Ki Biblija jasno pisini so o Jehova šaj te proreknini i budućnost (Is. 45:21). Ama, koro late na pisini svako detalji odolestar sar ili ked ov odova ćerela ili kobor buća ov birini te đanel. Znači, amen na đanaja sa andi odija e Jehovasi sposobnost. Akana ka razmotrina kola buća đanaja.

O Jehova nane le nisave ograničenja, osim okola so kokri pese ćhivđa. Ov šaj te koristini pi neograničeno mudrost te šaj te proreknini sa so mangela (Rimlj. 11:33). Ama, odolese so isi le savršeno samokontrola, ov šaj te birini te na đanel so ka ovel. (Uporedin e stihoja ando Isaija 42:14.)

O Jehova ćerela te ispunini pe olesi namera. Sar akava pomožini amen te haljova sar ov koristini pi sposobnost te proreknini i budućnost? Ko Isaija 46:10 pisini: „Me ando početko vaćerava so ka ovel ko krajo, but angleder vaćerava odova so pana na ulo. Me phenava: ’Mi namera ka ostvarini pe hem ka ćerav sa so mangava.‘ “

Znači jekh razlog sose o Jehova šaj te proreknini i budućnost tano odolese so isi le moć te ćerel te oven disave buća. Amen šaj te dikha o kraj ando disavo film te šaj te đana so ulo, ama o Jehova nane le potreba ko asavko način te dikhel so ka ovel ki budućnost. Umesto odova, ov šaj te odlučini so nešto ka desini pe ko jekh određeno vreme hem palo odova šaj te ćerel odova te desini pe ked odova vreme ka avel (Izl. 9:5, 6; Mat. 24:36; Dela 17:31).

Sebepi odova, ked ki Biblija opisujini pe so o Jehova ka ćerel ki budućnost koristinena pe o lafija „pripreminđum“ hem „ćerđum“ (2. Kralj. 19:25; Is. 46:11). Akala lafija tane prevodime ando izvorno lafi kova tano povezimo e lafeja kova značini „grnčari“ (Jer. 18:4). Sar so jekh iskusno grnčari šaj andi glina te ćerel jekh šuži vaza, ađahar hem o Jehova šaj te ćerel te oven disave buća te šaj te ispunini pi namera (Ef. 1:11).

O Jehova poštujini amari slobodno volja. Ov na odredini angleder so ka ovel ko svakone manušeso životi. Niti ćhivela e šukar manušen te ćeren diso so ka igari len ko uništenje. Ov dozvolini svako te odlučini sar ka živini, ama sikavi len sar te živinen ko ispravno način.

Ka razmotrina duj primerija. Prvo primer tane o manuša andi Niniva. O Jehova prorekninđa so odija diz ka ovel uništimi sebepi o lošnipe. Ama, ked o manuša kotar odija diz kajinđe pe, o Jehova „promeninđa pi odluka hem na anđa lenđe i nevolja koja objavinđa“ (Jona 3:1-10). O Jehova na ćerđa odova so prorekninđa odolese so on meninđe pe.

O dujto primer tano o proročanstvo ando kralj Kir kova valjanđa te oslobodini e Jevrejen ando ropstvo te bi obnovinena e Jehovaso hram (Is. 44:26–45:4). O persijsko kralj, o Kir, ispuninđa akava proročanstvo (Jezd. 1:1-4). Ama, ov na služinđa e pravo Devlese. O Jehova prekalo leste ispuninđa o proročanstvo, ama na ćhivđa le silaja te služini lese (Posl. 21:1).

Akana razmotrinđam samo nekobor buća kola o Jehova lela ko obzir ked proreknini i budućnost. Đanaja so nijekh manuš našti potpuno te haljol sar o Jehova razmislini hem so ćerela (Is. 55:8, 9). Ama, odova so đanaja ando Jehova uverini amen so ov uvek ćerela odova soj tano šukar. Odolese, na sumnjinaja ko odova sar koristini pi sposobnost te proreknini i budućnost.