Bible alesha patoka’shi Yehowa mmulombene kutemuka mianda ayikakitshika mu mafuku aafiki. (Yesh. 45:21) Anka, Bible t’apatuula ka muanda koso pabitale mushindo, nsaa y’ebikitaa, sunga mianda yoso y’asangulaa bua kuuka. Biabia, t’atuku mianda yoso pabitale ngobesha ya Yehowa ya kutemuka mianda ayikakitshika mu mafuku aafiki. Anka, tubande kutalula ino mianda ipela ayilondo.

Yehowa e na matalua a kukita kioso ki’akumiina, kadi ingi nsaa asangulaa bua kupela kukita ingi mianda. Bu biadi na binangu bishi na mpuilo, mmulombene kutemuka muanda oso aukakitshika mu mafuku e kumpala wakumiina. (Lom. 11:33) Bu bi’ekandaa mu mushindo upuidikie, mmulombene dingi kusangula bua kupela kuuka muanda kampanda aukakitshika.—Puandikisha na Yeeshaya 42:14.

Yehowa akitaa bia’shi kikiebe ki’eshimba diaye kikitshikie. Bino abitukuasha naminyi bua kupusha ngobesha ya Yehowa ya kutemuka mianda ayikakitshika mu mafuku aafiki ? Yeeshaya 46:10 apatula’shi: ‘Ku mbangilo kooso naawukisha akikakitshika, naabadiila kuukisha myanda ishyaabandile kukitshiibwa. Namba’shi kitshibilo kyande akikalombana, dingi kyooso kindongamine, neekikitshi.’

Biabia, kabingilo kamune ka buakinyi Yehowa mmulombene kutemuka mianda ayikakitshika mu mafuku aafiki nka’shi, e na bukome bua kuiyilombasha. Bua kuuka mianda ayikakitshika mu mafuku aafiki, Yehowa t’akitaa bu biatukitaa ingi nsaa p’atubandila filme, atubanda kukisha bukidibukidi bua kufika ku nfudiilo bua’shi tuukie mianda i muanka. Anka, Yehowa e kuata kitshibilo kia’shi muanda kampanda aukitshika mu mafuku kampanda, na apakumbana aa mafuku, akitshi bia’shi wawa muanda ukitshikie.—Efi. 9:​5, 6; Mat. 24:36; Bik. 17:31.

Nyi buakinyi, Bible afubisha kishima “kulumbuula” mpa na bingi bishima, bua kulesha biabakitshi kui Yehowa pabitale ingi mianda i mu mafuku aafiki. (2 Bf. 19:25; Yesh. 46:11) Mbaluule bino bishima muyile kishima kia mu ludimi lua ku kibangilo, akipatula “mbuufi.” (Yel. 18:4) Mbuufi e na mayele e kuata mutanda w’ema akita nao kintu kibuwa bukile. Mu mushindo umune, Yehowa namu e kukita bia’shi mianda kampanda ilombashe mpango yaye.—Ef. 1:11.

Yehowa anemekaa matalua a kuisanguila e nao bantu. T’alumbulaa muanda oso aukitshikila muntu mu nshalelo aye nya. Dingi, t’atakulaa bantu be buwa buabadia kukita muanda kampanda ulombene kuibayipasha. Atadilaa bantu boso buabadia kusangula bua kuikala na nshalelo abakumiina, kushi kuibakitshisha bua’shi bakite’nka mianda ibuwa.

Tutalule bino bileshesho bibidi. Kileshesho kia kumpala nkia bena Ninive. Yehowa badi mutemukie’shi kibundi kia Ninive akibudibua pa muanda wa mianda yabo ibubi. Anka, nsaa ibadi bena Ninive belangie kuishimba, Yehowa ‘baalulwile naamu kitshibilo kyaaye kya kwibafuambusha buu bibaadi mwambe. Tammwibikite’ye.’ (Yon. 3:​1-10) Yehowa badi mushintule bibadi muambe bua kukita, muanda bena Ninive babatshile kitshibilo kia kushintuluka kunyima kuabo kupusha mukandu ubadi muibatumine bua kuibadimusha.

Kileshesho kia kabidi nkia Siruse, badi na kia kupososha bena Yuda mu bupika na kutuma eyi bua’shi bebakuule ntempelo a Yehowa. (Yesh. 44:26–45:4) Siruse nfumu a bena Perse nyi badi mulombashe buabua butemuki. (Esel. 1:​1-4) Siruse tabadi alanguila Efile Mukulu a binyibinyi nya. Anka, Yehowa badi mumufubishe bua kukumbasha buabua butemuki, na kumutadila bua’shi aye nabene ate kitshibilo pabitale yawa akumiina kulanguila.—Nki. 21:1.

Eyendo, ino mpenda mianda ipeela yabatalula kui Yehowa nsaa y’aukisha mianda ayikakitshika mu mafuku aafiki. Mu binyibinyi, ta kui muntu sunga ngumune mulombene kupusha mianda yoso ayikitaa Yehowa. (Yesh. 55:​8, 9) Anka, mianda yabadi betuukishe kui Yehowa ayinyingisha lukumiino luetu’shi, akitaa kiakia kilulame misango yoso—mpa na nsaa y’atemuka mianda ayikakitshika mu mafuku aafiki.