Библий бӕлвурдӕй финст ӕй, Йегови бон ке ӕй, федӕни ци уодзӕй, уой рагацау зӕгъун (Ис. 45:21). Уой куд базонуй, удта ’й кӕд ӕма цӕйбӕрцӕ фӕндуй федӕни туххӕй базонун, уой туххӕй си листӕг хабӕртти уӕнгӕ финст нӕй. Уомӕ гӕсгӕ аци фарстай туххӕй берӕ цидӕртӕ нӕ зонӕн. Фал ӕркӕсӕн, Библийӕй ци зонӕн, уомӕ.

Йеговӕн алцидӕр кӕнуни барӕ ес. Фал еци барӕй алкӕд нӕ фӕппайда кӕнуй (Ром. 11:33). Йегови зунд ӕнӕкӕрон ӕй ӕма ӕ бон ӕй базонун, ци ’й бафӕндӕуа, уой. Фал кӕми гъӕуй, уоми алкӕддӕр ’хебӕлхуӕцгӕ фӕууй. Уомӕ гӕсгӕ еуӕй-еухатт ниллух кӕнуй, федӕни ци уодзӕй, уой ке нӕ базондзӕй. (Рабарӕ Исаййи 42:14.)

Йеговӕ уотӕ искӕнуй, цӕмӕй ӕ фӕндон исӕнхӕст уа. Е куд баст ӕй, федӕни ци уодзӕй, уой Йеговӕ рагацау ке фӕззонуй, уой хӕццӕ? Исаййи 46:10 финст ӕй: «Ӕз райдайӕнӕй дзорун, фӕстагмӕ ци уодзӕй, уой, рагидзамантӕй, ци нӕма ӕрцудӕй, уой. Ӕз зӕгъун: „Ци унаффӕ рахастон, е исӕнхӕст уодзӕй, цидӕриддӕр мӕ фӕндуй – искӕндзӕн ӕй“».

Федӕни ци уодзӕй, уой Йеговӕ кӕцӕй фӕззонуй? Еу гъуддаг уой медӕг ӕй, ӕма Йеговӕ ци исфӕндӕ кӕнуй, уой ӕ бон исӕнхӕст кӕнун дӕр ӕй. Зӕгъӕн, кино цӕмӕй фӕууодзӕй, уой базонун нӕ ку бафӕндӕуа, уӕд ӕй нӕ бон ӕй кӕронмӕ разелун. Кӕмӕдӕрти, ка ’й зонуй, уотӕ кӕсуй, цума Йеговӕ федӕни ци уодзӕй, уой уотемӕй базонуй. Ӕгас хабӕрттӕмӕ фӕккӕсуй, цума ӕрцудӕнцӕ, уой хузӕн. Фал Йеговӕ уотӕ нӕ фӕккӕнуй. Е ӕхуӕдӕг ниллух кӕнуй, федӕни цӕхуӕндӕр хабар кӕцидӕр бӕлвурд рӕстӕг ке гъӕуама ӕрцӕуа. Ӕма уой фӕсте ӕ гъос фӕддаруй, цӕмӕй нисангонд рӕстӕгмӕ ӕ дзурд исӕнхӕст уа (Рац. 9:5, 6; Матф. 24:36; Гъуд. 17:31).

Уомӕ гӕсгӕ Библий федӕни хабӕртти туххӕй дзурд ку фӕццӕуй, уӕд кӕмидӕрти финст фӕууй, Йеговӕ цидӕр ке «исфӕндӕ кодта» (2 Пад. 19:25; Ис. 46:11). Дзурдбаст «исфӕндӕ кӕнун»-ӕй ци дзиуиттаг дзурд ӕрцудӕй тӕлмацгонд, е ӕй дзурд «гъосингӕнӕг»-мӕ хӕстӕг (Йер. 18:4). Йегови рабарӕн ес гъосингӕнӕги хӕццӕ. Дӕсни гъосингӕнӕг ӕргъӕй искӕнуй рӕсугъд вазӕ. Гъе уотӕ Йеговӕн дӕр ӕ бон ӕй хабӕрттӕ уотӕ рауайун кӕнун, цӕмӕй ӕ фӕндон исӕнхӕст уа (Еф. 1:11).

Йеговӕ нимайуй, алли адӕймагӕн дӕр равзаруни барӕ ке ес, уой. Адӕймагбӕл кӕд ӕма ци ӕрцӕудзӕй, уой Йеговӕ рагацау нӕ ниллух кӕнуй. Адӕнӕн хуарз гъуддӕгтӕ кенӕ ба, мӕлӕти аккаг ке туххӕй уодзӕнцӕ, уӕхӕн гъуддӕгтӕ нӕ кӕнун кӕнуй. Алкӕмӕндӕр ӕхе барӕ ’й, куд цӕрдзӕй, е. Фал уӕддӕр Йеговӕ алкедӕр разӕнгард кӕнуй, цӕмӕй раст унаффитӕ хӕсса.

Ӕркӕсӕн дууӕ цӕветтонемӕ. Фиццаг бал радзубанди кӕнӕн Ниневий цӕргути туххӕй. Берӕ фудгъуддӕгтӕ кодтонцӕ, ӕма уой туххӕй Йеговӕ загъта, еци горӕт ке фесафдзӕй. Фал сӕ лӕгъуз гъуддӕгтӕ ку ниууагътонцӕ, уӕд Хуцау «рафӕсмон кодта, бӕллӕх ӕруадзуйнаг сӕбӕл ке адтӕй, уобӕл ӕма сӕбӕл ӕй нӕбал ӕруагъта» (Ионӕ 3:1–10). Йеговӕ ӕ тӕрхон раййивта, уомӕн ӕма ин ниневийӕгтӕ ӕ дзурдмӕ байгъустонцӕ.

Дуккаг цӕветтон ӕй паддзах Кири хабар. Финстади загъд адтӕй, е дзиуиттӕгти ке исуӕгъдӕ кӕндзӕй ӕма бардзурд ке ратдзӕй, цӕмӕй ковӕндонӕ нӕуӕгӕй амад ӕрцӕуа (Ис. 44:26–45:4). Персий паддзах Кир еци пахампарадӕ исӕнхӕст кодта (Езд. 1:1–4). Кӕд ӕцӕг Хуцауӕн нӕ лӕггадӕ кодта, уӕддӕр си Йеговӕ испайда кодта, цӕмӕй ӕ пахампарадӕ исӕнхӕст адтайдӕ. Фал Йеговӕ Кири тухӕй дӕр ӕхецӕн нӕ лӕггадӕ кӕнун кодта (Ӕмб. 21:1).

Ке зӕгъун ӕй гъӕуй, федӕни ци уодзӕй, уой Йеговӕ куд базонуй, уой кӕронмӕ нӕ лӕдӕрӕн, уомӕн ӕма еунӕг адӕймагӕн дӕр ӕ бон нӕй Хуцауи гъудитӕ базонун (Ис. 55:8, 9). Фал нин ци раргом кодта, уой фӕрци хъӕбӕрдӕр феууӕндӕн, алкӕддӕр рӕстӕй ке фӕййархайуй, уобӕл, уой хӕццӕ ба ма, федӕни ци уодзӕй, уой туххӕй ку фӕдздзоруй, уӕд дӕр.