Baibolo inena kuti Yahova adziwa vinthu va kutsogolo. (Yes. 45:21) Koma iyo inenalini vose va momwe Yahova achachitira mwevi, nthawe yomwe achita vimwevi na kuwanda kwa vinthu vomwe angafune kudziwa. Ndipomwapa tingadziwelini vose va momwe Yahova angadziwire va kutsogolo. Koma naboni tiganizire ivi.

Yahova angachite chilichose chomwe iye ankufuna, koma nthawe zinango iye achasalula kusachita vinthu vinango. Ndawa yakuti nzeru zake zilibe malire, Yahova angalosere chilichose chomwe iye ankufuna. (Aro. 11:33) Koma Yahova angasalule kusadziwa vinthu vomwe iye ankufuna ndawa yakuti achachita vinthu mwa nzeru.—Onani pomwe Yesaya 42:14.

Yahova atsimikizira kuti cholinga chake nthawe zose chidzakwanirisike. Manje ko mwevi vinkubverana tani na nzeru zake za kudziwa va kutsogolo? Lemba ya Yesaya 46:10 ifotokoza kuti: ‘Kundoyambira pa chiyambi nineneratu va mapeto ndipo kundoyambira kalekale vimwevi vikanati vachitika, ‘ine nidaneneratu kuti volinga vangu vidzachitikedi ndipo nidzachite chilichose chomwe ninkufuna.’’

Chinthu chibodzi chomwe chingachitise Yahova kulosera va kutsogolo ni chakuti iye anamphanvu zochitisa kuti vinthu vichitike. Iye achadekanalini kuona chinthu chakutsogolo ninge kuti chachitikakale—ninge momwe tsamba yomalizira ya bukhu yomwe munthu angawerenge kuti adziwe vinthu vose. M’malo mwa vimwevi iye angasalule kuti vinthu vinango vichitike pa nthawe yomwe iye ankufuna. Ndipo iye atsimikizira kuti vachitika pa nthawe yake.—Eks. 9:5, 6; Mat. 24:36; Mac. 17:31.

Ndipomwapa Baibolo iphatisa basa mawu yakuti ‘kukonzekera’ ‘kukonza’ na ‘kukhazikisa’ pakunena vomwe Yahova achite na vinthu vomwe vidzachitike ku tsogolo. (2 Maf. 19:25; Yes. 46:11) Mawu mwaya yankutsumbudzuliriwa kuchokera ku mawu ya chiyankhulo choyamba yomwe yankubverena na mawu yanango yomwe yatanthauza woumba ‘mbiya.’ (Yer. 18:4) Ninge woumba mbiya waluso yemwe angakwanise kuphatisa basa dongo kukonza mbiya yabwino maninge, Yahova angakwanise kuchita vinthu mwa njira inango kuti cholinga chake chikwanirisike.—Aef. 1:11.

Yahova adapereka ufulu wosalura vochita kwa munthu aliyese ndipo iye alemekeza maninge vimwevi. Iye ayikhilalini malire munthu aliyese. Ndipo achitisalini kuti wanthu wabwino ambachite vinthu vomwe vingawapwetekese. Iye abvuma kuti aliyese asalule vomwe ankufuna kuchita. Koma alimbikisa kuti wanthu ambachite vinthu vabwino.

Onani chitsanzo cha wanthu omwe ambakhala ku Nineve. Yahova wenze adanena kuti thaundi mweyi idzadzongewe ndawa ya vochita vawo voipa. Koma wanthu wa ku Nineve adalapa ndipo Yahova ‘adakumbukira va chilango chomwe wenze adanena kuti adzawabweresere ndipo adawabvera chifundo alibe kuwalanga.’ (Yona 3:1-10) Yahova adachinja maganizo pa vomwe wenze adanena ndawa yakuti wanthu wa ku Nineve adaphatisa basa mphaso ya kusalula vochita ndipo adatambira bwino ntontholo wa Yona. Iwo adalapa ndipo alibe kudzongewa.

Chitsanzo chinango ni cha ulosi unango wonena va wolamulira munango dzina yake Koresi kuti adzamasule Ayuda ku ukapolo na kulamula kuti amangepomwe kachisi wa Yahova. (Yes. 44:26–45:4) Mpfumu Koresi wa ku Perisiya adakwanirisa ulosi moyu. (Ezara 1:1-4) Yahova adaphatisa basa Koresi kuti akwanirise polomisi yake mosamukakamiza kuti amutumikire. Panango kuti Koresi wenze na ufulu wosalula yemwe angamutumikire.—Miy. 21:1.

Shuwadi, pa na vinthu vizinji maninge vomwe Yahova angachite kuti adziwe vomwe vidzachitike kutsogolo. Kunena chaivo, palibe munthu aliyese yemwe angakwanise kubvesesa bwinobwino momwe Yahova achachitira vinthu panango momwe achaganizira na vomwe achachita. (Yes. 55:8, 9) Koma vose vomwe Yahova atiuza, vilimbisa chikhulupiriro chathu chakuti iye nthawe zose achachita vinthu vabwino—kuphatanidzapo peno wanena va kutsongolo.