Di Bëibel ta lei u gbelingbelin taa Jehovah sa ko sabi andi o pasa a di ten di ta ko (Jes. 45:21). Ma an ta piki u finifini unfa a ta du ën. An ta piki u tu na un ten a ta du ën, nasö andi ku andi a ta suku u ko sabi. Fëën mbei wa sa taki soni u dee pisi dë finifini, u di wa sabi de. Ma tökuseei i sa buta pakisei a di woto aki fii ko sabi wantu u dee soni dee u ko fusutan.

Jehovah sa du hiniwan soni di a kë, ma so juu a ta buta taa an o du so soni. Jehovah sa ko sabi hiniwan soni di a kë, u di a köni pasa maaka (Lom. 11:33). Ma u di a sa’ u duwengi hënseei a hii futu, mbei a sa buta taa an o suku u ko sabi unfa soni o pasa a fesi.​—Luku Jesaaja 42:14.

Jehovah ta du soni sö taa soni ko pasa kumafa a kë. Unfa di soni dë ta heepi u fuu ko fusutan unfa Jehovah ta du sabi andi o pasa a di ten di ta ko? Wë Jesaaja 46:10 ta taki: „Mi da di sëmbë di ta taki a fesi andi o pasa bakaten. Mi ta konda gaanduwe a fesi andi mi o du bakaten. Mi da di sëmbë di ta taki taa: ’Soni musu pasa kumafa mi taki. Mi o du hiniwan soni di mi kë.’”

Wë wan u dee soni di mbei Jehovah sa ko sabi a fesi andi o pasa, hën da u di a abi di makiti u du dee soni dee a kë. Fuu taki ën, nöö Jehovah an nango luku andi o pasa a fesi, leti kumafa u ta du so juu te u kë ko sabi unfa wan fëlön o kaba. Di fasi fa di libi fuu o waka an dë sikifisikifi a fesi. Ma Jehovah sa buta wan ten ka wan soni musu pasa, nöö a du soni u mbei di soni dë ko pasa te di ten dou.​—Ëki. 9:5, 6; Mat. 24:36; Tjab. 17:31.

Fëën mbei di Bëibel ta wooko ku dee wöutu kuma „mi seti”, nasö „mi o du” u lei andi Jehovah ta du, di nama ku so u dee soni dee musu pasa a di ten di ta ko (2 Kön. 19:25; Jes. 46:11). Di wöutu di de puu ko a dee tookatooka fasi dë, kumutu a wan wöutu di bi kë taki „sëmbë di ta mbei soni ku pötöpötö” (Jel. 18:4). Leti kumafa wan sëmbë di ta mbei soni ku pötöpötö sa tei pötöpötö mbei wan waiti soni u buta folo, leti sö nöö Jehovah sa du soni u mbei soni ko pasa kumafa a kë.​—Ef. 1:11.

Jehovah mbei u fuu sa taki da useei andi u kë du. An sikifi a fesi unfa di libi u hiniwan sëmbë musu waka, söseei an ta mbei bunuhati sëmbë du soni di o mbei de dëdë kaba a sösö. A ta disa hiniwan sëmbë u de taki da deseei unfa de kë libi, ma a ta lei de unfa de musu du soni u de libi a wan leti fasi.

Boo buta pakisei a tu woto. Di fosuwan da di u dee sëmbë u di foto Ninifei. Jehovah bi taki taa di foto o booko kaba a sösö, u di hogilibi u dee sëmbë hedi. Ma di dee sëmbë tjali u dee zöndu u de, hën „a ko tooka pakisei, nöö an mbei di hogi miti de möön” (Jona 3:1-10). Jehovah bi tooka di soni di a bi buta taa a o du, u di dee sëmbë u Ninifei bi bia du soni woto fasi di de bi jei di kuutu bosikopu.

Di u tu soni, da di tjabukama woto di bi ta taki u di womi de kai Silosi, di bi o puu dee Dju a katibo, söseei di bi o manda de u de toona mbei di Wosu u Jehovah baka (Jes. 44:26–45:4). Könu Silosi u Pëlsia bi mbei di tjabukama woto dë pasa tuutuu (Ësl. 1:1-4). Ma Silosi an bi ta dini di tuutuu Gadu. Jehovah bi wooko ku Silosi u mbei di tjabukama woto pasa tuutuu, ma a bi lesipeki di leti di Silosi bi abi u taki da hënseei ambë a kë dini.​—Nöng. 21:1.

U taki u wantu soni nöö di Jehovah ta hoi a pakisei te a o taki andi o pasa a fesi. Fuu taki ën kumafa a dë, nöö na wan libisëmbë sa ko fusutan hii dee soni dee Jehovah ta du, ku hii dee soni dee a ta pakisei (Jes. 55:8, 9). Ma tökuseei dee soni dee Jehovah mbei u ko sabi, ta heepi u fuu ko möön dë seiki taa hii juu a ta du soni a wan leti fasi, aluwasi te a ta konda da u andi o pasa a di ten di ta ko.