Akataka mai te Pipiria e ka rauka ia Iehova i te totou i te tuatau ki mua. (Isa. 45:21) Kare ra te reira i akamārama mai e akapeea, aea, e eaa te maata i tona kite i te tuatau ki mua. No reira kare tatou e mārama i te au mea pouroa no to Iehova totou anga i te tuatau ki mua. Inara e au mea tetai kua kite tatou.

Kare o Iehova kotinga mari ra ko te au kotinga tana i akanoo nona uaorai. No tona pakari maata, ka rauka iaia te totou i tetai ua atu apinga tana i inangaro. (Roma 11:33) No te mea ka rauka iaia i te akaaere iaia uaorai, kua tāpu aia iaia uaorai kia kore aia e kite i te au mea te ka tupu.—Akaaite ia Isaia 42:14.

Ka akatupu a Iehova i tona anoano. Akapeea teia me tauturu ia tatou kia mārama i tana totou anga i te tuatau ki mua? Karanga a Isaia 46:10: “I te akakite anga i te openga mei te muatangana mairai, e mei te au tuatau taito mairai i te au mea e kare i tupu ra: i te na ko anga e, Ko taku te tuatua te ka mou, e tei inangaroia e au ra, ko taku ïa e rave.”

No reira ko tetai tumu ka rauka ia Iehova i te totou i te tuatau ki mua, no te mea e mana tona i te akatupu i te reira. Kare a Iehova e anoanoia kia kimi eaa te ka tupu a te tuatau ki mua—tei aite rai ki te akaraanga i te openga o tetai teata kia kite eaa te ka tupu. Mari ra, ka rauka ia Iehova i te iki eaa te ka tupu a te tuatau ki mua e oti ka akatupu i te reira me tae mai tera tuatau.—Exo. 9:​5, 6; Mata. 24:36; Anga. 17:31.

No teia tumu, kua taangaanga te Pipiria i teia au tuatua “akakoroia,” e te “akonoia,” ei akamārama i ta Iehova totou anga i te tuatau ki mua. (2 Ari. 19:25; Isa. 46:11) Kua uriia teia au tuatua i te reo mua te aiteanga e “potera.” (Iere. 18:4) Mei tetai tangata maani potera tei anga i te āriki karakaraea manea, ka rauka ia Iehova i te maani e te akatere i te au mea kia akatupu i tona anoano.—Ephe. 1:11.

Akangateitei a Iehova i to tatou tikaanga kia iki. Kare aia i akanoo takere i te ka tupu i roto i te oraanga o tetai tangata. Kare katoa aia e māro i te aronga meitaki kia rave i te kino te ka taki atu ki to ratou mate. Mari ra, ka āriki aia i te katoatoa kia rave i ta ratou uaorai ikianga, e ka akamaroiroi ia ratou kia rave i te au ikianga meitaki.

Akamanako i teia nga akaraanga. Te akaraanga mua, ko te iti tangata o Nineve. Kua totou a Iehova e ka takoreia te reira oire no to ratou tu kino. Inara kua tataraara to Nineve, e no reira “kua tataraara iora te Atua [ko Iehova] i te kino tana i karanga ra e tuku mai ki runga ia ratou, e kare akera aia i tuku mai.” (Iona 3:​1-10) Kua taui a Iehova i tona manako no tana i totou e ka rave aia ki to Nineve no te mea kua tataraara ratou te rongo anga ratou i te akamatakite anga a Iehova.

Te rua o te akaraanga, ko te totou no te Tutara ko Kuro te ka akarangatira i te ngati Iuda e ka tuku ia ratou kia pātu akaou i te iero o Iehova. (Isa. 44:26–45:4) Kua akatupu te Ariki ko Kuro o Peresia i teia totou. (Ezera 1:​1-4) Inara, kare a Kuro e akamori ana i te Atua mou. Kua taangaanga a Iehova ia Kuro kia akatupu i teia totou, kare ra aia i māro ana ia Kuro kia akamori iaia.—Mase. 21:1.

Ko teia ua tetai nga tumu ka akamanako a Iehova me totou aia a te tuatau ki mua. Inara kare tatou e mārama tikai i tona au aerenga. (Isa. 55:​8, 9) Noatu ra, kua kite tatou e rave ua ana a Iehova i te mea tika a te tuatau ki mua e ka akamatutu te reira i to tatou akarongo.