Bibliaq willasqanman jinaqa Jehová Diosqa atinmanmi jamuq tiempopi imachus pasanqa chayta willaytaqa (Isa. 45:21). Ichaqa manan willanchu imaynatas chayta ruwan, ni jayk’aqsi ruwan chaytapas. Chhaynaqa manataq allintachu chaykunata yachanchis chayqa, manan nisunmanchu imapas “chhaynapunin” otaq “manan chhaynachu” nispaqa. Ichaqa Diospa wakin ruwasqankunaqa yachakunmi.

Jehová Diosqa tukuy imatapas ruwallanmanmi, mayninpin ichaqa mana munanchu ruwayta. Payqa tukuy yachayniyoqtaq chayqa, willallanmanmi jamuq tiempopi imachus pasanqa chayta (Rom. 11:33). Ichaqa payqa ch’uyapunitaq, lliupitaq yachan controlakuyta chayqa, munaspaqa manan yachayta munanmanchu (tupanachiy Isaías 42:14 textowan).

Jehová Diosqa junt’anpunin ima munasqantapas. ¿Chayri imapitaq tupan jamuq tiempopi imachus pasanqa chayta willayta atinmanchus manachus chaywan? Chaytan willashan Isaías 46:10 textopi. Chaypin nin: “Qallariymantapachan imapas, imayna tukukunanta willani. Ñaupa tiempomantapachan qhepaman imachus kananta willani. Noqan nini: Ima ruway munasqaypas ruwakunqapunin, llapa ima munasqaytan ruwasaq”, nispa.

Chaypi nisqan jina Jehová Diosqa atiyniyoqmi jamuq tiempopi imachus pasanqa chayta yachananpaq. Ichaqa manan chayllachu, payqa atiyniyoqmi imapas imaynas kanqa chayta ruwananpaqpas. Chhaynaqa Jehová Diosqa manan juj botontaraqchu ñit’iykunan imachus pasanqa chayta rikunanpaqqa, manan watunanraqchu chayta yachananpaqqa. Aswanpas paymantan imakunas pasanqa, jayk’aqsi imapas pasanqa chayqa. Chaymantapas payqa jayk’aqsi imapas pasanan, chay p’unchaymi chayta chayachimun (Éx. 9:​5, 6; Mat. 24:36; Hech. 17:31).

Chayraykun Jehová Diosqa rimasqanpi nirqan: “Unayñan chhayna kanantaqa nirqani”, “ñan chaytaqa piensaykuniña”, nispa (2 Rey. 19:25; Isa. 46:11). Hebreo rimaypiqa chay iskaynin versiculokunapiqa “t’uru manka ruwaq runamantan” rimashan (Jer. 18:4). Imaynan manka ruwaqqa t’urumanta mankata munayninman jina ruwan, chhaynatan Jehová Diospas munaynin junt’akunanpaq imaymanata ruwan (Efes. 1:11).

Libren kanchis noqallanchismanta imatapas ruwananchispaq. Jehová Diosqa manan pimanpas destinotaqa churawarqanchischu, manataqmi allin runakunataqa tanqanchu mana allin ruwaykunamanqa. Aswanmi payqa yachachiwanchis imaynatas sumaq kausayta tarisunman chayta. Chaymantapas, sapankatan libreta saqewanchis mayqen ñantas ajllakusunman chaypaq.

Chaypaq qhawarisun Bibliapi iskay willakuyta. Ñaupaqta yachasun Nínive llaqta runakunamanta. Chay llaqtapi runakunaqa sinchi millaykunan karqanku, chaymi Jehová Diosqa willachirqan chay llaqta thunisqa kananpaq. Chay llaqta runakunan ichaqa arrepientekurqanku. Chaymi Diosqa mana allin ruwaykunata saqepusqankuta rikuspa “imachus piensasqanta manaña ruwarqanñachu” (Jon. 3:​1-10). Rikusqanchis jina Jehová Diosqa cambiarqanmi, manan imachus willachisqanqa junt’akurqanchu. ¿Imaraykun cambianman karqan? Nínive llaqta runakunan Diospa willachisqanta uyarispa saqepurqanku llapa mana allin ruwaykunata, chayraykun Diosqa mana thunirqanchu llaqtankuta.

Kunanqa Ciromanta willakuyta qhawarisun. Chay runaqa judío runakunatan kacharichinan karqan, Jehová Diospa templonta ruwakunanpaq iman kamachikuyta orqonan karqan (Isa. 44:26–45:4). Diospa chay willachisqantaqa Persia rey Ciron junt’arqan (Esd. 1:​1-4). Ichaqa chay reyqa manan Jehová Diostaqa servirqanchu. Arí, Jehová Diosqa paywanmi junt’achirqan imachus willachisqanta, ichaqa manan tanqarqanchu payta servinanpaqqa (Prov. 21:1).

Runakunallaqa manan llapantaqa entiendesunmanchu imaynatas Dios piensan chayta ni imaynatas imatapas ruwan chaytapas. Manataqmi entiendeyta atisunmanchu maykamas imatapas yachan chaytapas (Isa. 55:​8, 9). Ichaqa chaywanpas allintan yachakun imaynas Jehová Diosqa imatapas allillantapuni ruwan chayta.