Baibol tɔgɛ leere kɔ Jɛhova dap kɔ nu esira li deesī. (Ais 45:21) A naa baatɛ̄ dɛ̄dɛɛ̄ nu akiiloo kɛ̄ a wee doo lo ama doo, ale sɔ̄ a wee doo wo, ale kunɛ nu a suā akiiloo deesī. Nyɔɔwo, ii suā dɛ̄dɛɛ̄ nu akiiloo ekpo Jɛhova ɛrɛ lo ekɔ nu esira li deesī. Kerewo, a ɛrɛ pio nu i suā.

Jɛhova dap doo dɛ̄dɛɛ̄ nu, kaɛlɛɛ pya nu a naa gbī edoo. Jɛhova dap su ye suānu a naa ɛrɛ kuma kɔā ɛrɛgebah nu esira li deesī lo a gbī edoo wo. (Rom 11:33) Nyɔnɛbee alu nɛɛ a dap aa ye loo bu sīdee a mmana a, a dapnage biaɛfii kɔ a naale esuā pio nu lo esira li deesī.—Dooreloo Aisaia 42:14.

Jɛhova doo kɔ nu alu ye ekɛɛrɛ a dooa. Bu mɛ sīdee na lo ama gbaaloo ekpo a ɛrɛ lo ekɔ nu esira li deesī a? Aisaia 46:10 baatɛ̄ kɔ: “Lo a kɔ ye kuma aā bɔātɛ̄ e aā li nama dee pya nu a sii lu edoo, sa kɔ, ‘Mdaa bura gaa le yira, e m gaa le doo dɛ̄dɛɛ̄ nu m gbī edoo.’”

Nyɔɔwo, ziī nu a doo kɔ Jɛhova a dap kɔ nu esira na kɔ a ɛrɛ ekpo lo edoo kɔ lo nu a sira. A naa lu ebɛɛ̄ kɔ a dasī su ye ekpo ɛma bu nu a esira li deesī lo enwaabah suā nu aa le sira, doodoo bee a dasī ɛp tɛɛ̄nyɔɔ serekɛ̄. Taāwo, Jɛhova dap kɔ taɛ sɔ̄ ziī nu esira, lɛɛ a doo kɔ lo nu a sira taɛ lo sɔ̄.—A’aa 9:5, 6; Mat 24:36; Doonu 17:31.

Nu anua lo sa Baibol su pya ue a le doodoo “bura,” ‘nɔɔ,’ le “ekɛɛrɛ” baātɛ̄ nu Jɛhova doo kumaloo pio nu esira li deesī. (2 Mɛnɛ 19:25; Ais 46:11) Lu etap pya ue ama aāloo ziī bee ue lo nu a kura na “nɛɛ dɛm bā.” (Jer 18:4) Dookɛ̄ nɛɛ a para dɛm bā wee su baɛ̄ dɛma kāna a kpedɛɛ̄ doo, Jɛhova dap kwa ale enyaana bahloo nu lokwa ye ekɛɛrɛ dooa.—Ɛfɛs 1:11.

Jɛhova nɛ dee kɔ pya nɛɛ a sagɛ nu ba edoo. Bari naa nɔɔ nu esiraloo ziī ziī nɛɛ li deesī serekɛ̄, ale bee a doo kɔ pya nɛɛ le beenyiɛ a doo nu edoo kɔ ba a ɛrɛ gbeerasī. A lɛɛbahloo dɛ̄dɛɛ̄ nɛɛ kɔ ba a sagɛ nu ba edoo e a tɔgɛ wa kɔ ba a sagɛ nu a lee.

Naa kɛɛrɛbu baɛ edobah ama. Tua edobah kiiloo pya nɛɛ a bee tɔɔ̄ Nineve. Jɛhova bee kɔ elu egbeesī lo buɛ̄ nyɔɔ ye bag dogo. Mɛ sɔ̄ pya a bee le bu lo Buɛ̄ bee kiiya, Jɛhova “bee kiiya aaloo pɔrɔ a bee kɔ a edooe wa loo; e a naa bee ye doo.” (Jona 3:1-10) Jɛhova bee nyaana nyiɛ ye kiiloo nu a bee kɔ edooe nyɔɔbee pya Nineve bee gbaɛ̄tɔ̄loo zuurabahtɔ̄ Jɛhova bee wa nɛ sa kiiya aaloo wa pɔrɔ.

Lo eree baɛ edobah na mɔmanudɛɛ̄ akiiloo mɛnɛ Sairɔs a bee be eebah, lo a bee agara pya Juu lɛɛ kɛ̄bah aa sa nɛ lok kɔ alu e’obia wu tɔkaɛ Jɛhova. (Ais 44:26–45:4) Mɛnɛ Pesia a kura Sairɔs bee doo lo mɔmanudɛɛ̄ gbɔ̄mɛɛ. (Ezra 1:1-4) Kerewo, Sairɔs naa bee taāŋabah kaka Bari. Jɛhova bee su Sairɔs daā gbɔ̄mɛɛ lo mɔmanudɛɛ̄ sa naa su bah ekpo ye aā kɔ a taāŋae ye bah.—Kam 21:1.

Kerewo, naale aba pya nu ama na Jɛhova kɛɛrɛbu loo lɛɛ a gae kɔ nu esira li deesī a. Bu kaka, lɔgɔ miɔŋɔ nɛɛ naale edap suā dɛ̄dɛɛ̄ nu Jɛhova kɛɛrɛ ale nu edoo. (Ais 55:8, 9) Kerewo, pya nu Jɛhova edora kɔ i suā yere mɛm loo i yira kɔ a wee doo nu a lera dɛ̄dɛɛ̄ sɔ̄, gbaāloo sɔ̄ a kɔ nu akiiloo nu esira li deesī.