Mivola mazava soa ty Baiboly fa afaky manambara ty hoavy Jehovah. (Isaia 45:21) Fe ndre zay, tsy resahiny amy tsipiriany hoe akory ty fomba anaovany ani-zay, le ombia ie ro manao ani-zay. Tsy resahiny koa hoe ino iaby ty raha teany ho hay mialoha. Midika zay fa tsy ho haintsika mihintsy ty raha iaby mikasiky ty fahaizan’i Jehovah manambara ty hoavy. Fe misy raha vitsivitsy avao retoa manampy antsika.

Afaky manao ze raha iaby teany hatao Jehovah, fe mifily tsy hanao ani-zay ie kindraiky. Tsy misy fetrany ty fahendreany. Afaky manambara mialoha ze raha teany hatao zany ie. (Rom. 11:33) Fe tena mahay mifehy tena ie ka mifily tsy hahay mialoha ty raha hiseho.​—Ampitovizo amy Isaia 42:14.

Manatanteraky ty sitrapony Jehovah. Ino ty ifandrambesani-zay amy ty fahaizany manambara ty hoavy? Hoy ty Isaia 46:10: “Fa nivolaniko tamy voalohany ty raha hiseho amy farany, le fa nivolaniko fa ela ty raha mbo tsy natao. Hoy ty asako: ‘Tsy hiova ty fanapahan-kevitsiko, le hataoko ty sitrapoko iaby.’”

Afaky manambara ty hoavy zany Jehovah satria mana hery hanatanteraha ty fikasàny ie. Tsy manahaky antsika Jehovah. Lafa tsika, ohatsy, manenty filma ka teantsika ho hay hoe manao akory ty hiafaran’ny raha iny, le alefantsika malakilaky raha iny. Fe tsy manao ho zay Jehovah mba hahaizany hoe ino ty raha hiseho amy hoavy. Mety mivola mialoha ie hoe amy fotoa manahaky ani-zao hiseho ty raha raiky. Ka lafa avy amy zay fotoa iny, le ataony ze hahatanteraky azy.​—Eks. 9:5, 6; Mat. 24:36; Asa. 17:31.

Antony zay mihintsy ro mahavy ty Baiboly mampiasa ty safà manahaky hoe “nanoma”, noho “nikasa”, mba hivolana ty raha ataon’i Jehovah amy raha sisany hiseho amy hoavy. (2 Mpanj. 19:25; f.a.p.; Isaia 46:11) Nadika baka amy safà tam-boalohany any safà reo, le misy ifandrambesany amy hoe “mpanefy tanimanga” ty dikany. (Jer. 18:4) Hain’ny mpanefy tanimanga mahay ty mamakopako vongan-tanimanga ho lasa vazy soasoa. Manahaky ani-zay koa fa hain’i Jehovah ty mamboatsy ty raha misy mba hanatanteraha ty sitrapony.​—Efes. 1:11.

Engàn’i Jehovah hana safidy ty olo. Tsy mandahatsy ty raha hiseho amy fiainan’olo kiraidraiky Jehovah. Tsy ie koa ro mahavy ty olo soa fanahy hanao raha hanimba azy. Engàny hifily ze fomba fiaina teany ty olo iaby, fe ampianariny an-drozy ty fomba atao mba hanana fiaina soa.

Diniho moa ohatsy roe retoa. Mahakasiky olo nipetraky ta Ninive ao rey ty voalohany. Nivola Jehovah fa horavà tanà io satria feno raha raty ty tao. Fe lafa nibebaky olo rey, le ‘niova hevitsy Jehovah ka tsy nalefany sasy loza nivolaniny hoe hahavoa an-drozy iny.’ (Jona 3:1-10) Nanova ty raha teany hatao Jehovah satria tapa-kevitsy hiova Ninivita rey lafa naharè ty fampitandrema nameany.

Faminania mikasiky an’ny mpandresy raiky mana anara Kyrosy zay ty ohatsy faharoe. Ie ro hanafaky ty Jiosy tsy ho andevo noho hanome didy mba hanorena ndraiky ty tempolin’i Jehovah. (Isaia 44:26–45:4) Nanatanteraky an’ny faminania io vatany Kyrosy Mpanjakan’ny Persa. (Ezra 1:1-4) Fe tsy nanompo ani-Ndranahary marina iny Kyrosy. Nampiasan’i Jehovah hanatanteraky an’ny faminania io ie, fe tsy niforosevany hanompo azy.​—Ohab. 21:1.

Mazava ho azy fa mbo vitsivitsy amy raha dinihin’i Jehovah reo lafa ie manambara ty hoavy. Laha ty marina, tsy misy olo afaky mahay ty raha iaby eritseretin’i Jehovah noho ataony. (Isaia 55:8, 9) Fe manatanjaky ty finoantsika ty raha haintsika mikasiky an’i Jehovah. Vomaiky tsika matoky hoe mety iaby ze raha ataony, anatini-zay ty raha ataony lafa ie manambara ty hoavy.