Beibele e hlalosa ka mo go kwagalago gore Jehofa o kgona go bolela ka bokamoso e sa le pele. (Jes. 45:21) Ga e re botše dintlha ka moka mabapi le tsela yeo a dirago dilo goba a kgethago go di tseba ka gona. Ka gona ga re tsebe se sengwe le se sengwe ka bokgoni bja Jehofa bja go bolela e sa le pele ka bokamoso. Go sa šetšwe seo, a re boleleng ka dilo tše sego kae tšeo re di tsebago.

Ga go na selo seo Jehofa a palelwago ke go se dira ntle le seo a ipotšago gore a ka se se dire. Ka ge a na le bohlale bjo bo ka se lekanywego le selo, a ka kgetha go bolela ka selo se sengwe le se sengwe e sa le pele. (Baroma 11:33) Ka ge a phethagetše e bile a na le boitshwaro, a ka kgetha go se nyake go tseba seo se tlago go direga.—Bapiša le Jesaya 42:14.

Jehofa o phethagatša dilo tšeo a nyakago go di dira. Seo se re thuša bjang go kwešiša bokgoni bja gagwe bja go bolela dilo e sa le pele? Jesaya 46:10 e re : “Yo a bolelago go tloga mathomong dilo tša mafelelo, le yo a bolelago go tloga kgale dilo tšeo di sešogo tša dirwa; Yo a rego: ‘Morero wa ka o tla phethega, gomme ke tla dira tšohle tšeo di nkgahlago.’”

Lebaka leo le dirago gore Jehofa a kgone go bolela ka bokamoso e sa le pele, ke ka gobane o na le matla a go dira bjalo. Rena re ka swanelwa ke go bala puku ka moka gore re tsebe mafelelo a kanegelo ya yona, eupša Jehofa ga a hloke go bona mafelelo a taba pele a ka bolela gore go tlo direga eng. Go ena le moo, Jehofa a ka kgetha gore selo se itšego se tlo direga neng ke moka ge nako yeo e fihla a dira gore selo seo se direge.—Ek. 9:​5, 6; Mat. 24:36; Dit. 17:31.

Beibele e diriša mantšu ao a swanago le “hlama” le “phetha” go hlalosa tše dingwe tša dilo tšeo Jehofa a tlago go di dira mabapi le ditiragalo tša nako e tlago. (2 Dikg. 19:25; Jes. 46:11) Mantšu a a fetoletšwe go tšwa lentšung la mathomong leo le sepedišanago le “mmopi” yo a bopago ka letsopa. (Jer. 18:4) Go swana le ge mmopi wa letsopa yo a nago le bokgoni a kgonago go tšea letsopa ke moka a bopa selo se sebotse, Jehofa le yena a ka bopa goba a fetola dilo tše itšego gore a kgone go phethagatša thato ya gagwe.—Baef. 1:11.

Jehofa o neile batho tokologo ya go ikgethela. Jehofa ga a bolele e sa le pele tsela yeo batho ba tlago go phela ka yona, le gona ga a dire gore batho bao ba lokilego ba dire dilo tšeo di ka feleletšago di tsentše maphelo a bona kotsing. O dumelela batho gore ba ikgethele tsela yeo ba nyakago go phela ka yona le gona o ba thuša gore ba kgethe e kaone.

Nagana ka mehlala ye e mebedi. Mohlala wa mathomo ke wa batho bao ba bego ba dula Ninife. Jehofa o be a boletše gore motse woo o tlo fedišwa ka lebaka la batho ba babe bao ba bego ba dula moo, eupša ge batho bao ba be ba itshola, Jehofa o ile “a šegama ka baka la masetlapelo ao a bego a boletše gore o tla ba tlišetša wona; a se ke a a tliša.” (Jona 3:​1-10) Jehofa o ile a fetoša seo a bego a se boletše e sa le pele mabapi le Ninife ka gobane batho ba moo ba ile ba diriša tokologo ya bona ya go ikgethela gomme ba arabela gabotse molaetšeng wo Jehofa a bego a ba neile ona.

Mohlala wa bobedi ke wa Korese yo a bego a tlo lokolla Bajuda bothopša gomme a laela gore tempele ya Jehofa e agwe leswa. (Jes. 44:26–45:4) Kgoši Korese wa Peresia o ile a phethagatša boporofeta bjoo. (Esera 1:​1-4) Le ga go le bjalo, Korese o be a sa hlankele Modimo wa therešo. Jehofa o ile a diriša Korese go phethagatša boporofeta bjoo eupša a dumelela Korese gore a kgethe gore o tla hlankela mang.—Die. 21:1.

Tše e no ba tše dingwe tša dilo tšeo re di tsebago mabapi le kamoo Jehofa a bolelago ka gona e sa le pele mabapi le bokamoso. Ke therešo gore ga go na motho yo a ka kwešišago ka botlalo tsela ya Jehofa ya go dira dilo. (Jes. 55:​8, 9) Eupša seo re se tsebago se tiiša tumelo ya rena ya gore Jehofa o dula a dira seo se lokilego go akaretša le seo a se bolelago e sa le pele ka bokamoso.