Baibo yulaŵila momvwika bwino kuti Yehova okwanisha kulosela za msogolo. (Yes. 45:21) Koma yulaŵila lini zonse zokhuza mwakucitila izi, nthawi pakucita izi olo kupaka kwa vinthu vaangasankhe kuziŵa. Tetyo, tuziŵa lini zonse zokhuza luso ya Yehova yolosela za msogolo. Olo n’tetyo, pali zinthu zitontho zatuziŵa.

Yehova angacite ciliconse cakufuna, koma nthawi ziyakine osankha kusacita zinthu ziyakine. Yehova angaseŵenzeshe nzelu zake ziliye malile polosela zilizonse zaangasankhe. (Aro. 11:33) Koma cifukwa cakuti ni wozilesha, angasankhe soti kusaziŵa zati zikacitike msogolo.—Linganizhyani na Yesaya 42:14.

Yehova ocitisha kuti cifunilo cake cicitike. Kansi izi zutiyavya tyani kumvwisha luso yake yolosela za msogolo? Yesaya 46:10 yulaŵila kuti: “Kuyambila paciyambi, nulaŵililatu za masilizhyilo. Ndipo kuyambila kale-kale, nulaŵililatu za zinthu zikaliyocitika. Nulaŵila kuti, ‘Zolinga zangu zikacitike cendi, ndipo nikacite ciliconse canufuna.’”

Tetyo cifukwa cimozi camene cupangisha Yehova kukwanisha kulosela za msogolo ni cakuti ali na mphamvu zocitisha vinthu kucitika. Ofunika lini kuziŵa za msogolo monga ni mwatucitila potamba filimu kuti tiziŵe zati zicitike kosilizhyila kwa filimu iyi. M’malo mwake, Yehova angasankhe kuti cinthu ciyakine cikacitike pa nthawi iyakine. Ndipo ocitisha kuti cinthu ici cicitike nthawi iyi ikafwika.—Eks. 9:​5, 6; Mat. 24:36; Mac. 17:31.

Cifukwa ca izi, Baibo yuseŵenzesha mau akuti “kukonza” pofotokoza zakucita Yehova ponena za zocitika ziyakine zati zikacitike msogolo. (2 Maf. 19:25; Yes. 46:11) Mau aŵa emasuliliwa kufumila ku mau amene olinganako na mau amene otanthauza “woumba.” (Yer. 18:4) Monga ni mwamene woumba angaseŵenzeshele lito popanga cinthu ciliconse caakufuna kuti cinkhale cokongola, Yehova angakonze olo kucitisha vinthu viyakine kucitika kuti akwanilishe cifunilo cake.—Aef. 1:11.

Yehova olemekeza ufulu wosankha wa ŵanthu. Yove okonzelatu lini zinthu zati zikacitike mu umoyo wa munthu olo kucitisha ŵanthu aweme kucita vinthu vamene vingaŵaonongeshe. Yove olola ŵanthu onse kusankha zakufuna kucita. Ndipo oŵalimbikisha kusankha bwino.

Ganizilani visanzo viŵili ivi. Coyamba, ni ca ŵanthu a ku Nineve. Yehova elosela kuti mzinda uyu uonongewe cifukwa ca vinthu viipa veenzocita ŵanthu a mumzinda umu. Koma ŵanthu aŵa pecilapa, Yehova “ecinja maganizo ŵake pa soka yecinena kuti aŵaletele, ndipo aliyoŵaletele.” (Yona 3:​1-10) Yehova ecinja maganizo ŵake ponena za vinthu vecilosela, cifukwa Anineve ecinja pavuli pakumvwa cenjezo ya Yehova.

Cisanzo caciŵili ni ulosi wokhuza Koresi wamene enze kuzoyavya Ayuda kufuma mu ukapolo nolamula kuti kacisi wa Yehova umangiwe soti. (Yes. 44:26–45:4) Mfumu Koresi wa ku Perisiya ekwanilisha ulosi uyu. (Eza. 1:​1-4) Olo n’tetyo, Koresi enzolambila lini Mulungu wacendi. Yehova eseŵenzesha Koresi pokwanilisha ulosi uyu, koma aliyomukakamizhye kuti akolambila yove.—Miy. 21:1.

Ivi ni vinthu tyala vitontho vakucita Yehova poseŵenzesha luso yake yolosela vinthu va msogolo. Kulaŵila cendi, paliye munthu angamvwishe zonse zakuganiza Yehova na zakucita. (Yes. 55:​8, 9) Olo n’tetyo, zawatiululila zutang’isha cikhulupililo casu cakuti nthawi zonse ocita zinthu zoyenela kuyangizhyilapo zakulosela zokhuza sogolo.