IBhayibheli likwenza kukhanye ukuthi uJehova uyakghona ukubikezela okuzokwenzeka ngengomuso. (Isa. 45:21) Nanyana kunjalo, alivezi yoke imininingwana malungana nokuthi ukwenza njani namkha nini lokho nokuthi kunengi kangangani akhetha ukukwazi. Yeke angekhe sazi koke malungana nekghono lakaJehova lokwazi ngengomuso. Nanyana kunjalo, akhesikhulume ngamaphuzu ambalwa.

UJehova angenza nanyana yini afuna ukuyenza kodwana ngezinye iinkhathi ukhetha ukungayenzi. UJehova angasebenzisa ukuhlakanipha kwakhe okungapheliko ukukhetha bona khuyini akhetha ukubikezela ngayo. (Rom. 11:33) Ngebanga lokuthi uyakghona ukuzibamba, angakhetha nokuthi angazi bona kuzokwenzekani.—Madanisa no-Isaya 42:14.

UJehova ubangela ukuthi intandwakhe yenzeke. Lokhu kusisiza njani sizwisise ikghono lakhe lokubikezela ngengomuso? U-Isaya 46:10 uyahlathulula: “Ngibikezela izinto ezisazokwenzeka kusukela ekuthomeni, nezinto ezingakenzeki kusukela kade. Ngithi, ‘Isiqunto sami sizokujama begodu ngizokwenza nanyana yini engithabisako.’”

Elinye ibanga elenza uJehova abikezele ngengomuso kukuthi unamandla wokwenza izinto zenzeke. UJehova akutlhogeki ukuthi afumane bona kuzokwenzekani ngengomuso, njengathi abantu nasibukela imuvi, ngezinye iinkhathi sifuna ukuyisa phambili sibone ukuthi kuzokwenzakalani ekugcineni. Kunalokho, uJehova uyaqunta ukuthi into ethileko izokwenzeka ngesikhathi asibekileko bese kuthi isikhatheso nasifika yenzeke.—Eks. 9:​5, 6; Mat. 24:36; IzE. 17:31.

Kungebangeli, iBhayibheli lisebenzisa amabizo anjengala “ngakulungiselela,” “kwenzeke,” nelithi “ngikuhlosile” ukuhlathula ukuthi khuyini uJehova ayenzako malungana nezenzakalo ezisezako. (2 Kho. 19:25; Isa. 46:11) Amabizo la ihlathululo yawo ihlobene nebizo elithi, “umbumbi.” (Jor. 18:4) Njengalokha umbumbi onekghono akghona ukubumba isitja esihle, uJehova uyakghona ukubumba namkha ukwenza into ethileko bona izalise intandwakhe.—Efe. 1:11.

UJehova uvumela abantu bazenzele iinqunto zabo. Akahleli ukuthi ukuphila komuntu kuzokuba njani. Abe akabangeli abantu abalungileko bona benze izinto ezingabasa ekubhujisweni. Uvumela woke umuntu akhethe indlela afuna ukuphila ngayo kodwana uyasifundisa ukuthi kufuze siphile njani ngendlela elungileko.

Cabanga ngeembonelo ezimbili. Sokuthoma sihlanganisa abantu ebebahlala eNiniva. UJehova wabikezela ukuthi idorobheli lizokutjhatjalaliswa ngebanga lokukhohlakala kwalo. Kodwana lokha abantu abahlala lapho nabatjhuguluka, uJehova “wazisola ngehlekelele athi uzobalethela yona, akhenge asayiletha.” (Jona 3:​1-10) UJehova watjhugulula umkhumbulwakhe malungana nalokho akubikezela ngabantu beNiniva ngombana baqunta ukutjhuguluka ngemva kobana bezwe isiyeleliso sakaJehova.

Isibonelo sesibili siphorofido ngoKoretjhi, owatjhaphulula amaJuda ekuthunjweni begodu wayala ukuthi kuvuselelwe ithempeli lakaJehova. (Isa. 44:26–45:4) IKosi yePheresiya uKoretjhi yazalisa isiphorofidweso. (Ezr. 1:​1-4) Nanyana kunjalo, uKoretjhi bekangalotjhi uZimu. UJehova wasebenzisa uKoretjhi ukuzalisa isiphorofido sakhe ngaphandle kokumkatelela ukuthi amlotjhe.—IzA. 21:1.

Kuliqiniso, lezi akusizizinto ezimbalwa kwaphela uJehova azicabangelako nakazokubikezela ngengomuso. Eqinisweni, akunamuntu ongazwisisa indlela uJehova acabanga nenza ngayo izinto. (Isa. 55:​8, 9) Nanyana kunjalo, lokho uJehova asivezele khona kuqinisa ukukholwa kwethu ukuthi ngaso soke isikhathi wenza okulungileko kuhlangise nangalokho akhetha ukukubikezela ngengomuso.