Ibaibolo likuyoba mwakupilikiwa ukuti Yehova ikuyobela ngani isya nkyeni. (Yes. 45:21) Litikuyoba kilikyosa pankhani ya muno ikumanyila pamo utubalilo utu ikubombela isi. Yonongwa yake tutikumanya kilikyosa pakuyoba isya muno Yehova ikuyobela ngani isya nkyeni. Loli filipo ifindu finandi itolo ifi tufimenye.

Yehova abaghile ukubomba kilikyosa iki ikulonda loli utubalilo tumo ikuleka ukubomba ifindu fimo. Yehova abaghile ukubombela amahala ghake amasita mpaka ukuti ayobele ngani kilikyosa iki asalile. (Rom. 11:33) Loli panongwa yakuti Yehova ikwikola fiyo, abaghile ukusala ukuleka ukumanya isi sisakubombiwa.—Fwanikisya na Yesaya 42:14.

Yehova ikupangisya ukuti ubwighane bwake bufwanisiweghe. Ngimba ifundo iyi yikututula bulebule ukupilikisya muno Yehova ikuyobela ngani isya nkyeni? Ilemba lya Yesaya 46:10 likulingania ukuti: “Ukufuma mu mbwandilo nayobile ngani isi syaliko kubumalikilo, ndinkuyobela ngani isi syayagha pakwisa. Nayobile ukuti isi ndendekisye syo sitisa kutoliwamo, nukuti ‘nisakusimalisya syosa isi nalinong’wine ukusibomba.’”

Polelo ikifukwa kimo iki Yehova ikuyobela ngani isya nkyeni kyo kyakuti ali namaka aghakupangisya ukuti ifindu fibombiweghe. Yehova atikulondiwa ukumanya isi sisakubombiwa nkyeni bo muno nanuswe sibaghile ukuyila linga tukubelenga kubumalilo bwa buku ukuti tumanye ifyakukongapo fyake. Mmalo mwake, Yehova ikusala itolo ukuti ikindu kimo kikuya pakubombiwa pakabalilo kamo kangi ikukipangisya ukuti kibombiwe linga akabalilo kake kafikile.—Kuso. 9:​5, 6; Mat. 24:36; Imbo. 17:31.

Pakifukwa iki, Ibaibolo likubombela amasyu bo aghakuti “natendekisye,” “nasinong’wine,” ukunangisya isi Yehova ikubomba pankhani ya fyakubombiwa fimo ifyankyeni. (2 Banyaf. 19:25; Yes. 46:11) Amasyu agha ghasanusiwe ukufuma ku lisyu lya Kihiburi ili likusanusya “Umbumbandeko.” (Yere. 18:4) Bo muno umbumbandeko waluso abaghile ukubombela umfu ukuti abumbe indeko inunu, mo muno yope Yehova abaghile ukubombela pamo ukupangisya ifindu fimo ukuti afwanisye ubwighane bwake.—Ef. 1:11.

Yehova ikubitikisya abandu ukuti basaleghe ifyakubomba. Yehova atikuyobela ngani isi sikuya pakumbonekela umundu aliwesa. Kangi atikupangisya ukuti abandu abanunu babombe ikindu kimo ikibibi iki kibaghile ukubapangisya ukuti basapyutiwe. Ikubitikisya abandu bosa ukuti basaleghe isi bikulonda ukubomba pabumi bwabo kangi ikubamanyisya muno babaghile ukubombela ukuti bayeghe nubumi ubununu.

Inong’onela ififwanikisyo ifinunu ifi. Ikifwanikisyo ikyakwanda kya bandu aba bikalagha ku Ninive. Yehova ayobile ngani ukuti akaya aka kikuya pakupyutiwa panongwa ya mbibi sya bandu bake. Loli panongwa yakuti abandu bake balapile imbibi syabo, Yehova “alinkuyighomola indumbula yake, alinkusita nukutwala ulufundo ulu ayagha pakubapa bo muno alinong’onile.” (Yona 3:​1-10) Yehova achenjile aminong’ono ghake aghakufwana na isi ayobile ngani panongwa yakuti Abaninive babombile kanunu ubwabuke bwabo ubwakusala ukuti bachenje bo Yehova abasokile.

Ikifwanikisyo ikyabubili, busololi ubwakuyoba isya Sayilasi, uyu ayagha pakubabula Abayuda kubutumwa nukubika ululaghilo ulwakuti itempile lya Yehova liyengiwe kangi. (Yes. 44:26–45:4) Umwalafyale wa Peresia Sayilasi afwanisye ubusololi ubu. (Ezra 1:​1-4) Loli Sayilasi akamwiputagha Kyala wabwanaloli. Yehova alimbombile Sayilasi ukuti afwanisye ubusololi ubu kangi alimwitikisye ukuti abombele ubwabuke bwake ubwakusala kyala uyu abaghile ukumwiputa.—Mbu. 21:1.

Loli ifi findu finandi itolo ifi Yehova ikwinong’onela linga ikuyobela ngani isya nkyeni. Ukuyoba ubwanaloli, nayumo umundu uyu abaghile ukumanya syosa isi Yehova ikwinong’ona nukubomba. (Yes. 55:​8, 9) Loli isi Yehova atunangisye, sikukasya ulwitiko lwitu ukuti utubalilo tosa ikubomba inunu, ukongelelapo linga ikuyobela ngani isya nkyeni.