Biblia mostra di manera klaru di kuma, Jeova pudi konta ke ku na kontisi na futuru. (Isa 45:21) I ka konta tintin pa tintin kuma ki ta fasil, kal mumentus ki ta fasil i kal kusas ki ta disidi sibi. Pa kila, no ka sibi tudu aserka di kapasidadi ku Jeova tene di konta ke ku na kontisi na futuru. Ma i ten alguns kusas ku no sibi.

Jeova pudi fasi tudu ke ki misti, ma utrora i ta disidi ka fasi sertus kusas. I pudi konta kualker kusa ku na bin kontisi, pabia di si jiresa garandi. (Rom 11:33) Suma i sibi kontrola si kabesa, i pudi tambi disidi ka sibi ke ku na bin kontisi. — Jubi Isaias 42:14.

Jeova ta fasi pa si vontadi kumpri. Kuma ku es sta ligadu ku si kapasidadi di konta ke ku na bin kontisi na futuru? Isaias 46:10 fala sin: “Disna di tempu antigu N kontaba ja kusas ku ka kontisi inda. Na kumsada N ta jumna N konta kusas di kabantada. N ta fala kuma ña planu sta firmi; N na fasi tudu kil ku N misti.” (Anos ku pui letras karegadu ku italiku)

Un di motivus ku pui Jeova pudi konta ke ku na kontisi na futuru, i pabia i tene puder di fasi pa kusas kontisi. Jeova ka pirsisa di jubi ke ku na kontisi na futuru suma ku utrora no ta jubi fin di un filmi pa sibi kal ku na sedu rusultadu final. Ma Jeova pudi disidi ke ku na kontisi na un tempu, i fasi pa ki kusa kontisi ora ku ki tempu ciga. — Sai 9:​5, 6; Mat 24:36; At 17:31.

E ku manda Biblia usa palabras “marka”, “forma” ku “pui sintidu pa fasi” pa splika ke ku Jeova fasi ku kusas ki falaba ja i na sedu. (2 Re 19:25; Isa 46:11) Es palabras i traduson di un palabra na lingua oriẑinal ku sta ligadu ku palabra ku signifika “kumpudur di puti”. (Jer 18:​2-4) Suma ku un kumpudur di puti ta tarbaja lama tok i ta sedu un vasu bonitu, asin tambi ku Jeova pudi tarbaja o manobra kusas pa i kontisi suma ki misti. — Ef 1:11.

Jeova rispita no liberdadi di kuji. I ka ta markaba ja ke ku na kontisi na vida di kada algin. Nin i ka ta pui pa jintis bon fasi un kusa, ku na pui pa e bin kabadu ku el. I da tudu jintis liberdadi di disidi ke ke na fasi, ma i ta konsija elis pa e fasi bon kusas.

Jubi dus isemplu. Purmeru isemplu i di jintis ku mora na Ninivi. Jeova kontaba ja di kuma ki sidadi na kabadu ku el pabia di se maldadi. Ma oca ku jintis ku mora na Ninivi ripindi, Jeova “muda di ideia, i ka fasi elis ki mal ki falaba i na fasi.” (Jonas 3:​1-10) Jeova muda di ideia di ke ki falaba i na kontisi, pabia ninivitas usa liberdadi di kuji pa ripindi, oca ke obi mensaẑen di avisu ku Jeova da elis.

Sugundu isemplu i profesia aserka di un algin ku comadu Siru, i ku na bin liberta israelitas di katiberasku i da ordi pa e torna kumpu templu di Jeova. (Isa 44:26–45:4) Rei Siru di Persa kumpri es profesia. (Esd 1:​1-4) Ma Siru ka ta adora Deus di bardadi. Jeova usa Siru pa kumpri si profesia, ma i ka forsijal pa i adoral. — Dit 21:1.

Es i so alguns isemplu di kusas ku Jeova ta pensa nel, ora ki na konta ke ku na kontisi na futuru. Na bardadi, nin un pekadur ka pudi ntindi tudu kamiñus di Jeova. (Isa 55:​8, 9) Ma ke ku no sibi aserka di Jeova ta fortalisi no fe di kuma i ta fasi sempri ke ki sertu, nkluindu ora ki na konta ke ku na bin kontisi na futuru.