Itutunö Sura Niʼamoniʼö wa tola ifaʼeleʼö Yehowa hadia zalua ba zi so miföna. (Yes. 45:21) Hizaʼi, lö itutunö khöda sanandrösa ba lala mazui inötö wamaluania daʼö hegöi hawaʼoya niʼilania. Börö daʼö, lö taʼila fefu sanandrösa ba waʼabölö niʼokhögö Yehowa ba wangiʼila salua ba zi so miföna. Hewaʼae simanö, so zi tola aboto ba dödöda. Datatutunö.

Tola ifalua Yehowa fefu hadia ia, hizaʼi itaria ifili lö ifalua daʼö. Lö ola waʼatua-tua Yehowa, ba tola iʼogunaʼö daʼö ba wangiʼila fefu hadia zomasi ia. (Rom. 11:33) Hizaʼi, börö me moʼahonoa wanaha tödö niʼokhögönia, tola ifili enaʼö lö iʼila hadia zalua.—Faigi göi Yesaya 42:14.

Iʼalui lala Yehowa enaʼö alua gohitö dödönia. Hewisa wa möi fanoloda daʼa enaʼö aboto ba dödöda waʼabölö Yehowa ba wamaʼeleʼö salua ba zi so miföna? Imane ba Yesaya 46:10, ”No iʼotarai ba wamobörö ufatunö lua-luania, ba iʼotarai me mböröta no uʼombakhaʼö ngawalö hadia zi lö nasa alua. Umane, ’Hasambalö alua gohitö dödögu, ba hasambalö ufalua gofu hadia ia zomasido.’”

Tobali, sambua dane-dane wa tola iʼila Yehowa hadia zalua ba zi so miföna yaʼia daʼö börö me so khönia waʼabölö ba wamalua hadia ia. Tola tawaʼö wa lö moguna iʼila hadia zedöna alua ba zi so miföna, simane si toʼölö tafalua na omasi ita taʼila gafuriata moroi ba zi sambua film. Tola ihalö samösa gangetula Yehowa ba wotatugöi hawaʼara ifalua zi sambua ngawalö, ba ifalua daʼö moloʼö inötö si no itatugöi.—2 Mo. 9:5, 6; Mat. 24:36; Hal. 17:31.

Börö daʼö, ba Zura Niʼamoniʼö iʼogunaʼö ngawua wehede ”no ufaʼanö”, ”uʼera-era” hegöi ’ohitö dödö’ ba wanutunö hadia nifalua Yehowa ba ngawalö zalua ba zi so miföna. (2 Ra. 19:25, nis.; Yes. 46:11) Ngawua wehede daʼa ba li sindruhunia moʼamakhaita ia ba wehede ’samöbözi tambu laʼuri’. (Yer. 18:3, 4) Tuka samöbözi tambu laʼuri sonekhe, tola ifazökhi vas bunga moroi ba dambu laʼuri sombuyu. Simane daʼö göi, tola ifazökhi mazui iʼalui lala Yehowa enaʼö aʼozu gohitö dödönia.—Ef. 1:11.

Itehegö Yehowa ba niha ba wangai angetula. Lö nitatugöi Lowalangi lala waʼauri zi samösa niha. Tenga göi yaʼia mbörö wa lahalö gangetula si lö sökhi niha satulö tödö irege tefakao waʼaurira. Itehegö ba niha enaʼö lafili samösa hewisa lala waʼauri somasi ira, hizaʼi lö tebulö ifahaʼö ira hewisa enaʼö sökhi lala waʼaurira.

Nehegö zi dombua duma-duma andre. Duma- duma si oföna yaʼia daʼö niha Niniwe. Iwaʼö Yehowa wa hasambalö mududugö mbanua daʼö börö waʼalösökhira. Hizaʼi, börö me lafalalini gera-erara, ”ibulöʼö göi wangera-ngerania [Yehowa] ba wamakao si no iwaʼö, ba lö aʼozu ifalua daʼö khöra”. (Yon. 3:1-10) Ibulöʼö gangetulania Yehowa börö me lafili ira niha Niniwe ba wamalalini era-erara me no latema wamangelama moroi khö Yehowa.

Duma-duma si dua yaʼia daʼö famaʼeleʼö sanandrösa khö zi samösa niha sabölö sotöi Kiro, sangefaʼö niha Yahudi moroi ba Mbabilona enaʼö tola lafazökhi mangawuli gosali Yehowa. (Yes. 44:26–45:4) Ifalua zi no tefaʼeleʼö andrö Razo Kiro moroi ba Weresia. (Esr. 1:1-4) Kiro, tenga samosumange Lowalangi sindruhu. Iʼogunaʼö Kiro andrö Yehowa ba wamalua ohitö dödönia, hizaʼi lö ifaso Giro ba wamosumange yaʼia.—Amd. 21:1.

Tatu manö, ha maʼifu daʼa moroi ba ngawalö niʼangeragö Yehowa ba ginötö itutunö khöda hadia zalua ba zi so miföna. Sindruhunia, lö hadöi niha si tola mangila fefu nifalua hegöi niʼera-era Yehowa. (Yes. 55:8, 9) Hizaʼi, faʼaboto ba dödö niʼilada sanandrösa khö Yehowa, möi fangaʼaroʼö wamatida wa lö tebulö ifalua zatulö, farahu ba daʼö na ifaʼeleʼö zalua ba zi so miföna.