Bible afa polele so Jéhovah apeut ti fa ye so ayeke si kekereke (És. 45:21). Bible afa ape anzene nzene ye kue na ndö ti fason so Jéhovah ayeke fa aye so ayeke si kekereke, na ngoi wa la lo yeke fa ni wala aye oke la lo soro ti hinga na ndö ni. Tongaso, e hinga aye kue ape na ndö ti ngangu so Jéhovah ayeke na ni ti fa ye so ayeke si kekereke. Me ambeni ye ayeke dä so e hinga ni.

Jéhovah apeut ti sara ye kue so lo ye, me na ambeni ngoi, lo soro ti sara ni ape. So lo yeke na kota ndara, lo peut ti fa ye kue so lo ye ti fa kozo si ye ni asi (aRom. 11:33). So lo hinga ti kanga bê ti lo nzoni mingi, lo peut nga ti soro ti hinga pëpe mbeni ye so ayeke si ande.—Bâ Ésaïe 42:14.

Jéhovah ayeke sara si ye so bê ti lo aye asi. Tongana nyen la tënë so a-aidé e ti comprendre ngangu so lo yeke na ni ti fa ye so ayeke si kekereke? Ésaïe 46:10 atene: “Na tongo nda ni, mbi fa tongana nyen ye ni ayeke hunzi, nga ngbene ye giriri mbi fa aye so ade ti si pëpe. Mbi tene: ‘Desizion so mbi mû awe ayeke luti, nga mbi yeke sara ye kue so mbi ye ti sara.’”

Tongaso, mbeni raison so ndali ni Jéhovah apeut ti fa ye so ayeke si kekereke ayeke so lo yeke na ngangu ti sara si aye asi. Jéhovah abezoin ape ti hinga ye so ayeke si kekereke na fason so e yeke sara ye na ngoi so e yeke bâ mbeni film. Peut-être e yeke avancé film ni ti bâ tongana nyen la a yeke hunzi kozo si e bâ ni kue. Me Jéhovah apeut ti mû desizion ti tene mbeni ye asi na mbeni mbilimbili ngoi, na pekoni lo sara si ye ni asi tâ na ngoi ni.—Ex. 9:​5, 6; Mat. 24:36; Kus. 17:31.

Ndani la, Bible asara kua na atënë tongana “leke awe”, “hinga awe” nga na “leke ti sara ni awe” ti fa ye so Jéhovah ayeke sara so andu aye so ayeke si kekereke (2 aGbia 19:25; kete tënë na gbe ni; És. 46:11). Tënë ti Hébreu so a kiri peko ni na atënë so ague oko na mbeni tënë so aye ti tene “zo ti lekengo ta”. (Jér. 18:4). Tongana ti so mbeni zo ti lekengo ta apeut ti leke mbeni pendere ta na popoto, Jéhovah apeut ti leke wala ti tourné aye ti sara si ye so lo ye ti tene asi aga tâ tënë.—aÉph. 1:11.

Jéhovah azia si azo asoro ye so bê ti ala aye. Lo leke pëpe kozo awe ye so ayeke si na zo oko oko. Lo yeke sara pëpe si anzoni zo asara mbeni ye so ague na ala na futingo. Lo zia lege na azo kue ti sara ye so ala ye, nga lo wa ala ti soro ye so ayeke na lege ni.

Zia e bâ atapande use. Kozo ni ayeke ti azo ti Ninive. Jéhovah atene so a yeke futi gbata so ndali ti sioni ti azo ni. Me na ngoi so azo ni achangé bê ti ala, “lo zia lege ti ye ti vundu so lo tene lo yeke ga na ni na ndö ti ala so, na lo ga na ni pëpe.” (Jonas 3:​1-10). Jéhovah achangé ye so lo tene kozo awe so ayeke si ndali ti so azo ti Ninive amû desizion ti changé na peko ti so ala mä wango ti lo.

Use tapande ni ayeke prophétie so a tene na ndö ti Cyrus, so ayeke zi aJuif so ayeke na ngbâa nga ayeke mû yanga ti tene a kiri a leke temple ti Jéhovah (És. 44:26–45:4). Gbia Cyrus ti Perse asara si prophétie so aga tâ tënë (Esdras 1:​1-4). Me Cyrus avoro lani tâ Nzapa ape. Jéhovah asara kua na Cyrus ti sara si prophétie so aga tâ tënë, me lo forcé Cyrus ti voro lo ape.—aProv. 21:1.

So ayeke gï ambeni ye so Jéhovah ayeke bâ ni kozo si lo fa ye so ayeke si kekereke. Ti vrai ni, mbeni zo apeut ti comprendre aye kue so Jéhovah apensé nga asara ape (És. 55:​8, 9). Me aye so e comprendre na ndö ti Jéhovah asara si e mä na bê biani so lo yeke sara ye lakue na lege ni, même aye so lo tene ayeke si kekereke.