Rehafe ty Baiboly mazava soa fa mahafantatse ty hoavy ty Jehovah. (Isaia 45:21) Tsy rehafe’e amy ty pitsopitso’e tie amy ty fomba akore ndra ombia ty nahaia’e izay. Tsy voatere ho takantika iaby ty miomba izay. Misy raha tsiampeampe hodinehentika retoa.

Tsy misy fetra’e ty raha azo i Jehovah atao. Noho ireke managne fahendreagne le afake misaontsy mialoha ze tea’e ho saontsiegne reke. (Rom. 11:33) Faie satria voririke ty fahaia’e mifehe-tegna, le afake mifily ty raha hofantare’e reke.​—Ampitahao amy ty Isaia 42:14.

Manao ze hagnatanterahagne ty raha safirie’e reke. Ino ty ifandrambesa izay amy ty fahaia’e mamantatse ty hoavy? Magnazava hoe izao ty Isaia 46:10: “I magnambara boake am-boaloha’e ze raha hisy afaragney, naho magnambara hatrake amy izay ty raha mbe tsy nanoegne, I misaontsy tihoekey tie: ‘Tsy hiova ty vetsevetseko, le hanoeko iaby ze safirieko.’”

Ty anto’e raike mahavy i Jehovah afake misaontsy mialoha ty raha hiseho amy ty hoavy, le satria reke managne hery mba hagnatanterahagne ty fikasà’e. Naho fa itika zao te hahafantatse ty hiafarà ty filma raike le avy le henteantika ty fara’e. Faie tsy hoe izay ty atao i Jehovah. Afake misaontsy ty raha hiseho amy ty fotoagne raike reke, le avy eo naho fa avy i fotoagney le manao raha reke mba hisehoa i raha nisaontsie’ey. ​—Eks. 9:5, 6; Mat. 24:36; Asa. 17:31.

Noho ze anto’e zay, le mampiasa ty voambolagne tihoe “nagnomagne” naho “nisafiry” ty Baiboly mba hirehafagne ty raha hatao i Jehovah amy ty hoavy. (2 Mpanj. 19:25, f.a.p.; Isaia 46:11) Ty rehake tam-boaloha’e tagne mifandrambe amy tihoe “mpanefe tane lietse” ty nandikagne o rehake rehoe. (Jer. 18:4) Manahake ty mpanefe tane lietse raike mahay mampipakopako i tane lietsey hanjare bakoly soasoa, le afake mamolavola ty raha raike ka Reke mba hagnatanterahagne ty zoton’arofo’e.​—Efes. 1:11.

Magnenga o ndatio hifily ze hatao’e ty Jehovah. Tsy nifarita i Jehovah mialoha ty raha hiseho amy ty fiaigna ty ndaty tsikiraidraike. Hoe izay ka fa tsy tihoe atao’e ty hahavy ty ndaty managne toe-po soa hanao raha hahavy aze ho ringagne. Enga’e mba hanagne ty safidi’e ze kila ndaty le risihe’e mba hifily hanao ty soa iareo.

Dineho ty ohatse roe retoa. Ty ohatse voaloha’e le miomba ty mponegne ta Ninive tao. Nisaontsy mialoha ty Jehovah fa ho ravagne o tanàgne iohoe satria raty fagnahy ty ndaty ao. Faie naho fa nibebake i ndaty rey, le ‘nanegnena i Jehovah ty loza nisaontsie’e fa hanjò iareo, le tsy nampiavie’e eo zay.’ (Jona 3:1-10) Niova hevetse miomba ty raha nisaontsie’e ty Jehovah satria niova o Ninivitao naho fa naharey i hafatse fampitaogne nirehafegne tamy iareoy.

Ty ohatse faharoe, le ty faminaniagne miomba ty mpandrese raike atao tihoe Kyrosy. Nivotsora’e o Jiosy natao sese-tane reo sady nililia’e hagnoregne indraike i tempoly i Jehovah-y. (Isaia 44:26–45:4) Nagnatanterake i faminaniagney ty Kyrosy mpanjaka i Persa. (Ezra 1:1-4) Faie tsy mpanompo i Jehovah ty Kyrosy. Nampiasa i Kyrosy ty Jehovah mba hagnatanterake i faminaniagney, faie tsy nisere’e hanompo aze reke.​—Ohab. 21:1.

Ty ila’e avao amy ty raha atao i Jehovah reo naho fa hisaontsy mialoha ty raha hiseho amy ty hoavy reke. Naho ty maregne, le tsy misy ndaty afake hahatakatse amy ty fomba feno ty fomba fisaigna i Jehovah naho ty raha atao’e. (Isaia 55:8, 9) Faie magnatanjake ty finoantika ty fahafantaragne tie lava mete avao ty raha atao i Jehovah agnisa izay ty raha saontsie’e fa hiseho amy ty hoavy.