari.

Muthokororye sootakiherya piili. Yootakiherya yoopacerya enaavolowela achu yaakhala o Ninevi. Yehova aahiloherya wi aahaala otoloxa epooma nthowa na soonanara saya. Nyenya vaavaa achu o Ninevi yaacharunwaaya, Yehova “aalapelela murima awe, ahaahosha ntoko aalocenleiye.” (Yona 3:1-10, PMM) Yehova aahitoroka yoolakelela awe vooloca sa yeeyo aalohenryeiye nthowa nawi a Ninevi yaahipharihela othanla waya wootaphuwa nave yaakhulela phaama michaka sa Yona, awo tho yaahicharuwa ni ehitoloxiwa.

Yootakiherya yanaawiili ti yooloherya vooloca sa Mwene awiichaniwa Siru, yoowo aahaala owoopola Ayuta wookapuroni ni olamulela otekiwa wanaawiili Empa ya Muluku. (Yes. 44:26–45:4) Mwene Siru o Persiya aahaakhwaniherya yooloherya yeela. (Estr. 1:1-4) Mwawiihiiha, Siru haamulapela Muluku eeparipari. Yehova aahimpharihela Siru wi aakhwaniherye sooloherya sawe ahimukhinyerenrye wi amulapeleke, naari wi Siru aakhalano othanla wootaphuwa wa opaka soolakelela sawe ni othanla taani aachuneiye omulapelaka.—Mas. 21:1.

Pahiru iha ichu ikina seiho Yehova onathokororyeiye vaavaa onalohereiye sa omwaahiyu. Mweeparipari, haavo muchu onawerya wiiwexexa moomalela iphiro sa Yehova, naari wi mukhalelo owo onuupuweleiye ni yeeyo owo oneereiye. (Yes. 55:8, 9) Mwawiihiiha, soothene seiyo Yehova uupulunleiye wa hiyaano sinnalipiha nroromelo nahu wi owo ilukuluku soothene onapaka yeeyo eri yaphaama—ophitaanyerya vaavaa owo onaloheryeiye sa omwaahiyu.