Biblia kijtoua ika Jehová ueli kita tlenon panos ika tlayekapan (Is. 45:21). San ika, xkijtoua kenijki kichiua, kemanon ijkon kichiua noso tla nochi kita tlenon nochiuas. Tejuamej xnochi tikmatij kenijki kichiua Jehová ijkuak kita tlenon panos ika tlayekapan. San ika, onka seki tlemach tlen kema tikmatstokej.

Kemantika Jehová kitlapejpenia xkichiuas itlaj maski yejua ueli nochi kichiua. Jehová melak tlamachilise, yejua ika, ueli kijtoua tlenon panos ika tlayekapan (Rom. 11:33). San ika, yejua ueli san iselti noteltia, ika yejon, uelis kitlapejpenis tla xkitas tlenon panos ika tlayekapan (uelis tikitas Isaías 42:14).

Jehová kichiua manochiua tlen yejua kineki. ¿Niman yejon kenijki techpaleuiya matikasikamatikan kenijki kimati Jehová tlenon panos ika tlayekapan? Isaías 46:10 kijtoua: “Nejua niktemachistia desde antes tlinon nochiuas; nikijtoua tlinon nochiuas sakin. Nejua nikijtoua: Nochi tlinon yonikijtoj nikchiuas, nicumpliros. Nejua nikchiuas nochi tlinon yonikijtoj”.

Kemantika Jehová kimati tlenon panos ika tlayekapan pampa yejua kipiya kojtilistli para kichiuas ijkon mapano. Ueliskia tiknemiliskej ika Jehová kita tlenon panoua ika tlayekapan ijkon ken yakaj akin kita se película niman kipachouilia kampa ontlami película san para kitstiuetsis tlenon panos. San ika, tla ijkon yeskia, kentla tikijtoskiaj ika yakaj yokinemili niman yokijto tlenon nochiuas, san ika, xijkon panoua. Jehová kimati tlenon panos pampa kemantika yejua kijtoua tlenon kineki manochiua, niman kichiua tlen noneki para ijkon mapano (Éx. 9:​5, 6; Mat. 24:36; Hech. 17:31).

Kemantika Jehová okichiuj seki tlemach niman ijkon itlaj mapano, ika yejon, miyekpa tikitaj ipan Biblia ika Jehová ijkin okijto: “Yeuejkaui yoniknemilijka nikchiuas” (2 Rey. 19:25; Is. 46:11). Ipan yejuin tlaxeloltin ika hebreo, uajnestiuj se tlajtojli tlen noijki notekitiltia ijkuak noteneua se konchiujketl (Jer. 18:4). Ijkon ken se konchiujketl ueli kikui sokitl para kichijchiuas se kualtsin kontli, Jehová noijki ueli kichiua tlen noneki para manochiua tlen yejua kineki (Efes. 1:11).

Jehová techkauilia matiktlapejpenikan tlenon tikchiuaskej. Jehová xkintlapejpenilia tlaltikpakchanejkej tlen inpan nochiuas. Noijki xkinchiualtia makichiuakan tlen kichiuas maka kuajli makisatij. Yejua techmachtia kenijki kuajli tinemiskej niman techkauilia tejuamej matiktlapejpenikan tla tikchiuaskej tlen techijlia.

Matikitakan tlen yeuejkaui opanok. Kachtopa matitlajtokan intech ninivitas. Yejuamej kichiuayaj tlen melak xkuajli niman Jehová okijto ika kipopoloskia kalpan Nínive. San ika, Jehová onoyolpatlak niman okijto ika xok kinpopoloskia (Jon. 3:​1-10). ¿Tleka Jehová onoyolpatlak? Pampa akin chantiyaj Nínive okikakkej niman onoyolkuepkej.

Aman matitlajtokan itech Ciro. Ipan Biblia yonoijtojka ika Ciro kinoyaxkatiskia se kalpan niman kinmakixtiskia judíos. Noijki yonoijtojka ika yejua tlanauatiskia manoyektlali iteopan Jehová (Is. 44:​26–45:4). Yejuin teotlajtojli onochiuj niman nochi tlen yonoijtojka okichiuj tekiuaj Ciro de Persia (Esd. 1:​1-4). Ciro xkitekichiuiliaya Jehová, maski ijkon, Jehová okitekitilti para kichiuas tlen yejua kinekiya, san ika, xokichiualti makitekichiuili (Prov. 21:1).

San seki yotikitakej kenijki Jehová kichiua ijkuak kita tlenon panos ika tlayekapan. San ika, tejuamej xkeman uelis kuajli tikasikamatiskej kenijki tlanemilia Jehová noso kenijki kichiua ijkuak kita tlenon panos ika tlayekapan (Is. 55:​8, 9). San ika, kema tikmatstokej ika Jehová nochipa kichiua tlen kuajli hasta ijkuak kita tlenon panos ika tlayekapan.