Biblia yana monesa haphelo egi Yehowa wana jiya ndaga mbajibua mu masugu adi muza. (Yesh. 45:21) Yanago guzuelela ndaga jiazonda-zonda jiatadila luholo luana jiya muene ndaga jiene, nga tangua diana gujijiya muene nga ndaga jiana jiya muene. Tuajiyilego gukotelesa ndaga jiene jiagasue. Uvi tuzuelelenu ndaga jiazonda tuana jiya.

Yehowa wajiya gutshita ndaga jiagasue jiatshigina muene, uvi matangua ako wana tuna gutshita ndaga jiko. Wajiya guzuela ndaga yagasue mbayibua mu musugu adi muza handaga udi nu ndunge jiavula diago. (Roma 11:33) Wajiya nji gutuna gukamba gujiya ndaga mbajibua mu masugu adi muza, handaga wana gudikanda mu luholo luatagana.​—Fuanesa nji nu Yeshaya 42:14.

Yehowa wana tshita ndaga ha gutagenesa gutshigina guenji. Ndaga yene idi gutukuatesa ha gujiya itshi mukunda nu ndunge jienji jia gujiya ndaga mbajibua mu masugu adi muza? Yeshaya 46:10 idi muzuela egi: ‘Sendese gu gisendeselo ngazuelele ndaga mbajibua mu masugu adi muza, sendese mualeha ngazuelele ndaga jinyi khenji jibuile galego. Ngazuelele egi: “Badesizio ami mbaatagenesewa, mbangutshita ndaga yagasue idi gungusuanguluisa.”’

Yehowa wajiya guzuela ndaga mbajibua mu masugu adi muza handaga udi nu ngolo jia gutagenesa ndaga jiene. Muene gana diangelago gutala masugu adi muza ha gujiya ndaga mbajibua; gifua luholo athu ana tala gisugishilo gia filme imoshi ha gujiya luholo filme yene iza musuga. Uvi Yehowa wajiya guzuela tangua ndaga imoshi idi naye gukalegewa, gungima atshitshi yagasue ha gutagenesa ndaga yene mu tangua diene.​—Guz. 9:5, 6; Mat. 24:36; Makal. 17:31.

Gishina giene, Biblia yana kalegela mbimbi gifua ‘gudianga gulonda,’ nu ‘gutshita’ ha gumonesa ndaga Yehowa wana tshita mukunda nu ndaga jiko mbajibua mu masugu adi muza. (2 Maf. 19:25; Yesh. 46:11) Mbimbi eji jiabalumuiwe mu zuelelo dia gishina, jidi mukotelesa egi “mubumbi.” (Yel. 18:4) Gifua luholo mubumbi wana kalegela wuma ha gulondega nzungu yabonga, Yehowa nji wajiya gulondega nga gutuameza ndaga ha gutagenesa gutshigina guenji.​—Ef. 1:11.

Yehowa wana bemba athu ha gutomba ene hakhawo ndaga adi naye gutshita. Muene gana dianga ndo gutomba ndaga jidi naye gubuila muthu wagasue. Ganago gutuma nji athu abonga ha gutshita ndaga jiajiya guabatela gufua. Yehowa wana bemba athu ha gutomba ndaga adi naye gutshita mu monyo wawo, uvi wana gualongesa ha gutshita ndaga jiabonga.

Tutadilenu ifezegeselo mbadi. Gifezegeselo gia thomo gidi gia enya gu Ninive. Yehowa wadiangele guzuela egi mbawushiya dimbo diene handaga athu akhalele mukalagala ndaga jiabola guene. Uvi tangua athu ene asombegesele makalegelo awo, ‘wasombegesele matangi’enji, gaabatedielego malamba gifua luholo luazuelele muene.’ (Yona 3:1-10) Yehowa gatshitshilego luko ndaga jiadiangele guzuela muene mukunda nu dimbo dia Ninive, handaga enya mu dimbo diene asombegesele makalegelo awo havile ene ndaga jiazuelele Yehowa.

Gifezegeselo gia mbadi, gidi profesi yatadila fumu Siluse, wakhalele naye guzola enya Yuda mu uhiga nu guhana njila ha gula tempelo ya Yehowa itungiwe luko. (Yesh. 44:26–45:4) Fumu Siluse ya gu Phelese watagenesele profesi yene. (Ez 1:1-4) Uvi Siluse gakhalelego mukombelela Nzambi wa giamatshidia. Yehowa wakalegele Siluse ha gutagenesa profesi yene. Uvi wamubembele ha gutomba muene hakhenji muthu adi naye gukombelela.​—Ish. 21:1.

Tuazuelela phamba ndaga jiazonda Yehowa wanatadila ha guzuela ndaga mbajibua mu masugu adi muza. Gushigo nga muthu mumoshi wajiya gukotelesa ndaga jiagasue jiana tshita Yehowa nu jiana tangiza muene. (Yesh. 55:8, 9) Tudi mujiya egi ndaga jiana zuela Yehowa jiana kolesa gutshigina guetu egi ndaga jiagasue jiana tshita muene jiakhala jiabonga, ikhale ndaga jiana zuela muene mukunda nu mu masugu adi muza.