I Biblija jasno vakerela kaj o Jehova šaj te dikhel so ka slučinel pe ki idnina (Isa. 45:21). Oj na vakerela amenge sekova detali bašo adava keda ili sar o Jehova kerela adava, a ni palem kobor bukja birinela te džanel angleder. Znači, na džanaja sa baši e Jehovaskiri sposobnost te dikhel angleder so ka slučinel pe ki idnina. Ama, akana te dikha nekobor bukja so džanaja len.

E Jehova nane le nisave ograničuvanja, osven adala so ov čhivela len korkori peske. Ako mangela, ov šaj te upotrebinel pli mudrost kola so nane la granice te šaj te dikhel angleder so ka slučinel pe (Rim. 11:33). Ama adaleske so isi le sovršeno samokontrola, ov isto agjaar šaj te odlučinel te na dikhel so ka slučinel pe angleder. (Sporedin Isaija 42:14.)

O Jehova kerela te ispolninel pe leskiri volja. Sar akava tano povrzimo adalea kaj e Jehova isi le sposobnost angleder te dikhel so ka slučinel pe? Ko Isaija 46:10 tano objasnimo: „Me taro početok vakerava o krajo, odamna vakergjum adava so panda na ulo. Me vakerava: ,Mli namera ka ovel hem ka kerav sa so mangava‘“.

Znači jekh pričina soske šaj o Jehova te vakerel so ka slučinel pe ki idnina tani adaja so isi le mokj te kerel o bukja te slučinen pe. E Jehova nane le potreba, agjaar te vakerel pe, te dikhel ki idnina te šaj te džanel so ka slučinel pe, sar so amen ponekogaš dikhaja o krajo taro nesavo filmi te šaj te džana sar ka završinel. Namesto adava, o Jehova šaj te odlučinel nešto te slučinel pe ko odredimo vreme ki idnina a palo adava, keda ka avel vreme, te kerel adava te slučinel pe (2. Moj. 9:5, 6; Mat. 24:36; Apo. 17:31).

Adaleske, ki Biblija koristinela pe o lafi sar soj „namera“ te šaj te sikavel so kerela o Jehova bašo nesave bukja so ka slučinen pe ki idnina (2. Car. 19:25; Isa. 46:11). Akava lafi tano prevedimo taro jekh izraz kova so ki originalno hebrejsko čhib tano povrzimo e lafea „grnčari“ (Erem. 18:4). Isto sar so jekh vešto grnčari šaj te kerel tari glina jekh but šuži vazna, agjaar o Jehova šaj te kerel o bukja, javere lafencar te upravinel e bukjencar te šaj te ispolninel pli volja (Ef. 1:11).

O Jehova poštujnela amari slobodno volja. Ov na odredinela angleder so ka slučinel pe sekole jekhea amendar, a ni na čhivela e šukar manušen te keren nešto so ka anel len dži ko uništuvanje. O Jehova dozvolinela sekole jekheske amendar te birinel sar ka postapinel, ama ohrabrinela amen te postapina ko ispravno način.

Te dikha duj primerija. O prvo primer tano e manušencar tari Ninevija. O Jehova prorokujngja kaj i diz ka ovel uništimi adaleske soj pherdi lošnipe. Ama keda o manuša kaingje pe, e Jehovaske „pelo žal so vakergja kaj ka uništinel len hem na kergja adava“ (Jona 3:1-10). O Jehova odlučingja te meninel adava so prorokujngja adaleske so o Ninevijcija biringje te kainen pe otkeda šungje i poraka taro Jehova.

O dujto primer tano o proroštvo bašo Kir kova so valjani sine te oslobodinel e Evreen taro ropstvo hem te del naredba palem te gradinel pe e Jehovaskoro hrami (Isa. 44:26 — 45:4). O persisko cari o Kir ispolningja akava proroštvo (Ezra 1:1-4). Ama, ov na služingja e čačutne Devleske. O Jehova koristingja le te šaj te ispolninel o proroštvo, ama mukhlja le korkori te birinel kaske ka služinel (Izr. 21:1).

Akala tane samo nekobor bukja kola so o Jehova lela ko predvid keda vakerela so ka slučinel pe ki idnina. Džangjola pe, nijekh manuš našti celosno te haljol o način sar o Jehova razmislinela hem postapinela (Isa. 55:8, 9). Ama adava so džanaja savo tano o Jehova, bajrarela amari vera kaj ov sekogaš kerela adava soj ispravno, pa čak keda vakerela so ka slučinel pe ki idnina.