Malinlinew ya ibabaga na Biblia ya sarag nen Jehova ya amtaen tan ipasakbay no antoy nagawa ed arapen. (Isa. 45:21) Pero ag-ibabaga na Biblia so amin ya detalye no panon tan no kapigan to itan gagawaen, tan no kasin aamtaen to so amin ya nagawa. Kanian limitado labat so natatalosan tayo ed sayan abilidad nen Jehova. Pero, nia ray pigaran amta tayo tungkol ed sayan abilidad to.

Sarasarag nen Jehova ya gawaen so amin ya labay to, pero sarag ton kontrolen so sarili to. Anggapoy limitasyon na karunongan to, kanian no labay ton amtaen so sakey ya bagay, sarasarag ton gawaen. (Roma 11:33) Pero lapud walay kontrol to ed sarili to, wala ray bagay ya agto la aamtaen.​—Ikompara so Isaias 42:14.

Manggawan-manggawa si Jehova na paraan pian nasumpal so linawa to. Antoy koneksion to iya ed abilidad ton ipasakbay so nagawa ed arapen? Oniay nabasa ed Isaias 46:10: “Diad gapo ni labat et ipapasakbay ko lay pansumpalan, tan nensaman ni et ipapasakbay ko la ray agni agawa. Inkuan kon, ‘Say desisyon ko et agmanguman, tan gawaen ko so antokaman a panliketan ko.’”

Say sakey ya rason sirin no akin ya sarag nen Jehova ya ibaga no antoy nagawad arapen et lapud walay pakayari ton gawaen so antokaman ya labay to. Agto kailangan ya i-fast forward iray bagay-bagay pian nanengneng to no anto ray nagawa​—ya singa akarekord lay amin ya nagawa insan to labat rebyuen. Aliwan ontan. Imbes, no walay impasakbay nen Jehova ya nagawa ed espisipikon panaon, manggawan-manggaway paraan pian nagawa itan. Kanian no onsabi la itan ya panaon, ontua imay impropesiya to.​—Exo. 9:5, 6; Mat. 24:36; Gawa 17:31.

Atan so rason no akin ya no maminsan et ibabaga na Biblia ya “imparaan,” ‘pinorma,’ tan ‘inggagala’ nen Jehova iray nagawa ed arapen. (2 Ara. 19:25; paimanod leksab; Isa. 46:11) Diad Hebreon lenguahe, sarayan salita et walay koneksion to ed salitan “managdamili” o managgaway banga. (Jer. 18:3, 4) Say sakey ya marundunong ya managgaway banga et sarasarag ton hulmaen o pormaen so pitek pian napagmaliw ton banga. Ontan si Jehova. Sarasarag ton hulmaen o imaneobra iray bagay-bagay pian nasumpal so gagala to.​—Efe. 1:11.

Rerespetoen nen Jehova so karapatan tayon mandesisyon parad sarili tayo. Agto itatadhana so bilay tayo​—no kasin manggawa tayoy maong o mauges. Aabuloyan to tayon manpili no antoy labay tayon gawaen. Ibabangat to tayo no antoy dugan gawaen pero agto tayo pipiliten.

Imanoen tayoy duaran alimbawa. Say unona et samay propesiya ya nagawa ed saray taga Ninive. Imbaga nen Jehova ya deralen to ira tan say syudad da ta mauges ira. Pero nen nagbabawi irad kasalanan da, “agto la itan intuloy.” (Jon. 3:1-10) Akin et ag-itan intuloy nen Jehova anggano impasakbay to la? On ta anengneng toy impagbabawi na saray taga Ninive. Nandesisyon iran gawaen so duga nen a-warningan ira.

Say komaduan alimbawa et amay propesiya tungkol ed lakin say ngaran to et Ciro. Akapropesiya ya sikatoy mangibulos ed saray Judio diad impakabihag dad Babilonia pian naipaalagey lamet so templo nen Jehova. (Isa. 44:26–45:4) Asumpal itan ya propesiya nen pinayagan nen Arin Ciro na Persia ya ompawil iray Judio ed Jerusalem. (Esd. 1:1-4) Pero aliwa pan lingkor nen Jehova si Ciro. On tua, inusar nen Jehova si Ciro pian nasumpal iyan propesiya. (Pro. 21:1) Pero nirespeto To so karapatan nen Ciro ya mandesisyon no siopan dios so pilien ton dayewen.

Pigara labat iraya ed saray ikokonsidera nen Jehova no aamtaen toy nagawa ed arapen. Diad tua, lapud too tayo labat, agtayon talaga natalosan so amin ya iisipen tan gagawaen nen Jehova. (Isa. 55:8, 9) Pero aya so segurado: Lanang ya duga so gagawaen nen Jehova—kaiba lay panguusar to ed abilidad ton amtaen tan ipasakbay no antoy nagawa ed arapen.