Bayibolu likamba mwakuvwika umampha kuti Yehova wangakambiya limu vo vazamuchitika kunthazi. (Yesa. 45:21) Kweni likonkhoska vosi cha vakukwaskana ndi nyengu, mo wachitiya venivi pamwenga so unandi wa vinthu vo wasankha kuziŵiya limu. Mwaviyo, tiziŵa vosi cha vakukwaskana ndi Yehova pa nkhani ya kuziŵiya limu vo vichitikengi kunthazi. Kweni pe fundu zimanavi ŵaka zo tiziŵa.

Yehova wangachita chechosi cho wakhumba kweni nyengu zinyaki wasankha kuleka kuchita vinthu vinyaki. Chifukwa chakuti Yehova we ndi zeru zambula mphaka, wangakambiya limu chechosi cho wakhumba. (Aro. 11:33) Kweni chifukwa chakuti ngwakujiko ukongwa kuluska munthu weyosi wangasankha so kuleka kuziŵiya limu vo vichitikengi.—Yeruzgiyani ndi Yesaya 42:14.

Yehova wachitiska kuti khumbu laki lichitiki. Kumbi fundu yeniyi yititiwovya wuli kuziŵa vakukwaskana ndi Yehova pa nkhani ya kuziŵiya limu vo vichitikengi kunthazi? Lemba la Yesaya 46:10 likamba kuti: “Kutuliya pakwamba ndikambiya limu vo vichitikengi, ndipuso kutuliya mu nyengu yakali ndikambiya limu vinthu vo vechendachitiki. Ndikamba kuti, ‘Vo ndasankha vichitikengi, ndipu ndichitengi chechosi cho ndakhumba.’”

Mwaviyo, Yehova wangakambiya limu vo vichitikengi kunthazi chifukwa chakuti we ndi nthazi zakuchitiska kuti vinthu vichitiki. Yehova wakhumbika cha kuwone limu vinthu vo vichitikengi kunthazi nge kuti vinthu vo vikuchitika kali nge mo munthu wangachitiya asani wawonere filimu kuti waluta dankha kukumaliya kuti wawoni mo filimu yo yikumaliya. Mumalu mwaki, Yehova wangasankha kuti chinthu chinyaki chazamuchitika pa nyengu yakuti. Ndipu pavuli paki watichichitiska kuti chichitiki asani nyengu yo yakwana.—Eki. 9:​5, 6; Mate. 24:36; Machi. 17:31.

Pa chifukwa chenichi, Bayibolu ligwiriskiya ntchitu mazu nge ngakuti ‘kunozge limu,’ ‘kupangika,’ ndi ‘kunozga’ pakukonkhoska vo Yehova wachita vakukwaskana ndi vinthu vinyaki vo vichitikengi kunthazi. (2 Mafu. 19:25; mazu ngamumphata; Yesa. 46:11) Mazu ngenanga akungafwatuliya kutuliya ku chineneru chakwambiriya cho mazu ngaki ngakoliyana ndi mazu ngo ngang’anamuwa “wakuwumba.” (Yere. 18:​3, 4) Nge mo wakuwumba walusu wangapangiya chinthu chakutowa kutuliya kudongu, Yehova wangapanga pamwenga kusintha vinthu kuti khumbu laki lifiskiki.—Aefe. 1:11.

Yehova watumbika wanangwa wakusankha wo wakutipaska. Iyu wanozge limu cha vo vichitikiyengi munthu weyosi pa umoyu. Pamwenga kuchitiska ŵanthu amampha kuti achiti chinthu chinyaki chiheni cho chingachitiska kuti akumani ndi masuzgu. Mumalu mwaki, iyu wazomereza kuti weyosi wasankhi yija vo wakhumba kuchita pa umoyu ndipuso watitisambiza mo tingasankhiya vinthu vamampha.

Tiyeni tiwoni vakuwoniyapu viŵi ivi: Chakuwoniyapu chakwamba ntcha ŵanthu wo ajanga ku Nineve. Yehova wangukambiya limu kuti tawuni ya Nineve yazamubwangandulika chifukwa cha vinthu viheni vo ŵanthu achitanga. Kweni ŵanthu a kwenuku ŵati alapa, Yehova “wangusintha maŵanaŵanu pa soka lo wangukamba kuti waŵawisiyengi, ndipu wanguleka kuŵawisiya soka.” (Yona 3:​1-10) Yehova wangusintha vo wangukambiya limu kuti wachitengi chifukwa ŵanthu a mutawuni yeniyi angusankha kusintha ŵati avwa vo Yehova wanguŵatcheŵeska.

Chakuwoniyapu chachiŵi ntcha uchimi wakukwaskana ndi Sayirasi wo Yehova wangukambiya limu kuti wazamufwatuwa Ayuda kutuwa ku ukapolu ndi kulamula kuti nyumba yakusopiyamu yaku Yehova yikazengeki so. (Yesa. 44:26–45:4) Fumu Sayirasi ya ku Peresi yingufiska uchimi wenuwu. (Ezara 1:​1-4) Kweni Sayirasi wasopanga Chiuta wauneneska cha. Yehova wangugwiriskiya ntchitu Sayirasi kuti wafiski uchimi wenuwu kweni wangumuchichizga cha kuti wamusopengi.—Nthanthi 21:1.

Mbuneneska kuti izi ndi fundu zimanavi ŵaka zo Yehova waŵanaŵaniya asani wakambiya limu vo vichitikengi kunthazi. Ndipu uneneska ngwakuti palivi munthu yo wangavwisa vo Yehova waŵanaŵana kweniso kuchita. (Yesa. 55:​8, 9) Kweni vo tiziŵa vakukwaskana ndi Yehova, vititiwovya kugomezga ukongwa kuti nyengu zosi iyu wachita vinthu vamampha, kusazgapu kukambiya limu vo vichitikengi kunthazi.