LiBhayibheli liyasho kutsi Jehova uyakhona kusho kutsi kutawentekani esikhatsini lesitako. (Isa. 45:21) Kodvwa alisitjeli konkhe mayelana nekutsi ukwenta njani loko nobe nini kanye nekutsi kunganani lakhetsa kukwati. Ngako asikwati konkhe ngalelikhono laJehova lekwati likusasa. Kodvwa nati tintfo lesitatiko.

Jehova angenta nobe yini layifunako kodvwa uhle akhetsa kungakwenti loko. Ngenca yekutsi uhlakaniphe kakhulu, nakafuna angakhona kusho kutsi kutawentekani esikhatsini lesitako. (Rom. 11:33) Kodvwa ngenca yekutsi uyakhona kutibamba, angakhetsa kungati kutsi kutawentekani.​—Catsanisa na-Isaya 42:14.

Jehova wenta kutsi kwenteke intsandvo yakhe. Loko kusisita njani kutsi sicondze likhono lakhe lekwati likusasa? Isaya 46:10 utsi: “Kusukela ekucaleni ngisho loko lokutawuba siphetfo, futsi kusukela kadzeni ngisho tintfo letisengakenteki. Ngitsi: ‘Sincumo sami angeke sishintje, futsi ngiyawukwenta nome ngabe yini lengijabulisako.’”

Lesinye sizatfu lesenta Jehova akhone kwati kutsi kutawentekani esikhatsini lesitako kutsi unemandla ekwenta tintfo tenteke. Akenti ngendlela lesenta ngayo nasibuka siphetfo se-movie nobe sencwadzi kuze sati kutsi kutawentekani ekugcineni. Kunaloko, Jehova angancuma kutsi intfo letsite itawenteka nini futsi nasesifika leso sikhatsi ente kutsi yenteke.​—Eks. 9:5, 6; Mat. 24:36; Imis. 17:31.

Ngenca yaloko, liBhayibheli lisebentisa emagama lanjengalelitsi “ngakulungiselela,” “ngakuhlela,” nalelitsi ‘injongo’ kuze achaze loko Jehova lakwentako mayelana naletinye tintfo letitawenteka esikhatsini lesitako. (2 Khos. 19:25, umbhalo longentasi; Isa. 46:11) Lamagama ahunyushwe asuselwa egameni leliselulwimini lwekucala lelihlobene neligama lelisho ‘umbumbi.’ (Jer. 18:4) Njengobe nje umbumbi lonelikhono angenta livasi lelihle ngesigadla selubumba, naJehova angacondzisa tintfo kuze kugcine kwenteke intsandvo yakhe.​—Ef. 1:11.

Jehova uyayihlonipha inkhululeko yebantfu yekutikhetsela. Akancumi kutsi kutawentekani ekuphileni kwemuntfu ngamunye, futsi akababangeli bantfu labalungile kutsi bente tintfo letitawenta kutsi babhujiswe. Uvumela bonkhe bantfu kutsi batikhetsele kutsi bafuna kuphila imphilo lenjani, futsi uyabancenga kutsi bakhetse indlela lekahle yekuphila.

Cabanga nganati tibonelo letimbili. Sibonelo sekucala simayelana nebantfu baseNineve. Jehova watsi lelidolobha belitawubhujiswa ngobe bantfu lebebahlala kulo bebenta tintfo letimbi. Kodvwa ngesikhatsi labantfu baphendvuka, Jehova “washintja ingcondvo futsi wabese akasayiletsi lenhlekelele lebekatsite utabaletsela yona.” (Jona 3:1-10) Jehova washintja ingcondvo ngaloko bekakushito ngenca yekutsi bantfu base Nineve bakhetsa kuphendvuka nabeva umlayeto lovela kuJehova.

Sibonelo sesibili simayelana nesiphrofetho lesikhuluma ngalenye indvodza lokutsiwa nguKhuresi lebeyitawukhulula emaJuda ekutfunjweni futsi ikhiphe umyalo wekutsi kwakhiwe kabusha lithempeli laJehova. (Isa. 44:26–45:4) INkhosi Khuresi yasePheresiya yasigcwalisa lesiphrofetho. (Ezra 1:1-4) Nobe kunjalo, Khuresi bekangamkhonti Nkulunkulu weliciniso. Jehova wasebentisa Khuresi kuze agcwalise lesiphrofetho kodvwa wamvumela kutsi asebentise inkhululeko yakhe yekutikhetsela kuze akhetse kutsi utawukhonta bani.​—Taga 21:1.

Kuliciniso kutsi akusiko loko kuphela Jehova lacabanga ngako nakasho kutsi kutawentekani esikhatsini lesitako. Siyati kutsi kute umuntfu longaticondza kahle tindlela taJehova. (Isa. 55:8, 9) Nobe kunjalo, loko Jehova lasitjele kona kwenta setsembe mbamba kutsi uhlale enta lokulungile, lokufaka ekhatsi nalapho asitjela ngelikusasa.