Echi Biblia ko aní japi Jeobá ko a omeri aniyá japi ikimea pe aminana (Is. 45:21). Nalí ke ruyé chúriká, chu kabú machí echi namuti alí ke cho chu ikí namuti machinali. Ke ti aʼlá machí chúriká isimí Jeobá jiti machimea japi ikimea pe aminana, jiti la ti ke omeri aʼlá ruyea jepuná jitra. Nalí nirú jaré namuti japi ta a machí.

Jeobá ko omeri isiá suwaba namuti japi echi nakí, nalí isini kaachi echi ko aní japi ke isima jaré namuti. Jiti wabé machíami ju, echi ko omeri machiyá chuwé namuti japi ikimea pe aminana (Rom. 11:33). Nalí, jiti echi ko we aʼlá nátika isimí suwaba namuti, echi ko ayénachó omeri aniyá chu iyiri namuti ke machinali japi ikimea pe aminana (ayénachó leeri Isaías 42:14).

Jeobá ko isimí japi binoy nakí. ¿Alí chúriká tamó iʼwiri jepuná aʼlá inamia japi Jeobá a omeri aniyá japi ikimea pe aminana? Isaías 46:10 ruyé: “Nijé ju japi ni aní ne chokichí jonsa japi ikimea, alí ni aní ma chabé jonsa japi kecho ikísimi. Nijé ju japi ni aní: ‘Nijé isima japi riká ni anili alí suwaba japi ni nakíʼ”.

Jeobá ko omeri aniyá japi ikimea pe aminana jiti echi ko we omérami ju alí omeri isiá japi echi riká ikimea. Japi riká tamujé japalí ti inea muchuwi bilé película alí ti machinali chúriká sunía, tamujé ko bachami inepa jiti machiboa chúriká suwenia. Nalí Jeobá ko ke newalé bachami inea japi riká echi película jiti machimea japi ikimea pe aminana. Echi ko nalí a omeri aniyá japi ikimea bilé namuti, chu kabú ikimea alí isiá japi echi riká ikimea (Éx. 9:5, 6; Mat. 24:36; Hech. 17:31).

Jiti la, Jeobá ko nee echi raʼíchali “nátili isimia” alí jarecho si, ruyemia japi isili jaré namuti yúa japi ikimea pe aminana (2 Rey. 19:25; nota; Is. 46:11). Hebreo niraa, jepuná versículos nee bilé raʼíchali japi ayénachó néeliwa echi raʼíchali yúa “sikolí niwáami” (Jer. 18:4). Japi riká bilé pagótami japi we aʼlá machí niwayá sikolí alí we simárika niwá, echi riká cho Jeobá omeri niwayá o isiá japi riká binoy nakí (Efes. 1:11).

Jeobá ko riwé japi ta aniboa japi ta nokinali. Echi ko ke aní piri ju japi nokisáré ibili pagótami, alí ayénachó ke iʼwérili ané echi pagótami japi aʼláala ju jiti nokimea bilé namuti japi isima japi echi suwábitami nima. Echi ko nalí tamó bineri chúriká aʼlá pirélipo alí riwé japi ta aboi natabo chúriká ti pirélinali.

Ma inepo okuá ejemplos. Bachá ko ju echi pagótami jitra japi pireili echoná Nínive. Echi pagótami echoná piréami we chati nokáami nili, jiti la Jeobá ko anili japi suwábima. Nalí, jiti echi ko riweli cha nokayá, Jeobá ko ma ke suwábili (Jon. 3:1-10). Jeobá ko sinúrika ku nátili echi namuti jitra japi anili. ¿Chúsiá? Jiti echi pagótami japi pireili echoná Nínive kipuli japi Jeobá aneli alí ku riweli cha nokayá.

Echi okuá ejemplo ko ju echi profecía Ciro jitra, bilé rijoi japi iʼwírima riweili echi judíos alí japi isima japi echi templo Jeobá níwala checho ku atewárami nima (Is. 44:26-45:4). Echi silíami Ciro Persia nuláami isili jiti ikimea echi profecía (Esd. 1:1-4). We be nalí, echi silíami Ciro ke bichíyami nili Jeobá. Tákoré Jeobá néeli echi Ciro jiti ikimea echi profecía, nalí ke iʼwérili aneli japi echi bichíwima (Prov. 21:1).

Nalí be, ayénachó nirú jarecho namuti japi ta ke omero aʼlá inamia japi chúriká isimí Jeobá jiti animea japi ikimea pe aminana. Alí ke bilé pagótami omero suwaba aʼlá inamia japi chúriká nata alí isimí Jeobá (Is. 55:8, 9). We be nalí, japi ta machí Jeobá jitra tamó iʼwiri bichiwia japi suwaba japi echi isimí sinibí aʼlá ju, ayénachó japalí aní japi ikimea pe aminana.