Bibliapim niwanchik Diosqa hamuq punchawkunamanta allinta yachasqanta (Is. 45:21). Ichaqa, manam lliwtachu willawanchik imayna yachasqanmantaqa nitaq yachananpaq imayna tantiasqanmantaqa. Chayraykum nichwan hamuq punchawkunamanta Diospa yachasqanmanta mana lliwta entiendesqanchikta. Chaywanpas wakintaqa yachanchikmi.

Diosqa ima ruwaytapas atinmi, ichaqa imatapas mana ruwananpaqmi wakinpiqa tantian. Payqa tukuy yachayniyuq kasqanraykum hamuq punchawkuna imayna kananpaqpas ninman (Rom. 11:33). Ichaqa, controlakuq kasqanraykum wakinpiqa mana yachananpaq tantiakunman (tupachiy Isaias 42:14 nisqanwan).

Diosqa imapas munasqantaqa ruwanmi. ¿Imaynatam chayqa tupan hamuq punchawkunamanta Jehova Diospa yachasqanwan? Isaias 46:10 nisqanpim kaynata nin: “Qallariymantapacham ñuqaqa imapas imayna kananmanta nini. Ñawpaqmantaraqmi willakuni imakunapas pasakunanmantaqa. Ñuqam nini: ‘Tantiasqaytaqa ruwasaqpunim, imapas ruway munasqaytaqa ruwasaqpunim’”, nispa.

Chaynaqa, hamuq punchawkunapi imapas kananpaq Dios tantiaspanqa chay tiempo chayaramuptinmi chayna kananpaq tukuyta ruwan. Ima peliculatapas qawayta munaspaqa tukuynintaraqmi qawaykuyta munachwan imamanta kasqanta yachanapaq. Ichaqa, Diospa willakusqankunaqa manam pasakunraqchu. Payqa imapas haykapi pasananpaq tantiaspanqa chay punchaw chayaramuptinmi chayraq cumplin (Ex. 9:​5, 6; Mat. 24:36; Hech. 17:31).

Chayraykum Diosqa hamuq punchawkunapi imakuna pasananmanta willachispan palabranpi qillqachirqa “ñawpaqmantaraqmi tantiarqani”, ‘tantiasqayman hina’ nispa (2 Rey. 19:25; Is. 46:11). Hebreo rimaypim chay versiculokunapa nisqan tupan ‘allpa mankata ruwaqwan’ (Jer. 18:4). Imaynam mitumanta imatapas ruwaqqa munasqanman hina sumaq allpa mankachata ruwarunman, chaynam Diospas hamuq punchawkuna imayna kananmanta munasqanman hina tantianman (Efes. 1:11).

Diosqa munanmi kikinchikmanta imapaqpas tantiakunata. Jehova Diosqa manam sapa runapa vidanchikpi imapas pasawananchikpaqqa destinanchu. Manataqmi allin runakunataqa obliganchu mana allinta ruwanapaqqa, aswanqa allinta kawsakunanchikpaqmi yachachiwanchik. Ichaqa kikinchikña imaynata kawsakunapaq tantiakunapaqmi saqiwanchik.

Puntata rimarisun Ninive llaqtayuqkunamanta. Chay runakuna mana allin ruwaqllaña kasqankuraykum Diosqa tantiarurqa chinkachinanpaq. Ichaqa wanakurusqankuraykum Diosqa “manaña wañuchirqachu”, aswanqa paykunatam llakipayariykurqa (Jon. 3:​1-10). Ninive llaqtayuqkunataqa manañaqa wañuchirqachu willachisqanta kasukusqankuraykum hinaspa mana allin ruwasqankumanta wanakusqankuraykum.

Kunanñataq rimarisun Ciromanta Diospa ima willachisqanmanta. Cirom judiokunata libranan karqa, hinaspapas Diospa templonta kaqmanta pirqanankupaqmi kamachinan karqa (Is. 44:​26–45:4). Diospa willachisqanman hinamá Persia nacionta kamachiq Ciroqa cumplirqa (Esd. 1:​1-4). Ciroqa manam Diosta yupaychaqchu karqa, chaywanpas Diosqa munayninta cumplinanpaqmi servichikurqa. Ichaqa manamá obligarqachu servinanpaqqa (Prov. 21:1).

Astawanraqmi yachananchik kanqa hamuq punchawkuna imayna kananmanta Diospa yachasqanmantaqa. Runaqa manamá lliwtaqa entiendeyta atichwanchu Diospa piensasqantawan imayna ruwasqantaqa, nitaq hamuq punchawkunapi imakuna pasananmanta yachasqantaqa (Is. 55:​8, 9). Chaywanpas, Diosmanta allinta yachasqanchikraykum manapuni iskayrayanchikchu allin kaqkunallata haykapipas ruwananmantaqa. Hamuq punchawkunata ima pasakunanmanta nisqanpas allinmi.