Ua faailoa manino mai i le Tusi Paia, e mafai e Ieova ona valoia mea o le a tutupu i le lumanaʻi. (Isa. 45:21) Peitaʻi, e lē o faamatala auʻiliʻili mai le auala, le taimi, ma le tele o mea e finagalo o ia e na te muaʻi silafiaina. O lea, e lē mafai ona tatou malamalama atoatoa i le tomai o Ieova e valoia ai le lumanaʻi. Ae seʻi o tatou iloiloina nisi o vala nei:

E mafai e Ieova ona faia so o se mea e finagalo i ai, ae o nisi taimi e filifili ai o ia e lē faia faapea. O le lē masuʻesuʻeina o lona atamai, e mafai ai ona ia valoia so o se mea e finagalo i ai. (Roma 11:33) Ae talu ai e mafai ona ia pulea atoatoa o ia lava, e mafai ai ona ia filifili e lē iloa nisi o mea o le a tutupu.—Faatusatusa i le Isaia 42:14.

E faapogaia e Ieova le faataunuuina o lona finagalo. O le ā le fesootaʻiga o lenā mea moni ma lona tomai e valoia ai le lumanaʻi? Ua faapea mai le Isaia 46:10: “Ua ou taʻu mai talu mai le amataga le iʻuga, ma taʻu mai foʻi talu mai aso anamuā mea e leʻi faia. Ua ou faapea ane, ʻO le a tumau laʻu faaiʻuga, ma o le a ou faia mea uma ou te loto i ai.’”

O lea, o se tasi o māfuaaga e mafai ai e Ieova ona valoia le lumanaʻi, ona e iai iā te ia le mana e faia ai faapea. E lē manaʻomia ona taumafai Ieova e silafia mea o le a tutupu i le lumanaʻi, e tai pei o mea e fai e tagata i nisi taimi, o le matamata muamua i le faaiʻuga o se ata tifaga ina ia iloa ai le mea o le a tupu. Nai lo o lea, e filifili e Ieova le faataunuuina o se mea e finagalo i ai i se taimi patino, ona ia faapogaia loa lea o le faataunuuina o lenā mea pe a oo i lona taimi atofaina.—Eso. 9:​5, 6; Mata. 24:36; Galu. 17:31.

O le māfuaaga lea e faaaogā ai e le Tusi Paia faaupuga, e pei o le “fuafuaina” ma le “faia le faaiʻuga” e faamatala ai mea e faia e Ieova e tusa ai ma le lumanaʻi. (2 Tu. 19:25; Isa. 46:11) O nei faaupuga e faaliliuina mai i se upu i le uluaʻi gagana, lea e fesootaʻi atu i se upu o lona uiga o le “fai ipu omea.” (Iere. 18:4) E pei lava ona pule se fai ipu omea tomai i le mea e fai i le paluga ina ia maua ai se faguʻele matagofie, e faapena foʻi ona faatonutonu e Ieova o tulaga o mea ina ia faataunuu ai lona finagalo.—Efe. 1:11.

E tāua iā Ieova le meaalofa o le filifiliga saʻoloto. E na te lē tuupōina mea e tutupu i olaga o tagata taʻitoʻatasi, pe faapogaia foʻi se tagata lotofaamaoni e faia se mea e iʻu atu ai i lona faaumatiaga. Peitaʻi, e na te tuuina le avanoa e faia ai e tagata a latou lava filifiliga, ma faalaeiauina i latou e filifili le ala saʻo.

Seʻi manatu i faaaʻoaʻoga nei e lua. Muamua, o le mea na tupu i tagata Nineva. Na valoia e Ieova o le a faaumatia le aai, ona o a latou amioga leaga. Ae ina ua salamō tagata, ona “suia ai lea [e Ieova] o lana filifiliga e tusa ai ma le mala na ia fetalai e faaoo iā i latou, ma e na te leʻi faaooina mai le mala.” (Iona 3:​1-10) Na suia le finagalo o Ieova e tusa ma le mea na ia valoia, auā na faaaogā e tagata Nineva la latou filifiliga saʻoloto e faaalia ai le salamō, i le lapataʻiga na aumaia e Ieova iā i latou.

O le faaaʻoaʻoga lona lua o se valoaga e faatatau i se tagata e igoa iā Kuresa, lea o le a faasaʻolotoina tagata Iutaia mai i le faaaunuua, ma faatonu le toe fausiaina o le malumalu o Ieova. (Isa. 44:26–45:4) Na faataunuuina lenā valoaga e le tupu o Peresia e igoa iā Kuresa. (Esera 1:​1-4) Peitaʻi, e leʻi tapuaʻi Kuresa i le Atua moni. Na faaaogā e Ieova Kuresa e faataunuuina lea valoaga, ae e na te leʻi faamalosia Kuresa e tapuaʻi atu iā te ia.—Faata. 21:1.

O le mea moni, e lē na o le pau ia o vala e aofia ai i le faaaogāina e Ieova o lona tomai e muaʻi silafia ai mea. E lē mafai foʻi e tagata ona malamalama atoatoa i ala o Ieova. (Isa. 55:​8, 9) E ui i lea, o mea ua faailoa mai e Ieova e faamalosia ai lo tatou faatuatua, e na te faia pea le mea saʻo e aofia ai lona valoiaina o le lumanaʻi.