Ri Biblia kubʼij che ri Jehová kkunik kril ri kkʼulmataj na pa ri petinaq (Is. 45:21). Are kʼu, kubʼij taj jas kubʼan che ubʼanik, jampaʼ kubʼano y jachike ri kraj kretaʼmaj. Rumal che qetaʼm ta ri kubʼan ri Jehová che ubʼanik wariʼ, kojkun taj kqabʼij che qetaʼm ronojel. Are kʼu kʼo jujun jastaq che qetaʼm.

Ri Jehová kkunik kretaʼmaj ronojel ri kkʼulmataj na, are kʼu jujun taq mul kraj taj kretaʼmaj. Rumal che sibʼalaj nim ri unojibʼal, kkunik kretaʼmaj apachike jastaq (Rom. 11:33). Are kʼu, kʼo jastaq che kraj taj kretaʼmaj (chajunamisaj rukʼ Isaías 42:14).

Ri Jehová kubʼano che ktzʼaqat ri urayibʼal. ¿Wariʼ kʼo ta ubʼanik rukʼ che kkunik kretaʼmaj chrij ri petinaq? Isaías 46:10 kubʼij: «In kinyaʼ ubʼixik ri kʼisbʼalil qas pa ri tiktajik; qas ojer uloq nuyoʼm ubʼixik ri kpe na. In kinbʼij: Ri kinchomaj kibʼanik kebʼantaj na in kinbʼan na ronojel ri kinchomaj ubʼanik».

Ri rumal che ri Jehová kkunik kretaʼmaj ri kkʼulmataj pa ri petinaq are che sibʼalaj nim uchuqʼabʼ y kkunik kubʼano che ri jastaq kekʼulmatajik. Ri Jehová rajawaxik taj kchoman na chrij jas riʼ ri kkʼulmataj pa ri petinaq rech kretaʼmaj, junam rukʼ ri kqabʼan oj are chiʼ kqil jun película are kqil ri kʼisbʼal rech kqetaʼmaj jas chrij kchʼaw wi. Are kʼu ri Jehová kkunik kubʼano che kkʼulmataj ri jastaq we kopan ri qʼij o ri fecha; y are chiʼ kopan ri tiempo, ri areʼ kubʼano che ktzʼaqatik (Éx. 9:5, 6; Mat. 24:36; Hech. 17:31).

Rumal laʼ, ri Jehová keʼukoj tzij junam rukʼ «nuchomam kibʼanik uloq», «nubʼim» y «nubʼanom ri nuchomanik» che kuya ubʼixik ri jujun jastaq che xubʼan ojer kanoq y ri kubʼan na pa ri petinaq (2 Rey. 19:25; nota; Is. 46:11). Ri versículos riʼ pa hebreo kukoj jun tzij che kʼo ubʼanik rukʼ ri tzij «ajbʼanal bʼoʼj» (Jer. 18:4, Ri Tyoxlaj Wuj). Junam rukʼ jun winaq che kuchakuj ri xaqʼoʼl y kubʼan jun jeʼlalaj bʼoʼj, ri Jehová kkunik kubʼan kibʼanik ri jastaq rech ktzʼaqat ri urayibʼal (Efes. 1:11).

Ri Jehová uyaʼom chqe che oj kojchaʼow ri kqaj kqabʼano. Ri areʼ utzʼibʼam ta ri kqakʼulmaj na y keʼutaqchiʼj ta ri winaq che ubʼanik jastaq che kuya kʼax chke. Xaneʼ kubʼij chqe ri kqabʼano rech kojkikot pa ri qakʼaslemal y uyaʼom bʼe che oj kojchaʼow ri kqaj kqabʼano.

Chqilaʼ kebʼ kʼutbʼal. Nabʼe kojchʼaw na chkij ri winaq pa Nínive. Pa wajun tinamit riʼ ri winaq sibʼalaj e itzel, rumal laʼ ri Jehová xubʼij che kusachisaj na kiwach. Are kʼu, rumal che xkiya kan ubʼanik ri itzelal, ri Dios «xuchomaj chi man kukʼam ta chi uloq ri kʼax ri uchomam ukʼamik uloq pa kiwiʼ» (Jon. 3:1-10). Ri Jehová xubʼan ta chi ri uchomam ubʼanik. ¿Jasche? Rumal che ri winaq pa Nínive xkita ri xubʼij ri Jehová y xkiya kan ubʼanik ri itzelal.

Ri ukabʼ kʼutbʼal are ri profecía che kchʼaw chrij ri Ciro, jun achi che xeʼutoʼ na ri judíos rech xetzalij pa ri kitinamit y xuya na taqanik rech kmajix chi jumul uyakik ri rachoch ri Jehová (Is. 44:26-45:4). Wajun profecía riʼ xtzʼaqat rumal ri qʼatal tzij Ciro re Persia (Esd. 1:1-4). Are kʼu ri Ciro, kupatanij ta ri Jehová. Qastzij che ri Jehová xukojo rech xtzʼaqat ri profecía, are kʼu xutaqchiʼj taj rech kpatanix rumal (Prov. 21:1).

Qastzij che wariʼ, kchʼaw chrij kʼi jastaq. Rumal che xaq oj winaq kojkun taj kqetaʼmaj ronojel ri kuchomaj y ri kkun ri Jehová che ubʼanik, ni ri chuqʼabʼ che kʼo rukʼ rech kretaʼmaj ri kkʼulmataj na pa ri petinaq (Is. 55:8, 9). Paneʼ je wariʼ, kojkunik kqakubʼsaj qakʼuʼx che ri Jehová qas kubʼan na ri kubʼij pa ri petinaq y che kʼo ta ni jumul kukʼex ri utzij.