Ombimbiliya, ipopia umwe nawa okuti Siovaa makalinga etyi apanga. (Isa. 45:21) Mahi ngwe kayapopile oñgeni meketyilinga, nonalupi meketyilinga, ovipuka ovio petupu ou evipopila. Onthwe katusukisa okunoñgonoka atyiho. Pahe matutale ovipuka vimwe.

Siovaa kakakatela vala mwei apopia. Siovaa omunongo omunene etyi apopia utyii. (Loma 11:33) Ngwe mokonda ulikondola omutima, ketupopila vala aviho mavikamoneka. — Tala etyi tyipopia Isaiya 42:14.

Siovaa etyi apanga tyilingwa umwe. Oityi tyilekesa okuti etyi Siovaa apanga matyikalingwa? Isaiya 46:10 yati: “Tundee konthyimbi, ame ndyipopia onthyulilo, nkhele tya kohale, ame ndyipopia ovipuka nkhele viehenelingwe. Ame nati: ‘Etyi nasoka otyo matyilingwa, mandyilingi atyiho nahanda.’”

Otyo, otyimwe tyilekesa okuti Siovaa una ononkhono mbokulinga etyi apanga. Ngwe wi ovipuka aviho, kesukisa-le vali okutala ankho etyi malingi tyaviuka umwe. Ovipuka aviho tukevelela vili-ale monomphango mbae. Putyina Siovaa apanga okulinga tyimwe, momuwo watyo ahanda tyilingwe utyilinga umwe. — Oku. 9:​5, 6; Mat. 24:36; Ovil. 17:31.

Otyo Ombimbiliya ipopila onondaka “tyasokwale” “tyapangwale” nondaka “mandyityilingi” pala okupopia ovipuka Siovaa makalinga komutwe oku. (2 Oha. 19:25; okatoi; Isa. 46:11) Onondaka ombo melaka liokonthuko, mbupopia “Omuhongi.” (Sele. 18:4) Ngeetyi omuhongi amamanga nawa onthanta ahongo etyi ahanda, na Siovaa upondola okupilulula ovipuka, aviendela omu evihandela. — Efe. 1:11.

Siovaa ulinga onthilo etyi ovanthu vasoka. Ngwe kasoko vala komunthu wike. Tupu kayeke ovanthu vena omutima omuwa, valinge evi vivetwala kehanyauno. Ngwe kakulumina ovanthu okukoya etyi vena okulinga, uvepopila vala etyi tyaviuka.

Matutale ovipuka vivali. Tete, ovanthu vakalele motyilongo tyo Ninive. Siovaa watile mahanyeko otyilongo tyo Ninive, mokonda muna ovanthu onondingavivi. Mokonda ovanthu motyilongo omo velivelele, Siovaa “apilulula etyi ankho ahanda okulinga, ehevehanye-ko vali ngeetyi apopile.” (Sona 3:​1-10) Siovaa apilulula etyi ankho ahanda okulinga mokonda ovanthu vomotyilongo tyo Ninive, vetavelele onondaka mba Siovaa avelivele, ngwe ehevehanyeko vali.

Vali, eulo lipopia ohamba Silu, wakwatesileko ova Sundaa vokwali koukonde, opo vakapindulepo ondywo ya Siovaa. (Isa. 44:26–45:4) Ohamba yo Pelesa Silu, yafwisilepo umwe eulo olio. (Esit. 1:​1-4) Mahi ngwe ohamba oyo ankho kaifende Huku. Siovaa wafwisapo etyi ahandele okutuma omunthu wehemufende, mahi no ngootyo ahakuluminya Silu opo emufende. — Omih. 21:1.

Ovipuka ovio aviho vilekesa etyi Siovaa makalinga komutwe, noñgeni meketyilinga. Onthwe ovanthu, katutyivili-ale okunoñgonoka etyi Siovaa makalinga. (Isa. 55:​8, 9) Onthwe onthumbi tuna okuti, Siovaa apeho ulinga ovipuka viaviuka, neetyi apanga meketyilinga umwe.