Jeʼm Biblia iwɨan̈matpa iga Jehová wɨap iñɨʼɨyɨy tyi naspa okmɨ (Is. 45:21). Pero, dyaʼ ikɨʼtykɨʼty an̈matpa juutypɨk iwatpa, juchix iwatpa o juʼtsan̈ ijoodon̈aap. Y taɨchtyam dyatyim tanjoodon̈tam ityumpɨy.

Jehová wɨap iwat ityumpɨy, pero a veces ipɨkpa ijɨɨxi iga dya’ iwatpa. Iga jeʼ iniity jaʼyan̈ joodon̈oʼoyi wɨap in̈mat jempɨk jeʼ ixunba (Rom. 11:33). Pero, iga Jehová wɨap inin̈jakta iyaʼak, jeʼ ikupin̈ba tyi ijoodon̈atoʼoba y tyi dyaʼ (aʼmɨtyim Isaías 42:14).

Jehová iwatpa iga kupaguiñ jempɨk ijɨɨsne’. ¿Tyi nɨmtoʼoba yɨʼp? Isaías 46:10 in̈matpa: «Dende wiñtyityim ɨch anan̈matpa jempɨk naspa, y dende pekam, jeʼm tyidyin̈kej iga dyanam nasneʼ. Ɨch anɨmpa: ‹Dyaʼ sɨʼ an̈kukagay jempɨk anjɨɨsneʼ, y an̈watpa juʼutsam ɨch an̈kusuʼnɨʼyba›».

Jehová iniity jeʼm pɨɨmi iga ikkupakpa jeʼm in̈maatyi, jeʼyukmɨ wɨap iñɨʼɨyɨy tyityam naspa okmɨ. Jehová ijoodon̈am ityumpɨy jempɨk naspa. Jeʼ dyaʼ iwatpa juʼuts taɨchtyam jesɨk tanjoodon̈atoʼoba juutypɨk kuyajpa tuum película, nasuntaap iga tanakkumɨʼn̈naxiñ. Jehová wɨap iwat iga naxiñ algun tyi juchixam jeʼ ijɨɨsneʼ iga iwatpa (Éx. 9:​5, 6; Mat. 24:36; Hech. 17:31).

Jeʼyukmɨ, iga in̈matpa tyityam naspa, Jehová ipɨkpa yɨʼpyaj an̈matyiyaj «an̈wat» y «an̈jɨɨsneʼ iga an̈watpa» (2 Rey. 19:25; nota; Is. 46:11). En hebreo, yɨʼpyaj versículos ipɨkpa tuum an̈maatyi toomi jeexpɨktyim juʼuts jeʼm an̈maatyi «alfarero» (Jer. 18:4). Juʼutstyim tuum alfarero iga wɨap iyooxakaʼ jeʼm suʼun̈nas y wɨap iwat tyidyin̈kej, Jehová wɨap iwat tyidyin̈kej iga ikkupakpa jempɨk jeʼ ijɨɨsneʼ (Efes. 1:11).

Jehová taaʼmchiñeʼ iga tanyaʼak tampɨguiñ tanjɨɨxi. Jeʼ dyaʼ nɨmneʼ tyi tannaskaʼaba tumtum de taɨchtyam y dyaʼ tateguedɨʼyba iga tan̈wadyiñ algun tyi siiga okmɨ tamalnɨgaʼyba. Jeʼ tan̈kejaʼyba juutypɨk tawɨitypa y taaʼmchiʼiba iga tanyaʼak tampɨguiñ tanjɨɨxi.

Tanaʼmtaʼmiñ wɨsteen akwiñkejoʼoyiyaj. Jeʼm wiñtyipɨk tɨgɨykuʼmpa kun jempɨk ityyaj idyɨk Nínive. Peʼm tɨgan̈juj tsaam imalwatyajpa idyɨk, jeʼyukmɨ Jehová ijɨychak iga iktogoyba. Pero jeʼeyaj ikakyaj ijɨɨxi, jeʼyukmɨ Dios iwɨjɨɨs jempɨk iwatpa idyɨk y dyam iktogoy (Jon. 3:​1-10). Jehová ikukagay jempɨk ijɨɨsneʼ idyɨk. ¿Tyiʼiga? Iga jempɨk ityyaj idyɨk Nínive ikumaton̈yaj Jehová y ichakyaj iga imalwatyajpa.

Jeʼm wɨstenpɨk akwiñkejoʼoyi jeʼ jeʼm jɨychagoʼoyi iga tɨgɨykuʼmpa kun Ciro, tuum pɨɨxiñ iga ikɨakputpa idyɨk jeʼm judíojyaj y pɨʼɨmɨyoʼyba iga watseettaiñ jeʼm Jehová itemplo (Is. 44:​26–45:4). Yɨʼp jɨychagoʼoyi ikkupak jeʼm rey Ciro de Persia (Esd. 1:​1-4). Pero, Ciro dyaʼ ikoosteñaʼyba idyɨk jeʼm nuntapɨk Dios. Mex iga Jehová iwat iga jeʼ ikkupaguiñ jempɨk ijɨychakneʼ, dyaʼ ityeguedɨy iga ikuyooxaiñ (Prov. 21:1).

Ityñam tun̈gak cosa iga Jehová ijɨɨskupakneʼeba jesɨk iñɨʼɨyɨʼyba tyi naspa okmɨ. Ni i dyaʼ wɨap ikutɨʼɨyɨy jempɨk jeʼ ijɨɨspa y iwatpa (Is. 55:​8, 9). Pero jempɨk tanjoodon̈tam de Jehová tan̈kejaʼyba iga jeʼ juchixkej iwɨwatpa y jeempɨktyim iwatpa jesɨk iñɨʼɨyɨʼyba tyi naspa okmɨ.