Bibliya limbalewa mwakubveka bwino kuti Yahova ambakwanisa kulewa bzomwe bzin’dzacitika kutsogolo. (Zaiya 45:21) Iro limbalewa lini momwe iye ambacitira ayai ni lini pomwe ambacita bzimwebzo na kuwanda kwa bzinthu bzomwe iye ambasankhula kufuna kuti adziwe. Ndipopa ifepano tingakwanise lini kubvesesa luso lomwe Yahova analo lakukwanisa kuleweratu bzomwe bzin’dzacitika kutsogolo. Tsono pana bzinthu bzinango bzomwe ifepano timbadziwa pa nkhani imweyi.

Luso la Yahova lakudziwa bzinthu bzakutsogolo liribe malire, tsono pana bzinthu bzinango bzomwe iye ambasankhula kusaya kubzidziwa. Thangwe ra nzeru zace zakusaya malire, iye angalewe bzentse bzomwe akufuna kulewa. (Aroma 11:33) Pakuti iye ana mphanvu yakubziikhira malire, angasankhule kusaya kudziwa bzakutsogolo. — Ndendemezerani na Zaiya 42:14.

Yahova ambacitisa kuti kufuna kwace kucitike. Kodi nfundo imweyi imbandendemerana tani na luso lace lakulewa bzakutsogolo? Zaiya 46:10 ambalewa kuti: “Ine ndine ule omwe nimbalewa bza cimaliziro kutomera paciyambi. Kuyambira kale-kale, nimbalewa bzinthu bzomwe bzinati kucitika. Ine ndine nimbalewa kuti, ‘Bzakufuna bzangu bzin’dzacitikadi, ndipo nin’dzacita cinthu ciri-centse comwe ndikufuna.’”

Thangwe libodzi lomwe limbacitisa Yahova kuti aleweretu bzakutsogolo ndakuti iye ana mphanvu yakucitisa kuti bzinthu bzicitike. Yahova ambafunika lini kucita kuzindikira bzomwe bzin’dzacitika kutsogolo ninga momwe bzingacitikire kuna ifepano tikakhala tikuwona vidiyo kuti tidziwe kuti n’ciyani cin’dzacitika. M’mbuto mwace, iye angaikhe nthawe kuti cinthu cidzacitike, ndipo nthaweyo ikafika iye angacitise kuti cinthuco cicitike. — Ekisodo 9:5, 6; Mateu 24:36; Mabasa 17:31.

Ndipopa, Bibliya limbaphatisa basa mafala yakuti “ndakonza” na “ndalewa” kuti afotokoze momwe Yahova ambacitira na bzinthu bzomwe bzin’dzacitika kutsogolo. (2 Amambo 19:25; Zaiya 46:11) Mafala yamweya yadasanduliziridwa kucokera ku fala linango lomwe limbathandauza “kuumba.” (Jeremiya 18:4) Ninga muuAmbi waluso omwe angaumbe cinthu ca dongo cakudeka kwene-kwene, Yahova angakwanisembo kuumba ayai kucitisa kuti bzinthu bzicitike mwakubverana na kufuna kwace. — Aefezo 1:11.

Yahova ambalemekeza ufulu bwathu bwakusankhula. Iye ambanemberatu lini bzomwe bzin’dzacitikira munthu ali-wentse kutsogolo. Ndipo ambacitisambo lini wanthu wa mitima yabwino kuti acite bzinthu bzomwe bzingawabweresere ngozi. Iye ambalekerera wanthu kuti asankhule bzomwe iwo akufuna ndipo iye ambawalimbikisa kuti asankhule njira yabwino.

Onani bziratizo bziwiri: Cakuyamba n’ca wanthu wa ku Ninive. Yahova akhadaleweratu kuti mzinda wa Ninive ungadapfudzidwa thangwe ra bzakuipa bzomwe wanthu wa kumweko akhacita. Tsono pomwe wanthu wa ku Niniveko adakungula, Yahova “adacinja makumbukidwe yace, acileka kuwabweresera tsoka lomwe akhafuna kuwabweresera.” (Djona 3:1-10) Yahova adacinja nzeru zace thangwe rakuti Aninive adaphatisa basa ufulu bwakusankhula ndipo adacinja pomwe adabva m’cenjezo wa Yahova.

Ciratizo caciwiri n’ca polofesiya yakulewa bza Siro omwe angadapulumusa Adjuda ku ukapolo na kucitisa kuti templo ya Yahova imangidwe pomwe. (Zaiya 44:26–45:4) Mambo Siro wa ku Perisi adakwanirisa mafala yamweya. (Ezara 1:1-4) Siro akhanamata lini Mulungu wacadidi. Yahova adaphatisa basa Siro kuti akwanirise polofesiya yace ndipo alibe kumungingimiza Siroyo kuti amutumikire. — Mimwani 21:1.

Mathangwe yomwe tacezeranaya ndiyo lini yokha yomwe yambacitisa Yahova kuleweratu bzomwe bzin’dzacitika kutsogolo. Palibe munthu omwe angakwanise kudziwa njira za Yahova. (Zaiya 55:8, 9) Tsono mathangwe yamweya yambalimbisa cikhulupiro cathu cakuti bzentse bzomwe iye ambalewa mpsacadidi, kuphatanidzambo na bzomwe bzin’dzacitika kutsogolo.