Bibliaqa sutʼita niwanchej, Jehovaqa imachus aswan qhepaman kananta niyta atisqanta (Isa. 45:21). Jinapis mana tukuy imitatapunichu niwanchej imaynatachus chayta ruwasqanta, maykʼajchus chayta ruwasqanta, nitaj mashkhatachus yachayta ajllasqantapis. Yachanchej Jehovaqa ñaupajmantaña niyta atisqanta imachus aswan qhepaman kananta. Pero imaynatapunichus chayta ruwasqantaqa mana tukuyninta entiendeyta atinchejchu. Jinapis wakin imasta yachanchej.

Jehovaqa tukuy imata ruwayta atin, pero wakin kuteqa mana ruwayta ajllan. Yachaynin mana tukukuyniyoj kasqanrayku, imallamantapis imachus kananta niyta atin (Rom. 11:33). Chaywanpis Jehovaqa nipuni munayninwan atipachikunchu. Imachus aswan qhepaman kananta yachayta atispapis, wakin kutisqa mana yachayta ajllan (Isaías 42:14, kikinchay).

Jehovaqa munayninta juntʼachinpuni. Chayrayku imachus aswan qhepaman kanantapis niyta atillantaj. Isaías 46:10 nin: “Qallariymantapacha imachus tukukuynin kananta nini, unaymantapacha willani imaschus manaraj ruwakunchu chay imasta. Noqaqa nini: ‘Nisqayqa juntʼakonqapuni, imatachá munani chayta ruwasaj’, nispa”.

Chayrayku Jehovaqa imachus aswan qhepaman kananta niyta atin imata ruwachinanpajpis atiyniyoj kasqanrayku. Imapichus uj película tukukusqanta yachanapaj, ¿imatá noqanchej ruwayta yachanchej? Tukukuyninta qhawarqonchej, ¿icharí? Jehovataj mana chayta ruwayta necesitanchu imachus qhepaman kananta yachananpaj. Astawanpis Jehovaqa niyta atin imapis maykʼajchus kananta. Chay ajllasqan tiempo chayamojtintaj juntʼachinpuni (Éxo. 9:5, 6; Mat. 24:36; Hech. 17:31).

Chayrayku Jehovaqa Bibliapi kay palabrasta oqharin “wakicherqani”, “ruwanayta niniña” nispa, imapis aswan qhepaman pasananpaj imastañachus ruwasqanta ninanpaj (2 Rey. 19:25; Isa. 46:11). Hebreo parlaypi kay versiculosqa kikinchan “manka llutʼaj” runawan (Jer. 18:4). Imaynatachus uj sumaj manka llutʼaj runa, tʼurumanta kʼachitu imasta ruwayta atin, ajinallatataj Jehovapis tukuy imata ruwayta atin munayninta juntʼachinanpaj (Efe. 1:11).

Jehovaqa imatachus ruwayta munasqanchejta ajllakunanchejta saqewanchej. Jehovaqa mana ninchu imachus sapa uj runaj kausayninwan kananta. Nillataj kʼacha runasta munajta mana munajta imatapis ruwachinchu, ajinamanta chinkachisqa kanankupaj. Astawanqa yachachiwanchej imaynatachus kusisqa kausakuyta atisqanchejta. Pero saqewanchej sapa ujninchej ajllakunanchejta.

Iskay ejemplosta qhawarina. Ñaupajtaqa Nínive llajtapi tiyakoj runasmanta parlarina. Chay llajtaqa may chhika sajra ruwaykunawan juntʼa kasharqa. Chayrayku Jehovaqa thuñisqa kananta nerqa. Pero paykuna arrepientekusqankurayku, “Diosqa ima ñakʼariytachus apachimusaj nisqantaqa, manaña apachimorqachu” (Jon. 3:1-10). Imatachus ruwananta nisqanta Jehovaqa manaña ruwarqachu. ¿Imajtin? Imajtinchus Ninivepi tiyakoj runasqa, Jehovaj nisqanta uyarispa cambiarqanku, arrepientekorqankutaj.

Kunantaj Ciromanta uj profecía karqa chaymantañataj parlarina. Profeciaman jina payqa judiosta kacharichinan karqa, Jehovaj templontapis watejmanta ruwanankuta kamachinan karqa (Isa. 44:26–45:4). Kay profeciataqa Persiamanta rey Ciro juntʼarqa (Esd. 1:1-4). Chaywanpis Ciroqa mana Diostachu yupaycharqa. Jehovaqa kay profecía juntʼakunanpaj Ciromanta valekorqa, jinapis mana obligarqachu payta sirvinanpaj (Pro. 21:1).

Jehová imachus aswan qhepaman kananta ninanpajqa mana kunan yachakunchej chaykunasllatachu qhawaykurin. Yachanchej jina, uj runaqa mana allinta entiendeyta atinmanchu imaynatachus Jehová yuyasqanta, ruwasqantapis (Isa. 55:8, 9). Pero imatachus Jehovamanta yachasqanchejqa sutʼita reparachiwanchej allin kajtapuni ruwasqanta, imachus aswan qhepaman kananta nispapis.