Bibliachöqa clärum willakun imapis pasakunampaq kaqta Jehovä musyëta puëdinqanta (Is. 45:21). Peru manam willakuntsu, imanö, imë, o imakunata musyanqantaqa. Tsë asuntupaq llapanta mana musyëta puëdirmi, kënömi o waknömi nïtaqa puëdintsiktsu. Peru wakintaqa musyantsikmi.

Jehoväqa llapanta musyëta puëdirpis höraqa mana musyanampaqmi decidin. Alläpa yachaq karmi, imapis pasakunampaq kaqta willakuyta puëdin (Rom. 11:33). Peru controlakuyta alli yacharmi, pasanampaq kaqta musyëta puëdirpis, höraqa mana musyanampaq decidirin (igualaratsi Isaïas 42:14 textutawan).

Jehoväqa llapan munanqantam cumplin. ¿Tsënö nirqa shamoq tiempuchö pasakunampaq kakunata musyanqantaku nikantsik? Isaïas 46:10 textuchömi kënö nin: “Noqaqa qallananllapitanam imachö ushanampaq kaqta willakü, y unë witsampitanam manaraq pasakunqankunata willakurqö. Noqaqa kënömi nï: ‘Decidinqätaqa manam cambiashaqtsu, y llapan munanqätam rurashaq’”.

Pasakunampaq kaqta Jehovä musyëta puëdinqantaqa nintsik kikin rurëta puëdiptinmi. Pasakunampaq kaqkunaqa manam pasakunraqtsu, tsëmi Jehoväqa imapis pasakunampaq kaqta musyanampaq o rikänampaq tiemputa cörritsita wanantsu. Tsëpa rantinqa kikinmi decidin ima y imë pasakunampaq kaqta, y citanqan fëcha chäriptinnam pasakunanta permitin (Ex. 9:5, 6; Mat. 24:36; Hëch. 17:31).

Tsëmi pasakunampaq kaqta willakurnin kë palabrakunata utilizarqan, ‘ruranäpaq patsätsinqä’ “rurashaq” y “parlanqätaqa rurashaqmi” (2 Rey. 19:25; Is. 46:11). Hebreu idiömachöqa tsë palabrakunata utilizäyan “mituwan trabajaq” nunapaq parlarmi (Jer. 18:4). Imanömi mituwan trabajaq nunaqa imatapis mitupita shumaq rurarin, tsënöllam Jehoväpis munanqan rurakänampaq imatapis shumaq patsäratsin (Efes. 1:11).

Imatapis kikintsik decidinapaqmi Jehoväqa permitimantsik. Pëqa manam nunakuna imakunapa pasayänampaq kaqta destinantsu, ni alli nunakunata mana allichö ushayänanta munar mana allikunata rurayänampaq obligantsu. Tsëpa rantinqa alli kawakunapaq yachatsimarnintsikmi kikintsik imatapis decidinata permitimantsik.

Këkunallaman pensarishun: Nïnivi markachö nunakuna mana allita rurayaptinmi Jehoväqa ushakätsinampaq willakurqan. Peru arrepentikuyaptinmi “ llakiparqan, y manam ushakätsirqannatsu” (Jon. 3:1-10). Rikanqantsiknömi, Jehoväqa ushakätsinampaq decidishqana këkarpis, cäsukur arrepentikuyaptin ushakätsirqannatsu.

Kananqa Cïrupaq willakunqanpaq parlarishun. Pëqa judïukunatam libranan karqan y Jehoväpa templunta yapë rurayänampaqmi mandakunan karqan (Is. 44:26–45:4). Tsëpaq Jehovä willakunqantaqa Persiachö gobernaq Cïrum cumplirqan (Esd. 1:1-4). Peru Cïruqa manam Jehoväta adorarqantsu. Parlanqanta cumplinampaq utilizashqa karpis, Jehoväqa manam Cïruta obligarqantsu sirwinampaq (Prov. 21:1).

Rasumpa kaqchöqa, nunakunaqa manam llapantaqa entiendita puëdintsiktsu Jehovä pensanqankunata, ruranqankunata ni pasakunampaq kaqkunata musyanqanta (Is. 55:8, 9). Peru Jehovä imanö kanqanta musyarmi següru kantsik, pasakunampaq kaqkunata willakurpis, alli kaqllata imëpis ruranqanta.