Bibliapica Jehová Dios jipa punllacunapi ima pasanata yachangapaj poderta charishcatami yachachin (Is. 45:21). Shinapash shamuj punllacunapi imacunalla pasanata Jehová Dios ricun cashcataca na villanllu. Shinaca Jehová Dios shamuj punllacunapi imacunalla pasanata imashina ricun cashcataca, na yachai ushapanchichu. Shinapash huaquin cosascunataca yachaita ushapanchimi.

Jehová Dios tucui poderta charishpapash, huaquin cosascunata na ruranatami decidin. Jehová Diosca jipa punllacunapi ima pasanata yachaita ushanmi (Rom. 11:33). Pero huaquinbica shamuj punllacunapi ima pasanata na yachanatami decidin (Isaías 42:14​huan chimbapurashpa ricupangui).

Jehová Diosca paipa voluntadta pactachinmi. Caita yachanaca ¿imashinata ayudan? Isaías 46:10​pica: “Jipa punllacuna ima tucunatapash, ñucami callarimandapacha villani. Nara imapash tiajpillatami, pundamandapacha villarcani. Ñuca yuyaita cushcacunaca, tucui causaipami canga. Ñuca munashcataca tucuilla rurashapachami” ninmi.

Shinaca Jehová Diosca paipa voluntadta pactachina poderta charimandami shamuj punllacunapi ima pasanatapash yachaita ushan. Y paica shamuj punllacunapi imacunalla pasanata yachangapaca na imatapash rurajunata minishtinllu. Shinallata pai munashca horaspi imapash pasachunmi decidita ushan (Éx. 9:​5, 6; Mat. 24:36; Hech. 17:31).

Jehová Diosca, ‘ñuca rurashcata’, “ñuca yarijushcataca pactachishapachami” nircami. Cai shimicunataca shamuj punllacunapi ima pasanata yachashcata ricuchingapami nirca (2 Rey. 19:25; Is. 46:11). Hebreo shimipi ‘ñuca rurashcata’, “ñuca yarijushcataca pactachishapachami” nishca shimicunataca alpa mangata ruraj runaguca nin carca (Jer. 18:4). Alpa mangata ruraj runaguca pai munashcashnami mangacunataca ruran carca. Shina cuendallatami Jehová Diosca paipa voluntadta pactachin (Efes. 1:11).

Jehová Diosca ñucanchillata decidichunmi saquishca. Paica ñucanchicunahuan ima pasanataca na destinashcachu. Shinallata ali gentecunataca huañuiman apaj juchacunata rurachunbash na obliganllu. Jehová Diosca ñucanchicuna ali causachunmi yachachin. Shinapash cada unomi decidichun saquin.

Cunanga Nínive llactapi causaj gentecunamanda yachajupashunchi. Cai llactapi ashtaca nali gentecuna tiaimandami Jehová Diosca cai llactata tucuchinatami nirca. Pero cai gentecuna juchacunamanda tucui shunguhuan arripintirimandami Taita Diosca “llaquichishami nishca cashpapash llaquirishpa na llaquichishpa saquirca” (Jon. 3:​1-10). Jehová Diosca imata ruranata decidishca cashpapashmi na ruranata decidirca. Porque Nínive llactamanda gentecuna Jehovapa advirtishcacunata cazushpa arripintirishcamandami shina rurarca.

Rey Ciromi judiocuna libre quidachun, Jehovapa templota cutin shayachichunbashmi mandana carca (Is. 44:26–45:4). Cai profeciaca Persia llactamanda rey Ciro cai cosascunata rurajpimi pactarirca (Esd. 1:​1-4). Pero cai runaca Jehovataca na adoranllu carca. Rey Cirotaca Jehová Diosmi cai profeciata pactachingapaj utilizarca. Shinapash paita sirvichunga cai runataca na obligarcachu (Prov. 21:1).

Cabalta parlashpaca, gentecunaca Jehová Dios imashina pensajta, imata rurajujta y shamuj punllacunapi imata ruragrijujtapash na yachaita ushapanchichu (Is. 55:​8, 9). Shinapash Jehová Dios imata rurashpapash siempre alita ruran cashcatami seguro capanchi. Shinallata shamuj punllacunapi imata rurasha nishcata pactachinatapash seguromi capanchi.