И Библија јасно вакерела кај о Јехова шај те дикхел со ка случинел пе ки иднина (Иса. 45:21). Ој на вакерела аменге секова детали башо адава кеда или сар о Јехова керела адава, а ни палем кобор буќа биринела те џанел англедер. Значи, на џанаја са баши е Јеховаскири способност те дикхел англедер со ка случинел пе ки иднина. Ама, акана те дикха некобор буќа со џанаја лен.

Е Јехова нане ле нисаве ограничувања, освен адала со ов чхивела лен коркори песке. Ако мангела, ов шај те употребинел пли мудрост кола со нане ла границе те шај те дикхел англедер со ка случинел пе (Рим. 11:33). Ама адалеске со иси ле совршено самоконтрола, ов исто аѓаар шај те одлучинел те на дикхел со ка случинел пе англедер. (Споредин Исаија 42:14.)

О Јехова керела те исполнинел пе лескири волја. Сар акава тано поврзимо адалеа кај е Јехова иси ле способност англедер те дикхел со ка случинел пе? Ко Исаија 46:10 тано објаснимо: „Ме таро почеток вакерава о крајо, одамна вакерѓум адава со панда на уло. Ме вакерава: ‚Мли намера ка овел хем ка керав са со мангава‘“.

Значи јекх причина соске шај о Јехова те вакерел со ка случинел пе ки иднина тани адаја со иси ле моќ те керел о буќа те случинен пе. Е Јехова нане ле потреба, аѓаар те вакерел пе, те дикхел ки иднина те шај те џанел со ка случинел пе, сар со амен понекогаш дикхаја о крајо таро несаво филми те шај те џана сар ка завршинел. Наместо адава, о Јехова шај те одлучинел нешто те случинел пе ко одредимо време ки иднина а пало адава, кеда ка авел време, те керел адава те случинел пе (2. Мој. 9:5, 6; Мат. 24:36; Апо. 17:31).

Адалеске, ки Библија користинела пе о лафи сар сој „намера“ те шај те сикавел со керела о Јехова башо несаве буќа со ка случинен пе ки иднина (2. Цар. 19:25; Иса. 46:11). Акава лафи тано преведимо таро јекх израз кова со ки оригинално хебрејско чхиб тано поврзимо е лафеа „грнчари“ (Ерем. 18:4). Исто сар со јекх вешто грнчари шај те керел тари глина јекх бут шужи вазна, аѓаар о Јехова шај те керел о буќа, јавере лафенцар те управинел е буќенцар те шај те исполнинел пли волја (Еф. 1:11).

О Јехова поштујнела амари слободно волја. Ов на одрединела англедер со ка случинел пе секоле јекхеа амендар, а ни на чхивела е шукар манушен те керен нешто со ка анел лен џи ко уништување. О Јехова дозволинела секоле јекхеске амендар те биринел сар ка постапинел, ама охрабринела амен те постапина ко исправно начин.

Те дикха дуј примерија. О прво пример тано е манушенцар тари Ниневија. О Јехова пророкујнѓа кај и диз ка овел уништими адалеске сој пхерди лошнипе. Ама кеда о мануша каинѓе пе, е Јеховаске „пело жал со вакерѓа кај ка уништинел лен хем на керѓа адава“ (Јона 3:1-10). О Јехова одлучинѓа те менинел адава со пророкујнѓа адалеске со о Ниневијција биринѓе те каинен пе откеда шунѓе и порака таро Јехова.

О дујто пример тано о пророштво башо Кир кова со ваљани сине те ослободинел е Евреен таро ропство хем те дел наредба палем те градинел пе е Јеховаскоро храми (Иса. 44:26 — 45:4). О персиско цари о Кир исполнинѓа акава пророштво (Езра 1:1-4). Ама, ов на служинѓа е чачутне Девлеске. О Јехова користинѓа ле те шај те исполнинел о пророштво, ама мукхља ле коркори те биринел каске ка служинел (Изр. 21:1).

Акала тане само некобор буќа кола со о Јехова лела ко предвид кеда вакерела со ка случинел пе ки иднина. Џанѓола пе, нијекх мануш нашти целосно те хаљол о начин сар о Јехова размислинела хем постапинела (Иса. 55:8, 9). Ама адава со џанаја саво тано о Јехова, бајрарела амари вера кај ов секогаш керела адава сој исправно, па чак кеда вакерела со ка случинел пе ки иднина.