EBiblia yikabugha ndeke-ndeke ngoko Yehova awite obutoki obw’eriminya emyatsi y’omo biro ebikendisyasa. (Isa. 45:21) Aliwe, eBiblia siyiribugha oMungu ng’akakola ekyo ky’ati kandi mughulu wahi. Nibya siyiribugha esyongendo esyo akasombola eriminya emyatsi eyikendisyasa. Busana n’ekyo, sitwangaminya emyatsi yosi oko butoki bwa Yehova obw’eriminya emyatsi eyikendisyasa. Aliwe, hane emyatsi milebe eyo twasi oko mwatsi oyo.

Yehova anawite obutoki bw’erikola ekyosi-kyosi ekyo anzire erikola. Aliwe, akasombola ebyo akendikola. (Rom. 11:33) Yehova anganakolesya obwenge bwiwe obute n’omupaka eribugha emyatsi eyikendisyasa eyanzire. Kundi eriyikakirya liwe lihika-hikene, kandi anganasombola eritendiminya ebikendisyasa.​—Tasyalebya na Isaya 42:14.

Yehova akaberereraya erisonda liwe. Neryo, ekyo kikatuwatikaya kiti eriminya ndeke obutoki bwiwe obw’eriminya emyatsi eyikendisyasa? Isaya 46:10 yikakanganaya ekyo. Yikabugha yitya oko Yehova: Ngatula “ebyʼenduli inandi oko nzuko, nʼeritsuka oko migulu ya kera eritula emyatsi eyite yakolwa. Nyiti, eriyisunza lyage lyasyahangana, kandi nasyaberererya ebyosi ebikanyitsemesaya.’”

Eky’erimbere ekikaleka Yehova inyabya n’obutoki bw’eriminya emyatsi eyikendisyasa, ni kusangwa awite obutoki bunene obw’erileka emyatsi iyabya. Emyatsi eyikendisyahuluka omo biro ebikendisyasa, siyiri ng’efilme eyabirisatwa, neryo Yehova inyabya akalebyayo ngoko omundu akalabaya ebitsweka by’efilme akasonda erilebya aho anzire erilangira. Yehova iye syalikola atya atoke eriminya emyatsi eyikendisyasa. Omo mwanya w’ekyo, Yehova anganayisogha ati omwatsi mulebe akendikoleka oko ndambi nyilebe kandi inyasondola emwatsi kusudi omwatsi oyo akoleke.​—Eril. 9:5, 6; Mat. 24:36; Emib. 17:31.

Okw’ekyo, yikakania oko myatsi eyo Yehova akendisyakola, eBiblia yikakolesaya ebinywa nga “monayisunzakyo,” n’ebinywa “nabirikikandayirira.” (2 Abam. 19:25; Isa. 46:11) Ebinywa ebyo bikabindulawa erilua omo kinywa ky’Ekiebrania ekikasonda eribugha kiti “omubumbi.” (Yer. 18:4) Ngoko omubumbi, oyuwasi ndeke omubiiri wiwe, anganakokotya akanyungu akuwene erilua omo ribumba, Yehova naye, anganakokotya emyatsi kutse inyasondolayo yitoke eriberererya erisonda liwe.​—Efe. 1:11.

Yehova abiriha abandu obwiranda bw’eriyisombolera kandi akasikaya obwiranda obo. Syalipangira omundu y’embere emyatsi eyikendisyamuhikira. Kandi syalikuna abandu abali n’omutima oghuwene erikola emyatsi eyikendisyaleka ibatoghotibwa. Akalekera obuli mundu obwiranda bw’eriyisogha ng’akendiyiwata ati, aliwe akatukangiriraya enzira eyuwene ey’erikwama.

Eby’erileberyako bibiri bya bino: Eky’erimbere ky’eky’abandu be Ninawi. Yehova mwayisogha eritoghotya omuyi wabo busana n’emighendere yabo mibi. Aliwe, abandu be Ninawi babere bayisubako, Yehova naye “mwayisubako oko kibi ekyo abuga ati akandikolabo; mwatakolakyo.” (Yona 3:1-10) Yehova mwayisogha erimbindula amalengekania kundi abandu be Ninawi mubakolesya obwiranda bwabo bw’eriyisombolera bo ndeke bakahulikirira omulaghe ogho Yehova atumirabo.

Eky’erileberyako ky’akabiri b’obuminyereri obulebirye oyo endilusya Abayahudi omo bunyewa n’eritwalabo ewabo bayahimbe buhya ehekalu ya Yehova. (Isa. 44:26–45:4) Obuminyereri obo mubwabererera oko Mwami Kiro. (Ezra 1:1-4) Aliwe, Kiro isyaliramaya oMungu w’ekwenene. Yehova mwakolesya Kiro eriberererya obuminyereri obo, aliwe nomo bine, mwamulekera obwiranda bwiwe obw’erisombola ng’akendiramyandi.​—Misyo 21:1.

Twamabikania oko myatsi milebe misa eyikasondola Yehova omughulu akakolesaya obutoki bwiwe obw’eriminya emyatsi eyikendisyasa. Oko kwenene, sihali omundu oyo wangaminya ebyosi ebyo Yehova akalengekanaya n’erikola. (Isa. 55:8, 9) Ebyo twasi oko Yehova bikaleka itwikirirya kwenene-kwenene ngoko mughulu wosi, Yehova akakola ebitunganene nibya n’omughulu akakolesaya obutoki bwiwe obw’eriminya emyatsi eyikendisyasa.