Bijbel e sori krin taki Yehovah man taki san o psa na ini a ten di e kon (Yes. 45:21). Ma Bijbel no e taki finfini fa èn o ten a e du dati. A no e taki tu o furu a wani sabi na fesi. Sobun, wi no sabi ala sani finfini te a abi fu du nanga a tori disi. Ma wan tu sani di de di wi sabi.

Yehovah man du ala san a wani, ma son leisi a e besroiti fu no du son sani. Fu di Yehovah koni psa marki, meki a man taki san o psa na ini a ten di e kon, awinsi san na dati (Rom. 11:33). Ma fu di a man hori ensrefi ala ten, meki a kan besroiti tu fu no sabi san o psa.​—Luku Yesaya 42:14.

Yehovah e meki a wani fu en kon tru. San disi wani taki te wi e hori na prakseri taki a abi a koni fu taki san o psa na ini a ten di e kon? Yesaya 46:10 e taki: „Mi na a sma di e fruteri sensi a bigin san o pasa te fu kaba. Na mi e fruteri langa ten na fesi san mi o du na ini a ten di e kon. Mi na a sma di e taki: ’Sani musu pasa soleki fa mi bosroiti. Mi o du iniwan sani di mi wani.’”

Sobun, wán reide fu san ede Yehovah man taki san o psa na ini a ten di e kon, na taki a abi a makti fu du san a wani. Yehovah no abi fu kon sabi na fesi san o psa na ini a ten di e kon. A no de leki libisma di son leisi e luku a kbapisi fu wan felem fu man sabi san o psa te fu kba. Na presi fu dati, Yehovah kan besroiti taki wan sani o psa na wan spesrutu ten, èn te a ten doro, a e meki a sani dati psa.​—Eks. 9:5, 6; Mat. 24:36; Tori 17:31.

Dati meki Bijbel e gebroiki a wortu „bosroiti” fu sori san Yehovah e du te a wani taki son sani musu psa (2 Kow. 19:25; Yes. 46:11). A wortu disi vertaal kmoto fu wan Hebrew wortu di abi fu du nanga wan tra wortu di wani taki „patu-bakriman” (Yer. 18:2-4). Neleki fa wan koni patu-bakriman kan meki wan moi prapi fu wan pisi klei, na so Yehovah kan besroiti fu meki sani psa soleki fa a wani.​—Ef. 1:11.

Yehovah e gi sma na okasi fu teki den eigi besroiti. Yehovah no e bepaal na fesi fa wan sma en libi o waka. Èn a no e dwengi ret’ati sma fu du sani di den srefi no ben o wani du. Yehovah e gi ala sma na okasi fu besroiti gi densrefi fa den wani libi, ma a e leri den fa fu libi na a yoisti fasi.

Luku tu eksempre. A fosi eksempre abi fu du nanga den sma fu Ninefei. Yehovah ben taki dati a foto ben o kisi pori fu di den sma ben ogri srefsrefi. Ma di den sma fu a foto sori berow, dan Yehovah „kenki prakseri èn a no tyari rampu kon na den tapu moro” (Yona 3:1-10). Yehovah no du moro san a ben taki dati a ben o du, fu di den sma fu Ninefei besroiti fu sori berow baka di den yere a warskow fu Yehovah.

A tra eksempre na a profeititori di ben taki fu wan tiriman di nen Sirus. A man disi ben o ferlusu den Dyu di ben de na ini katibo èn a ben o taigi den fu bow a tempel fu Yehovah baka (Yes. 44:26–45:4). Kownu Sirus fu Persia meki a profeititori disi kon tru (Esra 1:1-4). Ma Sirus no ben de wan anbegiman fu a tru Gado. Yehovah gebroiki Sirus fu meki a profeititori kon tru, ma a no dwengi Sirus fu anbegi en.​—Odo 21:1.

Disi na wan tu fu den sani nomo di Yehovah e hori na prakseri te a e taki san o psa na ini a ten di e kon. A tru taki wi no man ferstan ala san Yehovah e denki èn e du (Yes. 55:8, 9). Ma den sani di a meki wi kon sabi e gi wi a fertrow taki ala ten a e du san reti, sosrefi te a e taki san o psa na ini a ten di e kon.