Bible mpakisolaka papoo ante Yehova nkoka ndjewoyɛ akambo wangonanghemá l’etsho weyaye. (Iza. 45:21) Mpatoshimela ikakambo inkfumɔ ilendana la wopo kana la winá w’onanghakande nkambo djɛsɔ, ole kaanga mbala imangha ɔsande nkano djɛ ndjewa kɛnɛ kengoheta l’etsho weyaye. Djɛkondeke, topakoke ndjewa nkambo nkfumɔ dendana la nkoka djɛ Yehova djɛ ndjewoyɛ akambo wangonanghemá l’etsho weyaye. Koko, tokolenda akambo amangha wanɛ.

Yehova lako l’elelo, mbɔ ngo w’oyawilelande nyɔmɛlɛ. Má djaana djɛnde dj’ipa l’ekomo, nde nkoka ndjewoyɛ ekete kenkfumɔ k’ɔkɔpande. (Ɔrɔ. 11:33) Ladjikɛnde alekɔ la ndákota lá lɛdji lɔ djɔ, nde nkoka ndɔsa nkano dj’ipa ndjewa kɛnɛ kengoheta l’etsho weyaye.​—Ɛdjɛ la Izaya 42:14.

Yehova nanghaka kenkfumɔ k’ɔkɔpande nangha djɛ nkotshɛ ɛkɔpa kɛnde. Kɛkɔnge kɛ nkambo djɛsɔ ɛnyɛwɔ lá kɛnɛ kelendana la nkoka djɛnde djɛ ndjewoyɛ kɛnɛ kengonanghemá l’etsho weyaye? Izaya 46:10 apakisola ante: ‘Ngo má ewangelo lemi ntepelaka akambo wayalisá ladjɛ nanghema edjinge má banga banga akambo watananghema. Lemi ntepelaka ente: ‘Nkano djɛmi ngokotshama, edjinge lemi langonangha kenkfumɔ k’ɔkɔpami.’’

Djɛkondeke, elonga kɛmɔtshi kɛ Yehova oyɛnde l’akoka wa ndjewoyɛ akambo wa l’etsho weyaye nde, alekɔ la nkfulu kɛ nangha djɛ akambo nanghemá lá wopo w’ɔkɔpande. Nde apalekɔ la djonyi djɛ mpetshɛ akambo lankeke lankeke djɛ nyɛna kɛnɛ kengoheta l’etsho weyaye, etengo akambo ankfumɔ wa l’etsho weyaye wamboshiyɛka nanghemá lá lɛdji lɔmɔtshi, ko Yehova angoshishimake ngo nshishima lá ntondo kɛ nkambo djɛkɔ nanghemá. Koko, Yehova nkoka ndɔsa nkano djɛ ekete kɛmɔtshi nanghemá lá winá tshu, ko masɔ nde nangha djɛ ekete kɛkɔ nkotshama winá wɔ winá wɔkɔ okokawɔ.​—Epo. 9:5, 6; Mat. 24:36; Ele. 17:31.

M’ɔtɛ wɔ elonga kɛsɔ ndeke, Bible okambande la totepela etengo ‘ndɔngɔsɔlaka,’ ‘ntepelaka,’ la ‘nsangolaka’ djɛ ntepela kɛnɛ kɛ Yehova onaghande lá kɛnɛ kelendana l’akambo amɔtshi w’etsho weyaye. (2 Nk. 19:25; nɔtɛ; Iza. 46:11) Totepela tɔsɔ tokadjimwamaka má itepela imɔtshi y’otepela w’ofunamaki Bible isakisola ‘onkengi.’ (Jɛr. 18:4) Etengo onkengi okokande nsɔpa bomba tii nde mposɛ mpoke kɛ wɔlɔ efula, Yehova nkoka nsɔpa kana nangha ekete kɛmɔtshi djɛ nkotshɛ ɛkɔpa kɛnde.​—Ɛfɛ. 1:11.

Yehova nɛmɛyɛka lotshungɔ lɔ nsɔna lolekɔ́ l’anto. Yehova apalonghanyɛka lá ntondo nkambo ngokomela onto l’onto, la koko apananghaka dj’anto w’eloko wɔlɔ nangha nkambo mɔtshi nkoka ndatɔla t’etshitanelo. Nde mpɛyɛka anto ankfumɔ lotshungɔ lɔ ndɔsa akano yɔmɛlɛ kɛwɔ, edjinge ndakembɛka dj’iwɔ ndɔsa akano wa wɔlɔ.

Tokolenda ndjɔmbɔmba ipe yɛnɛ. Ndjɔmbɔmba kɛ ntondo nde k’ase Ninivɛ. Yehova ewoyɛka ante angotshita ngando kɛsɔ m’ɔtɛ w’akambo wa lopango wayalaki l’eteyi. Koko winá w’ase Ninivɛ yoyapɛla, Yehova ‘akalɔka nkɔdjɛ mbalaka kɛ ndatepela ante angayakala edjinge nde lako ndjakala.’ (Yɔna 3:1-10) Yehova atshikitanyɛka ikanyi yɛnde lá kɛnɛ kɛ ndewoyɛ ladjikɛnde, ase Ninivɛ wakambaka la lotshungɔ lɔwɔ lɔ ndɔsa akano, djɛ ndápɛla winá wɔ yoke losango lɔ ndjewo lɔ Yehova ndatomela.

Ndjɔmbɔmba k’ape nde, prɔfɛsi kelendana la Kurɔ, kanga lolongisá Babilɔnɛ, la lotshungolisá ase Juda má lomfumbe dj’iwɔ nkalɔ ntopika tɛmpɛlɔ kɛ Yehova. (Iza. 44:26–45:4) Kurɔ, Nkfumi kɛ Pɛrsɛ, akotshɛka prɔfɛsi kɛsɔ. (Ɛzr. 1:1-4) Koko, Kurɔ atatɛmɔlaki Ndjambe kɛ nsɔsɔlɔ. Yehova akambaka la Kurɔ djɛ nkotshɛ prɔfɛsi kɛsɔ koko ɔpɛyɛka lotshungɔ lɔnde nsɔna Ndjambe k’ɔkɔpande ntɛmɔla.​—Woo. 21:1.

Lá nsɔsɔlɔ, ɔnɛ apalekɔ donga nkfumɔ djɛ Yehova okambande la nkoka djɛnde djɛ ndjewa akambo lá ntondo k’iwɔ nanghemá. Ɛwo, lako onto w’okoka nsipisoyɛ wɔlɔwɔlɔ wopo wɔ Yehova onanghande akambo. (Iza. 55:8, 9) Koko, kɛnɛ k’ewaso lá nkambo djɛ Yehova kekembɛ djawo djɛso ente nde nanghaka winá enkfumɔ ngo kɛnɛ kelekɔ́ wɔlɔ, ndjila ole winá w’ewoyɛnde akambo w’etsho weyaye.